Kwamamaza

Hagiye gushyirwaho ishami ryihariye rya Polisi rishinzwe ubukerarugendo

Yanditswe kuya 3-09-2016 saa 12:54' na Philbert Hagengimana


Polisi y’u Rwanda ifite amashami menshi arimo irishinzwe umutekano wo mu muhanda, irishinwe kuzimya inkongi no gutabara abari mu kaga, iryo kurwanya ihohoterwa n’andi, ariko hagiye gushyirwaho n’iryihariye rishinzwe ubukerarugendo muri Pariki z’igihugu.

Polisi y’u Rwanda isanzwe ifite abapolisi bihariye bashinzwe kubungabunga ibidukikije, ariko ngo ntibihagije, ahubwo haranateganywa gushyirwaho iri shami ryihariye rishinzwe ubukerarugendo, cyane ko burushaho kubyara umusaruro iyo ibidukikije byabungabunzwe neza.

Mu kiganiro yatanze mu nama ya kabiri y’ibiganiro mpaka ku kubungabunga ibidukikije n’urusobe rw’ibinyabuzima (2nd Conversations on Conservation) kuwa 30 Kanama 2016, Umuyobozi Mukuru wa Polisi y’u Rwanda, IGP Gasana K.Emmanuel, yasobanuye umusanzu w‘urwego rw’umutekano ayoboye mu kubungabunga ibidukikije.

IGP Gasana yagize ati “Polisi y’igihugu yakoze ubukangurambaga bwo kubungabunga ibidukikije ku nzego zose, […] ku buryo abantu hagati ya 150.000 na 200.000 batojwe guha amakuru Polisi ako kanya ku cyaha icyo ari cyo cyose harimo n’iby’ubucuruzi butemewe bw’ibikomoka ku binyabuzima (Illegal Wildlife Trafficking) ndetse no kwangiza ibidukikije.“

IGP Gasana yakomeje asobanurira abanyarwanda n’abanyamahanga bitabiriye iyo nama, uburyo Polisi y’u Rwanda isanzwe ifatanya n’Ikigo cy’Igihugu gishinzwe iterambere (RDB), anaboneraho gutangaza umugambi wo kurushaho kunoza ubufatanye.

Ati “RDB turakorana, urugero twatoje Abarinzi ba Pariki, ariko kandi turimo guteganya gushyiraho Polisi y’ubukerarugendo mu rwego rwo gushyira ingufu mu bibukorerwamo. Abo bapolisi bazafasha abarinzi ba Pariki kwizeza ko amashyamba yacu n’ibindi bidukikije byose birinzwe neza.”

Umutekano muri Pariki wari mu biganza by‘aba ‘Rangers’

Pariki z’u Rwanda zisanzwe zirindwa n’abitwa aba ‘Rangers’, bahuguwe mu buryo butandukanye mbere yo gutangira ako kazi, aho bigishijwe gukoresha imbunda nka kimwe mu bikoresho bifashisha, gukoresha akuma kitwa GPS mu gukusanya amakuru ku mutekano n’ubuzima by’inyamaswa.

Umwe mu bashinzwe umutekano muri Pariki y’Ibirunga yatangarije IGIHE ko iyo bafashe ba rushimusi cyangwa abaturage mu bikorwa byakwangiza ibidukikije cyangwa bigahungabanya umutekano w’inyamaswa, bahita babashyikiriza abayobozi mu nzego z’ibanze, abadaciwe ihazabu bakabashyikiriza Polisi ikabakurikiranaho ibyo byaha mu buryo buteganwa n’Amategeko ahana.

Ati “Twigishijwe gukoresha imbunda n’igihe ikoresherezwa, twigishijwe GPS. Iyo dufashe abinjiye muri Pariki guhungabanya umutekano w’inyamaswa, tumushyikiriza inzego z’ibanze bakamuca amande (ihazabu), cyangwa bakamushyikiriza Polisi iyo ari ibyaha yakurikiranwaho.”

Akomeza avuga ko hari abo bajya bafatwa bagashyikirizwa Polisi bagakurikiranwa mu butabera inkiko zikabahana.

Abo ba ‘Rangers’ ni na bo baba bashinzwe umutekano wa ba Mukerarugendo igihe bageze muri Pariki, baba bayisohotsemo bakaba bacungiwe umutekano kimwe n’abandi banyarwanda bose cyangwa abanyamahanga bari mu gihugu.

Umuyobozi Mukuru wa Polisi y’u Rwanda, IGP Gasana K.Emmanuel
Umwe mu bashinzwe umutekano muri pariki

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Sunday 25 September 2016
Copyright © 2009 -2014 - IGIHE Ltd - All Rights Reserved