00:00:00 IGIHE NETWORK KN KINYARWANDA EN ENGLISH FR FRANCAIS

Igihe urubanza rumara rutaraburanishwa cyiyongereyeho amezi 6, ibirarane by’imanza bizamukaho 47%

Yanditswe na Ishimwe Israel
Kuya 6 Nzeri 2021 saa 02:48
Yasuwe :
0 0

Raporo y’Urwego rw’Ubucamanza yagaragaje ko mu mwaka ushize, igihe urubanza rwamaraga rutegereje kuburanishwa cyiyongereyeho amasaha atandatu ava kuri ane agera ku icumi ndetse n’ibirarane by’imanza byariyongereye.

Izi mpinduka zifitanye isano n’ingamba zafashwe mu guhangana n’icyorezo cya COVID-19 cyatumye hari ibikorwa bimwe na bimwe bidindira. Mu guhangana n’iki kibazo hashyizweho uburyo bwo kwifashisha ikoranabuhanga kugira ngo imanza zikomeze kuburanishwa.

Buri mwaka, Urwego rw’Ubucamanza rutangaza raporo y’ibyo rwagezeho; ikorwa mu gukomeza icyerekezo cyo guha abarugana ubutabera bunoze kandi butanzwe mu gihe gikwiye.

Iy’uyu mwaka igizwe n’amapaji 78, irerekana ibyakozwe n’Urwego rw’Ubucamanza n’umusaruro wabyo ukubiye mu ngingo zirimo gutanga ubutabera bunoze kandi bwihuse no kwimakaza imiyoborere iboneye mu nkiko.

Iyi raporo irimo ibirego byakiriwe mu nkiko, uko byasesenguwe, imanza zinjira, izicibwa, izo inkiko zafashijemo ababuranyi kumvikana, izisigaye ndetse n’izabaye ibirarane. Irimo n’uko imanza zihindurwa haba mu bujurire busanzwe ndetse no mu manza zisabirwa gusubirwamo ku mpamvu z’akarengane.

Inagaragaza ko igihe urubanza rumara rutegereje kuburanishwa cyabaye amezi 10 kivuye kuri ane mu mwaka ushize. Ibi ni ko byagenze no ku birarane kuko uyu mwaka byazamutseho 47% ugereranije n’umwaka ushize.

Izi mpinduka zifitanye isano no kuba imanza zinjira zizamuka buri mwaka ku muvuduko uruta uw’izicibwa n’umubare w’abazica.

Iyi raporo inagaragaza ko inkiko zaciye imanza zijya kungana n’izo zaciye umwaka ushize n’ubwo muri uyu mwaka akazi kakozwe mu bihe bidasanzwe kubera icyorezo cya COVID-19.

Inkiko zashoboye kugera kuri uwo mubare zibikesha imbaraga zashyizwe mu gukoresha ikoranabuhanga ryatumye zikomeza guca imanza no mu bihe ingamba zo kwirinda icyorezo zasabaga gukorera mu rugo.

Muri rusange, imibare igaragaza ko imanza zinjira ziyongereyeho 5% mu gihe izaciwe zo ziyongereyeho 2%. Izo abacamanza bafashije ababuranyi kumvikana zo ziyongereyeho 42% kuko zavuye kuri 43 zikagera kuri 61, abumvikanye mu nama ntegurarubanza bo biyongereyeho 1%.

Iyi ntambwe yatewe ishimwa nk’uburyo buboneye bwo gukemura ibibazo mu bwumvikane igenda imenyerwa n’ubwo abayitabira bakiri bake ugereranije n’abahitamo kuburana.

Ibirego mu Nkiko z’Ibanze byaragabanutse, mu Zisumbuye n’Inkuru biriyongera

Raporo igaragaza ko ibirego abaturage bohereje mu Nkiko z’Ibanze byagabanutseho 3% mu gihe mu Zisumbuye n’Inkuru ho byazamutseho 7%.

Mu Nkiko z’Ibanze, mu 2020/2021, abaturage batanze ibirego 53.338 byaje bisangamo ibindi bigera kuri 2.071, biba 55.409. Ubwanditsi bumaze kubisuzuma, ibigera kuri 50.633 bwarabyanditse, naho 2.111 busanga bitujuje ibisabwa bisubizwa inyuma. Mu manza 50.633 harimo 39.420 zigomba kuburanishwa mu mizi na 11.214 zigomba kuburanishwa ku ifunga n’ifungura ry’agateganyo.

Umwaka warangiye hari ibirego 2.851 bitegereje gusuzumwa ngo hafatwe icyemezo ku iyandikwa ryabyo.

Muri izi nkiko, ibirego byavuye kuri 54.740 bigera ku 53.338 mu gihe ibyagombaga gusuzumwa byose nabyo byagabanutseho 4% ugereranije n’umwaka ushize.

Ibirego byasubijwe inyuma byo byagabanutseho 27% kuko byavuye kuri 2.910 bigera kuri 2.111. Ibirego byari bitarasuzumwa mu mpera z’umwaka byo byiyongereyeho 39%, biva kuri 2.052 bigera kuri 2.851.

Mu Nkiko Zisumbuye n’Inkuru, abaturage batanze ibirego 44.648 bisangamo ibindi 2.715, biba 47.363.

Muri byo ibigera kuri 42.636 [90%] byaranditswe, naho 3.144 [7%] bisubizwa inyuma mu gihe 1.660 [4%] byari bitarasuzumwa.

Muri rusange, ibirego abaturage bohereza mu nkiko byazamutseho 7% biva kuri 41.688 bigera kuri 44.648 naho ibyo inkiko zagombaga gusuzuma bizamukaho 3% biva kuri 45.990 bigera ku 47.363. Ibyanditswe nabyo byazamutseho 6% biva ku birego 40.181 bigera kuri 42.636.

Ibirego byasubijwe inyuma nabyo byazamutseho 6% mu gihe ibyagize icyo bikorwaho byazamutseho 6% biva ku 43.147 bigera kuri 45.780. Ibirego byasigaye bitarasuzumwa byo byagabanutseho 45% kuko byavuye kuri 3.000 bikagera ku 1.660.

Imanza 120 zagaragayemo akarengane, zisabirwa gusubirishwamo...

Isesengura ku manza zasabiwe gusubirwamo ku mpamvu z’akarengane harebwe izafashweho icyemezo cya nyuma, ryagaragaje ko izabonetsemo akarengane ziri kuri 3%.

Muri uyu mwaka w’ubucamanza, imanza 2.033 zasabiwe gusubirwamo ku mpamvu z’akarengane. Muri 973 zasuzumwe, Perezida b’inkiko basanze 853 (87.7%) nta karengane karimo naho 120 (12.3%) bazohereza kwa Perezida w’Urukiko rw’Ikirenga ngo hagenwe urukiko rwongera kuziburanisha.

Kuva mu 2012 kugera Kamena 2020, Urwego rw’Umuvunyi rwohereje imanza z’akarengane 541. Izo Ubugenzuzi bw’Inkiko bwamaze gusesengura ni 450, muri zo 325 (72%) Perezida w’Urukiko rw’Ikirenga yasanze zigomba gusubirwamo ku mpamvu z’akarengane naho 117 (26%) nta karengane yabonyemo.

Ababuranyi benshi batangiye kwiyungira mu nama ntegurarubanza

Raporo y’ishusho y’ubutabera mu Rwanda yerekana ko mu birego 17.550 byanyuze mu nama ntegurarubanza, ibingana na 864 (5%), ababuranyi babumvikanyeho bataburanye bisanzwe. Imanza zarangiriye muri iki cyiciro ziyongereyeho 1% ziva ku 854 zigera ku 864.

Muri uyu mwaka, abacamanza bafashije ababuranyi kumvikana mu manza 61.

Ikindi cyagaragaye muri raporo ni ubwiganze bw’imanza nshinjabyaha zihariye 68% bya zose na 63% by’imanza zose hatabariwemo izo ku ifunga n’ifungura ry’agateganyo. Muri iki cyiciro, imanza ziyongereye cyane ni iz’ubucuruzi, iz’ibyaha bimunga ubukungu bw’igihugu n’iz’ubutegetsi n’umurimo. Imanza zagabanutse cyane ni izihariye (-46%) n’iza Jenoside n’ibyaha bifitanye isano nayo (-14%).

Muri uyu mwaka inkiko zaciye imanza 74.513 harimo 60.318 zaciwe mu mizi na 14.195 zaciwe ku ifunga n’ifungura ry’agateganyo.

Ku baburana ku gukurikiranwa bafunze cyangwa bari hanze, inkiko zaburanishije imanza 14.195 ziregwamo abantu 18.788; muri bo 5.024 bafunguwe by’agateganyo, 9.815 barafungwa mu gihe abasigaye bafatiwe ibindi byemezo.

Imanza zose zaciwe zagabanutseho 2%, izaciwe mu mizi ziyongeraho 2% naho izo ku ifunga n’ifungura ry’agateganyo zigabanukaho 19%.

Urwego rw'ubucamanza buri mwaka rushyira hanze raporo y'ibikorwa rwagezeho

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .