Kwamamaza

Guverinoma yashyizeho abahesha b’inkiko bo kuyifasha kwishyuza abayibereyemo imyenda

Yanditswe kuya 30-09-2016 saa 09:10' na IGIHE


Guverinoma y’u Rwanda iratangaza ko nyuma yo gutanga igihe gihagije ku bayibereyemo imyenda ngo bishyure ntibabikore, yamaze gushyiraho abahesha b’inkiko barenga 300 ngo bayifashe kubishyuza ku ngufu.

Mu nama yahuje abanyamategeko ba Leta ejo kuwa Kane, Minisitiri w’Ubutabera, Johnston Busingye, yavuze ko abarimo umwenda Leta bahawe igihe gihagije ngo bishyure, abatarabikoze bakaba bafatiwe ingamba nshya zigamije kugaruza uwo mutungo wa Leta.

Yagize ati “Twamaze gusohora urutonde rw’abarimo leta imyenda urwo rutonde rugaragara ku rubuga rwa Minisiteri y’Ubutabera. Twari abahesha b’inkiko 200 bakurikirana abarimo iyo myenda ariko twamaze kongeraho abandi 320, bisobanuye ko imbaraga twakoreshaga ngo tubagereho zigiye kwiyongera. Sinibwira ko ubu hari uwavuga ko tutamuhaye igihe gihagije cyo kwishyura.”

Minisitiri Busingye avuga ko mu rwego rwo kwihutisha uburyo bwo kwishyuza, inzego za Leta zifite aho zihuriye n’abishyuzwa zizakorana bya hafi n’abahesha b’inkiko mu kugaruza imari ya Leta.

Yagize ati “Amafaranga yose yaburiye mu turere, Minisiteri cyangwa mu zindi nzego za Leta. Dufite abahesha b’inkiko bigenga bagera kuri 320, buri rwego rwa Leta rufite ubereyemo umwenda leta, ruzabona umuhesha w’inkiko uzakurikirana uwo muntu yishyure.”

Busingye yatangaje ko mu mwaka umwe n’igice ushize babaruye miliyari 1.6 z’amafaranga y’u Rwanda, kugeza ubu miliyoni 400 gusa zikaba arizo zimaze kwishyurwa.

New Times dukesha iyi nkuru ikomeza ivuga ko Busingye aburira abafitiye Leta umwenda kwishyura mbere y’uko bajyanwa mu nkiko, abibutsa ko amafaranga bagomba kwishyura aziyongera mu gihe bizaba ngombwa ko bishyuzwa n’abahesha b’inkiko.

Yagize ati “Icyo nabwira bariya banze kwishyura ni uko bazanategekwa kwishyura igihembo cy’umuhesha w’inkiko. Turagira inama ababereyemo leta umwenda kwishyura, ariko utegereje kujyanwa mu nkiko agomba kwibuka ko ibirego mu rukiko birushya, bihenda, kandi Guverinoma iramutse ibatsinze byabagora.”

Guverinoma ifite ingamba ku bayifitiye imyenda bahunze

Christian Iyabuze, Umunyamategeko w’Ikigo cy’Igihugu cyo guteza imbere ibikorwa by’iterambere mu nzego z’ibanze (LODA), yibaza uko Guverinoma izagaruza amafaranga yayo mu bantu bahunze igihugu, bakaburanishwa badahari, bagatsindwa imanza bagategekwa kwishyura Leta.

Minisitiri Busingye avuga ko icy’ingenzi ari uko abo bantu batibagiranye igihe icyo aricyo cyose bazishyura.

Yagize ati “Gukekwaho icyaha ni ikintu gifatwa ukwacyo. Bivuze ko tugomba kumenya neza ko impinduka mu mategeko zigomba gukorwa hitawe kuri abo bantu barimo imyenda Leta. Iyo ufite umwenda, bishobora kugukurikirana kugeza ku mwuzukuru wawe. Birashoboka kugukurikirana, hari polisi mpuzamahanga aho ibihugu 193 bikorana mu bibazo nk’ibyo, kubw’ibyo tugiye kubakurikirana kandi ntituzabireka.”

Hari abibaza uko bizagenda mu gihe ufitiye umwenda leta adafite ubwishyu buhwanye na wo. Minisitiri Busingye yavuze ko kuri iki kibazo hari itegeko ririmo gukorwa aho abo bantu bazajya bahabwa amahitamo yo gukora imirimo ifitiye igihugu akamaro mu gihe runaka.

Minisitiri w'Ubutabera, Johnston Busingye

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Wednesday 12 Ukwakira 2016
Copyright © 2009 -2014 - IGIHE Ltd - All Rights Reserved