Hagiye gushyirwaho ibidasanzwe bishishikariza abaganga kujya gukora mu cyaro

Yanditswe na Cyprien Niyomwungeri
Kuya 8 Ugushyingo 2019 saa 12:13
Yasuwe :
0 0

Ni kenshi havugwa ikibazo cy’ibitaro byo mu cyaro bikenera abaganga bakabura n’abahageze ntibahamare kabiri kubera uburyo bw’imikorere, imibereho n’ibindi bituma benshi bashaka gukorera mu mijyi cyane cyane uwa Kigali.

Ubwo yitabaga komisiyo y’imibereho y’abaturage n’uburenganzira bwa muntu ku wa 21 Gashyantare 2019, Minisitiri w’Ubuzima Dr Diane Gashumba, yabajijwe icyo avuga kuri iki kibazo.

Senateri Ntawukuriryayo Jean Damascène yarabajije ati "Abakozi bo mu rwego rw’ubuzima banga kujya gukorera mu cyaro bashaka gukorera i Kigali gusa kandi i Kigali tuhafite miliyoni y’abanyarwanda, abanyarwanda bandi miliyoni 11 bari mu cyaro bazavurwa na nde? [...] Ntabwo twigiye kuzakora i Kigali gusa."

Senateri Mukankusi Perine na we yagarutse kuri iki kibazo, ati “twabonyemo n’ibimeze nko kugumuka, kuba mu cyaro batahikoza mwebwe mubivugaho iki ?”

Umunyamabanga Uhoraho muri Minisante, Dr Jean Pierre Nyemazi, ubwo yitabaga PAC muri Nzeri uyu mwaka, yavuze ko akenshi mu bitaro biri mu bice by’icyaro hari ikibazo cyo kubona abaganga bahakora, ku buryo bari gushaka uburyo bwose gikemuka.

Ati “Hari ibitaro dufite biri kure ndetse hano turakora n’ubuvugizi. Dufite ikibazo cyo kubona abaganga bajyayo. Bushenge haba hari mu ha mbere.
Twageze aho turavuga ngo nimubasha kubabona, mujye mwandikira Minisiteri muyisabe kubaha uburenganzira nibura.”

Dr Nyemazi yavuze ko hari n’aho batanga amatangazo bashaka abaganga, kubera ko ari mu cyaro hakabura abajyayo.

Ubwo Perezida Kagame yahuraga n’abaganga kuri uyu wa Kane, yavuze ko hatekerezwa uburyo bwo gushyiraho ibidasanzwe bishishikariza abaganga kujya gukorera mu cyaro.

Ati “Dushobora kuba bya bindi by’uko abaganga dufite 1/6000, hari n’aho bihita bikubwira 1/1000 ariko ari mu mujyi hanze ya Kigali muganga akaba umwe 1/20 000, mu gukosora iyo mibare nyine kubw’abaturage nyine kuko nibo dushaka gukorera”.

Yakomeje avuga ko bitumvikana ukuntu mu gutanga ibishishikariza abantu gukora akazi usanga abo mu cyaro no mu mijyi bafashwe kimwe kandi mu by’ukuri bidakwiye kuba kimwe.

Ati “Muzashakisha uburyo bwose butuma kujya gukora mu cyaro bishishikaza abantu aho kugira ngo abantu bose baze gukora mu mujyi”.

Minisitiri w’Ubuzima Dr Gashumba Diane, yavuze ko batangiye gukosora ikibazo cyo gutanga uduhimbazamusyi ku baganga, aho wasangaga harimo ukubogama.

Ati “Ntabwo bikwiye ni nako byari bimeze, twatangiye kubikosora nyuma y’uko Minisitiri w’Intebe abitweretse ko umushahara ugomba kungana ariko ibyo bishishikariza abantu gukora nibyo twari twashyizeho uburyo bwo kubikora bubogamye nibyo turimo kubikosora”.

Yakomeje agira ati “Hari abantu bakorera mu bice by’icyaro ariko ntabwo wamuziza ko akarere ke karimo abaturage bake kandi wenda akora koko, turimo kubikosora ariko byari bimaze igihe bitameze neza. Ikindi ni uko twashyizemo ingingo y’uko umuntu akora kugira ngo isuzuma rikorwe neza”.

Nibura umuganga umwe mu Rwanda abarirwa abaturage 8500. Intego y’Ishami ry’Umuryango w’Abibumbye ryita ku Buzima (OMS) ni uko umuganga umwe abarirwa abaturage 1000.

Ikibazo cy’abanga gukorera mu cyaro ntikivugwa mu buvuzi gusa, kuko mu mwaka 2016 ubwo Perezida Paul Kagame yaganiraga n’abavuga rikumvikana bo mu Ntara y’Iburasirazuba, yavuze ko yababajwe n’urubyiruko rwize ibijyanye n’ubuhinzi rwanze kujya gukorera mu cyaro.

Byari biturutse ku rubyiruko Leta yarihiye kujya kwiga mu mahanga, ruvuyeyo iruha akazi mu Murenge wa Nasho mu Karere ka Kirehe, bamwe banga kujyayo kuko ari mu cyaro.

Perezida Kagame yasabye abaganga kunoza serivisi nziza batanga
Abaganga bagera kuri 800 nibo bitabiriye ibi biganiro
Minisitiri w'uburezi Dr Mutimura Eugene (iburyo) na we yitabiriye ibi biganiro by'abaganga na Perezida wa Repubulika
Minisitiri w'imari n'igenamigambi Dr Uzziel Ndagijimana (iburyo) nawe yitabiriye ibi biganiro
Minisitiri w'ubuzima Dr Gashumba Diane avuga ikivugo cy'intore z'abaganga 'Impeshakurama'

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza