Guverinoma yashimiye abarimu, ibizeza ko ibibazo bafite ibizirikana

Yanditswe na Emma-Marie Umurerwa , Hakizimana Jean Paul, N.Kubwimana Janvière, Prudence Kwizera
Kuya 5 Ukwakira 2018 saa 06:00
Yasuwe :
0 0

Abakora umurimo w’uburezi mu Rwanda bashimiwe umuhate bagaragaza mu kurerera u Rwanda, bizezwa ko ibibazo bafite bizwi kandi bizagenda bishakirwa umuti gahoro gahoro.

Minisitiri w’Uburezi Dr Eugène Mutimura yabigarutseho kuri uyu wa Gatanu ubwo hizihizwaga umunsi mpuzamahanga wa mwalimu, mu birori ku rwego rw’Igihugu byabereye mu Murenge wa Kigabiro mu Karere ka Rwamagana.

Uyu munsi wizihizwaga ku nshuro ya 52 ku Isi n’iya 17 mu Rwanda, ku nsanganyamatsiko igira iti “Mwalimu wize kwigisha kandi ubishoboye, ni umusingi wireme ry’uburezi.”

Dr. Mutimura yagize ati “Tuzi neza ko umurimo mushinzwe ari usaba ubwitange n’umurava, tukaba tubashimira by’umwihariko uburyo mudahwema guteza imbere umwana w’umunyarwanda mumuha ubumenyi nk’inkingi y’iterambere.”

“Turabasaba kudatezuka ku murimo w’uburezi mukorera igihugu, ikindi ndabizeza ko tuzakomeza gufatanya mu guteza imbere uburezi bw’Igihugu cyacu.”

Yabasabye kurushaho gukoresha ikoranabuhanga mu kwigisha, aho yavuze ko abarimu 400 bamaze guhabwa mudasobwa mu rwego rwo guteza imbere ikoranabuhanga, naho amashuri 692 amaze guhabwa mudasobwa aho buri kigo gihabwa byibuze mudasobwa 100.

Hanahembwe umwarimu wabaye indashyikirwa mu Rwanda hose witwa Girabawe Aloysie ukomoka mu Karere ka Nyagatare, wigisha isomo ry’Ibinyabuzima mu Ishuri ryisumbuye rya SOPEMU, akaba yahembwe Moto, televiziyo nini na mudasobwa.

Girabawe yabwiye IGIHE ko mu byatumye ahiga abandi harimo imibanire myiza n’abandi no gukoresha ikoranabuhanga mu kwigisha mu gihe ari ngombwa.

Ati “Icyatumye mpiga abandi ni imibanire myiza na bagenzi bagenzi banjye, gukunda akazi kange no gukoresha ikoranabuhanga ndi kwigisha.”

Hanahembwe umwarimu wahize abandi mu Ntara y’iburasirazuba witwa Nyirazanazose Rachel wigisha kuri G.S. Karenge, wahembwe Moto. Hanahembwe umwarimu wakoresheje neza inguzanyo yahawe na Umurenge SACCO mu Ntara, nawe wahembwe moto.

Abarimu basabye ko umushahara utekerezwaho

Mu Mujyi wa Kigali ibirori byizihirijwe mu Karere ka Gasabo, abarimu batanga ibyifuzo birimo icyo kongezwa umushahara ukajyana n’ibiciro biri ku isoko.

Birimo ko abarimu bo mu mashuri y’incuke bajya bahembwa na Leta, kandi mu guhemba abarimu b’indashyikirwa hakajya hahebwa n’abarimu bigisha mu mashuri yigenga.

Umunyamabanga wa Leta ushinzwe amashuri abanza n’ayisumbuye, Issac Munyakazi, yabwiye abarimu ko ibyifuzo byabo bizabonerwa ibisubizo, yizeza ko abarimu b’incuke guhera umwaka utaha bazatangira guhembwa na Leta.

Yagize ati “Ubushake burahari kandi buzahoraho, iyo ikibazo kizwi burya ni intambwe ya mbere yo kugishakira igisubizo. Ntabwo mutubwiye ibyo tutazi turabizi kandi turi gutekereza uburyo bwo kubishakira umuti.”

Yavuze ko mu biteganywa muri gahunda ya Guverinoma y’imyaka harimo n’ibirebana n’imibereho myiza ya mwarimu.

Ati “Twe rero nka Minisiteri y’uburezi tugomba gukora ibishoboka byose kugirango icyo cyizere umukuru w’Igihugu yabahaye muri iyi manda y’imyaka irindwi kigire icyo gikorwaho.”

Mu Mujyi wa Kigali hahembwe umwarimu w’indashyikirwa, hahembwa Uwimana Pierre Celestin wigisha muri Groupe Scolaire Kabuga Catholique mu Karere ka Gasabo.

Basabye ko umunsi wahariwe gutegura amasomo usubizwaho

Umunsi mukuru wa mwarimu ku rwego rw’Intara wabereye mu Karere ka Nyanza; mu gikorwa cyaranzwe no gusabana, kwidagadura no guhemba ababaye indashyikirwa.

Uwizeyimana Appolinarie wavuze mu izina rya bagenzi be, yagarutse ku mwanya munini mwarimu amara yigisha akabura umwanya wo gukora ibindi bimuteza imbere ndetse no kuba barakuriweho umunsi wo guteguriraho amasomo.

Ati “Kuba umurezi akora hafi amasaha yose y’umunsi bituma atabasha gukora ibindi byamuteza imbere, twifuza ko Minisiteri y’uburezi yareba uko mwarimu yabishimirwa.”

“Bituma umwarimu arara ijoro ategura akigisha mu gitondo ananiwe. Abarezi bifuza ko hasubijweho uwo munsi mwarimu yabasha gutegura amasomo ye neza.”

Umwarimu wabaye indashyikirwa ku rwego rw’Intara y’Amajyepfo ni Mutuyimana Restitutha, wigisha mu ishuri ribanza rya Higiro mu Karere ka Gisagara. Yahembwe moto, mudasobwa igendanwa.

Mu karere ka Gakenke mu Ntara y’Amajyaruguru, Umuyobozi Mukuru muri Minisiteri y’Uburezi, Baguma Rose, yibukije abarimu ko “hakenewe umwarimu w’umwuga kandi ubishoboye, ni ukuvuga ubifitiye impamyabumenyi kandi yanditse mu gitabo cya mwarimu.”

Yavuze ko ariyo mpamvu basaba abarimu batujuje ibisabwa kugana amashuri nderabarezi anyuranye, ku buryo iki kibazo cy’abarimu batabyize kibonerwa umuti vuba.

Minisitiri w'Uburezi Dr Mutimura Eugene ashyikiriza ibihembo Girabawe Aloysie wabaye umwalimu w'indashyikirwa mu gihugu

Amafoto y’uko umunsi wizihijwe mu Mujyi wa Kigali

Abarimu bagerageza gufata ifoto mugenzi wabo wabaye indashyikirwa
Abarimu bari bitabiriye kwizihiza umunsi wabo
Abarimu bo mu turere tugize umujyi wa Kigali babaye indashyikirwa nabo bahembwe mudasobwa
Umunyamabanga wa Leta ushinzwe amashuri abanza n'ayisumbuye muri Mineduc, Isaac Munyakazi, yashimangiye ko leta iteganyiriza binshi mwalimu
Umwarimukazi wabaye indashyikirwa yahembwe moto na mudasobwa
Uwimana Pierre Celestin wigisha muri Groupe Scolaire Kabuga Catholique mu Karere ka Gasabo, niwe wabaye indashyikirwa mu Mujyi wa Kigali, ahembwa moto na mudasobwa
Hakizimana Clixte yahawe moto nk'umwarimu wahize abandi mu Ntara y'Amajyaruguru
Umwarimu wabaye indashyikirwa ku rwego rw’Intara y’Amajyepfo ni Mutuyimana Restitutha

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza