Kwamamaza

Hagiye gushyirwaho urukiko rw’ubujurire ruzafata zimwe mu nshingano z’urw’Ikirenga

Yanditswe kuya 13-10-2016 saa 20:39' na Cyprien Niyomwungeri


Mu Rwanda hagiye gushyirwaho urukiko rw’ubujurire ruzaba ruri hagati y’Urukiko rwa Repubulika n’Urukiko rw’Ikirenga, rukazajya ruburanisha imanza ku rwego rwa nyuma nkuko Urukiko rw’Ikirenga rwabikoraga.

Inama y’Abaminisitiri yateranye kuwa Gatatu tariki 12 Ukwakira 2016, yemeje Umushinga w’Itegeko Ngenga rishyiraho urukiko rw’ubujurire, rukaba ruzashyirwaho nyuma y’uko uwo mushinga usuzumwe ukanemezwa n’Inteko Ishinga Amategeko nkuko bigenda ku mishinga yemejwe na Guverinoma.

Umunyamabanga wa Leta muri Minisiteri y’Ubutabera Ushinzwe ibyerekeye Itegeko Nshinga n’andi mategeko, Evode Uwizeyimana, yasobanuye ko uru rukiko ruzaba rugizwe n’abacamanza 13 barimo Perezida na Visi Perezida, ruzaburanisha ibirego byari bisanzwe mu rukiko rw’ikirenga bitaraburanishwa runakire imanza ba nyirazo batanyuzwe mu nkiko zo hasi.

Ububasha bwo gushyiraho uru rukiko buteganywa mu ngingo ya 152 y’Itegeko Nshinga ry’u Rwanda ryavuguruwe muri 2015 mu ngingo ya 152, ivuga ko hakoreshejwe itegeko ngenga hashobora gushyirwaho urukiko cyangwa gukuraho urukiko rusanzwe cyangwa urukiko rwihariye.

Kugeza ubu mu Rwanda inkiko zisanzwe zigizwe n’urukiko rw’ikirenga, Urukiko Rukuru, inkiko zisumbuye n’inkiko z’Ibanze. Inkiko zihariye zigizwe n’inkiko z’ubucuruzi n’iza Gisirikare.

Uwizeyimana asobanura ko Guverinoma yatekereje gushyiraho uru rukiko nyuma yo kubona ko urukiko rw’ikirenga rurimo imanza nyinshi kandi atari yo nshingano yarwo y’ibanze.

Yagize ati “Ubu urukiko rw’ikirenga rufite imanza z’ibirarane nyinshi, zitindamo umuntu akaba yashobora gutanga ikirego mu rukiko rw’ikirenga akazaburana nka nyuma y’imyaka ibiri. Abantu bajya bavuga ngo ubutabera bwatinze ntibuba bukiri ubutabera, ibyo ni ikibazo abantu babonaga bagerageje gukemura mu buryo bwo kuvuga ngo hagati y’urukiko rwa Repubulika n’urukiko rw’ikirenga, hajyemo urundi rukiko.”

Akomeza avuga ko mu bindi bihugu urukiko rw’ikirenga rufite inshingano y’ibanze yo gukosora no gutanga umurongo ngenderwaho mu bijyanye no kuboneza imicire y’imanza mu nkiko zose.

Ati “Urukiko rw’ikirenga rwacu iyo nshingano y’ibanze siyo rwakoraga kuko ahubwo rwari rurunzemo imanza nyinshi. Ntabwo urukiko rw’ikirenga rwakagombye kuba rurimo amadosiye arunzemo.”

Urukiko rw’ubujurire ruzashobora kugabanya ibirarane by’imanza ziri mu rukiko rw’ikirenga kuko mu manza ruzaburanisha harimo n’imanza ubu zaregewe urwo rukiko rutari rwatangira kuburanisha.

Urukiko rw’Ikirenga ruzasigarana imanza Itegeko Nshinga riteganya ko ziburanishwa n’urwo rukiko, urugero nko kuburanisha Perezida wa Repubulika cyangwa ibibazo ku ngingo ziri mu Itegeko Nshinga bita isobanura mpamo ry’Itegeko Nshinga.

Umunyamabanga wa Leta muri Minisiteri y’Ubutabera Ushinzwe ibyerekeye Itegeko Nshinga n’andi mategeko, Evode Uwizeyimana

Gushyiraho uru rukiko bije nyuma y’uko mu rukiko rw’ikirenga hari hongewemo abacamanza bakava kuri 14 bagera kuri 20, ariko ntibyakemura ikibazo cy’imanza nyinshi.

Uwizeyimana asanga uru rukiko ari umuti urambye, kuko ruzajya ruburanisha ku rwego rwa nyuma kandi rukagira uburenganzira bw’uko imanza zishobora kuburanishwa n’inteko igizwe n’umucamanza umwe keretse igihe Perezida w’urukiko abigennye ukundi bitewe n’uburemere bw’ikiburanwa cyangwa akamaro k’urubanza ubwarwo.

Ati “Ishyirwaho ry’uru rukiko rizatuma imanza zicibwa mu buryo bwihuse kurushaho kandi binafashe kuzamura ubudakemwa bwazo.”

Ruzajya rwakira imanza zaciwe n’urukiko rukuru n’ingereko zarwo, urukiko rukuru rw’ubucuruzi ndetse n’urukiko rukuru rwa gisirikare.

Ububasha bwarwo buzagaragara mu itegeko rizagena ububasha bw’izindi nkiko buri mu mushinga w’itegeko nawo uzashyikirizwa inteko ishinga amategeko.

Urubanza ruzajya ruhera mu rukiko rukuru rushobora kuba rwajya mu rukiko rw’ikirenga bitewe n’uko uburana azajya aba atanyuzwe n’imyanzuro y’urukiko rw’ubujurire. Uru rukiko ntiruzakira imanza mu mizi kuko ni urukiko rw’ubujurire.


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Sunday 4 Ukuboza 2016
Copyright © 2009 -2014 - IGIHE Ltd - All Rights Reserved