Hagaragajwe uko ibidukikije bikwiye kuba umusingi w’iterambere ry’ubukungu bw’Isi

Yanditswe na David Eugène Marshall
Kuya 15 Kanama 2018 saa 09:50
Yasuwe :
0 0

Impuguke mu bukungu n’ibidukikije bemeza ko uko Isi yarushaho gutera imbere ku muvuduko utajyanye n’uburyo ibidukikije n’urusobe rw’ibinyabuzima bibungabunzwe, nta cyizere cy’ejo hazaza Isi yaba ifite.

Mu biganiro byateguwe na Kaminuza y’Abalayiki ya Kigali (UNILAK), ku bufatanye n’Ikigo cy’Abashinwa gishinzwe kubungabunga no kwigisha ibijyanye n’ibidukikije cya Xinjiang, hagaragajwe uko iterambere rigomba kuba umukenyero naho ibidukikije bikaribera umwitero mu bwuzuzanye busesuye nta na kimwe kibangamiye ikindi.

Ibi biganiro byari bifite insanganyamatsiko igira iti “Twubake iterambere n’ubukungu rirambye dukesha urunyuranyurane rw’ibidukikije’, impuguke zitandukanye zasobanuye uburyo ari ngombwa ko ibidukikije bibyazwa ubukungu buganisha ku iterambere ry’Isi, ariko bigomba gukorwa ku buryo buzigama ireme ry’ibidukikije aho kubisenya cyangwa kubisibanganya.

Umuyobozi w’Ikigo cy’Igihugu gishinzwe kurengera ibidukikije (REMA), Eng. Colette Ruhamya, yavuze ko hari ubwo abaturage bakora imirimo y’ubuhinzi basabwa kwitarura igishanga kuri metero zigenwa n’amategeko, hakaba abatinda kubyumva kandi biba biri mu nyungu ya buri wese.

Yagize ati “Dufashe urugero nko ku muhinzi uhinga akagurisha umusaruro we mu nganda zikenera amazi, nasatira igishanga ya migezi igakama, za nganda zikabura amazi zifashisha mu gutunganya wa musaruro we, byongeye nawe ubwe akabura ayo avomereza imyaka ye kubera itaka ryasibye imigezi, cya gihombo kizamugeraho kigere no kuri rwa ruganda rwamuguriraga umusaruro, we na rwiyemezamirimo bahombe bose”.

Ashimangira ko ubwuzuzanye, imikorere n’imikoranire ya buri ruhande na buri wese ari wo musingi wo gusigasira iterambere rirambye, kandi rikorwa ku buryo bugendanye n’uko ibidukikije bibungabunzwe.

Umunyamabanga wa Leta muri Minisiteri y’imari n’igenamigambi, ushinzwe igenamigambi Dr. Claudine Uwera, yabwiye abari aho ko kugira ngo ubukungu bw’igihugu burambe bisaba ko budasigana no gusigasira ibidukikije.

Avuga ko Leta y’u Rwanda ishyize imbaraga mu gushyigikira iterambere rigizwemwo uruhare n’imitungo kamere igihugu gifite kandi izo mbaraga n’ubushake bigomba no kwibanda ku buryo bugena uko ubwisubire bw’ahakurwa iyo mitungo kamere bugomba kugenda.

Yagize ati: "Ese turasarura amashyamba, turacukura amabuye y’agaciro, tugomba gukora ibyo byose tuzirikana niba aho dukura ibyo byose mu myaka icumi tuzaba tukibihakura, hanarebwa niba bizanira umuturage imibereho myiza y’igihe kirambye".

Dr. Uwera avuga ko igikenewe ari ugutekereza hakiri kare uburyo imikoreshereze y’ibidukikije hagamijwe iterambere ry’igihugu itagomba kubangamira abazabaho mu gihe kizaza, bakazagira ibibazo batewe n’uko habayeho kwangiza ibidukikije n’abo mu bihe byahise, birengagije ko nabo bazabikenera.

Ibikorwa byose bizamura ubukungu nko kubaka imihanda, inganda, n’ibindi bikorwaremezo byifashishwa mu kuzamura ubwo bukungu, bizarushaho kuba byiza bikozwe mu buryo burambye, kandi bufitiye inyungu abariho none n’igihe kizaza.

Umuyobozi w’ishami ryigisha iby’ibidukikije muri Kaminuza ya UNILAK, Dr. Abias Maniragaba, avuga ko iyo ishoramari ryirengagije ibidukikije abaturage ubwabo baryamagana na rya shoramari ntiritere umutaru.

Avuga ko yaba abahanga, abashakashatsi n’abashoramari baba bagomba kuzuzanya, kandi ko ishoramari nyaryo riba rigomba kwisunga inyigo zakozwe n’abahanga mu by’ibidukikije.

Umuyobozi wa REMA, Colette Ruhamya avuga ko iterambere rigomba kugendana no kurengera ibidukikije
Umunyamabanga wa Leta muri Minisiteri y'imari n’igenamigambi, ushinzwe igenamigambi Dr. Claudine Uwera avuga ko gusarura umutungo kamere bikwiye kugendana no guteganyiriza ab'ejo hazaza
Iyi nama mpuzamahanga ku bidukikije n'imikoreshereze yabyo ku buryo buhuje n'iterambere rirambye yitabiriwe n'abantu baturutse imihanda itandukanye

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza