Guverinoma irashaka kurushaho kunoza umutekano w’indege za gisivili

Yanditswe na Mukaneza M.Ange
Kuya 6 Gashyantare 2018 saa 07:41
Yasuwe :
0 0

Minisiteri y’Ibikorwaremezo, MININFRA, ku wa Mbere yagejeje ku Nteko Ishinga Amategeko umutwe w’abadepite, umushinga w’itegeko rigamije kuvugurura no gushyiraho amabwiriza agenga indege za gisivili mu Rwanda.

Ubwo yasobanuriraga Abadepite ibijyanye n’uyu mushinga, Umunyamabanga wa Leta ushinzwe ubwikorezi muri MININFRA, Jean de Dieu Uwihanganye, yavuze ko aya mabwiriza mashya agamije kurushaho kunoza uburyo u Rwanda rugenzura ibijyanye n’ibibera mu ndege ndetse n’impanuka.

Uyu mushinga w’itegeko kandi uteganya ingingo ziha Umunyamabanga wa Leta ushinzwe ubwikorezi, ububasha bwo gukora iperereza ku mpanuka z’indege no kugaragaza uburyo u Rwanda rukorana n’ibindi bigo na za guverinoma.

Aganira na The New Times, Uwihanganye yavuze ko iri tegeko rikenewe cyane, kuko u Rwanda rwifuza kunoza uburyo urwego rurebana n’indege rukora hitabwa cyane ku mutekano wazo.

Ati “Kuri guverinoma, gutwara abantu n’ibintu mu ndege ni urwego rw’ingenzi twifuza gushoramo imari kandi kugira ngo ibi bishoboke tugomba kubasha kugira uburyo bujyanye no kuzicunga no kugenzura umutekano wazo mu buryo buhambaye.”

Uwihanganye yavuze ko amabwiriza mashya bifuza gushyiraho azatuma Ikigo Nyarwanda gitwara abantu n’ibintu mu ndege, RwandAir cyoroherwa no gukora ingendo ku mugabane w’u Burayi na Amerika, kuko rikubiyemo ibisabwa n’Ikigo cyo muri Amerika kugenzura iby’indege (United States of America’s Federal Aviation Administration, FAA) ndetse n’icyo mu Muryango w’Ubumwe bw’u Burayi (European Union’s European Aviation Safety Agency, EASA). Kugeza ubu ikorera ingendo i Londres mu Bwongereza na Bruxelles mu Bubiligi.

Gukurikiza amabwiriza y’ibi bigo ni ingenzi cyane ku Rwanda kuko mbere y’uko Ikigo cy’ubwikorezi mu ndege gitangira gukorera mu Burayi cyangwa Amerika, FAA na EASA bibanza gukora igenzura ku bijyanye n’umutekano ku gihugu giturukamo.

Intego y’iri genzura ni ukureba niba uburyo igihugu gikurikirana ikigo cyifuza gukorera muri Amerika cyangwa i Burayi, bukurikiza amabwiriza arebana n’umutekano ashyirwaho n’Ikigo Mpuzamahanga kigenzura ibijyanye n’indege, ICAO (International Civil Aviation Organisation).

Iri tegeko ryashyikirijwe komisiyo bireba ngo iri suzume, riha Ikigo cy’Igihugu gishinzwe ibijyanye n’indege, RCAA, ububasha n’inshingano zo kugenzura ibijyanye n’umutekano w’abakora mu ndege, ibigo byita ndetse bigakora indege zagize ibibazo, ibibuga by’indege, abatanga serivisi zo gutwara abantu n’ibintu mu ndege ndetse n’ibigo bitanga amahugurwa.

Umunyamabanga wa Leta ushinzwe ubwikorezi muri MININFRA, Jean de Dieu Uwihanganye, ubwo yasobanuriraga Abadepite ibijyanye n’uyu mushinga / Ifoto: The New Times

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza