Kwamamaza

Ni iki uwayoboye Musanze ikaba iya nyuma mu mihigo azifashisha mu kuyobora Amajyaruguru?

Yanditswe kuya 6-10-2016 saa 09:03' na Ntakirutimana Deus


Musabyimana Jean Claude wagizwe Guverineri w’Intara y’Amajyaruguru, yizeye ko agiye guhangana n’ibibazo bitandukanye bivugwa muri iyo ntara birimo kwigenga kw’abakozi mu Karere ka Musanze n’ibindi, kubera ko yagize igihe cyo kubona inyigisho zatumye akura mu bya politiki.

Ibibazo byo kwigenga kw’abakozi biherutse gukomozwaho na Minisitiri w’Intebe, Anastase Murekezi mu muhango wo kwesa imihigo y’umwaka wa 2015/2016 no gusinya iya 2016/2017.

Icyo gihe yatunze agatoki uwari Umuyobozi w’Akarere ka Musanze, Musabyimana Jean Claude, amushinja kutayobora abakozi be bigatuma bikorera ibyo bashatse, byatumye akarere kaza ku mwanya wa nyuma, ibintu yasabye ko byakosorwa.

Yagize ati “Muri Musanze iba iya nyuma, hari ikibazo gikomeye cyane abakozi barigenga, meya se kuki atayobora abakozi be? Abakozi barakora ibyo bashaka, ni bo bayobozi nk’uko bari barabimenyereye kuva mbere, ntabwo ari byo, nyobozi igomba kuyobora rwose, bibe Nyakubahwa Perezida wa Repubulika, bayobore cyangwa baveho twikomereze.”

Nyuma y’uko Musabyimana agizwe Guverineri w’Intara y’Amajyaruguru, IGIHE yamubajije niba imbogamizi zatumye akarere yari ayoboye kaba aka nyuma zizamwemerera kwesa imihigo y’iyo ntara no kuyiteza imbere.

Yavuze ko ibyo bibazo byagaragajwe na Minisitiri w’Intebe bihari ariko ko yari mu nzira zo kubikemura.

Ati “Buriya kubaka imikorere n’imikoranire izira amakemwa ni urugendo, ni inzira, ntabwo ari ahantu ukubita inkoni urutare rukiyasa. Oya, ni urugendo abantu bubaka kandi bakarugeraho rufata umwanya wa ngombwa kugira ngo ubigeraho, icyo nzi cyo ni uko twari turi mu nzira.”

Yakomeje agira ati “Ibyavuzwe byo ntabwo mbihakana kuko nibyo. Ntabwo twari twakageze koko ku mikoranire ikomeye, ariko twari mu nzira, twari mu murongo mwiza. Ari nayo mpamvu nizeye ko n’uzakomeza kuyobora aka karere (Musanze) azabikomeza, tuzafatanya tubikomeze tugere aho tugomba kugera, haba mu karere ka Musanze ndetse no mu tundi turere tw’intara y’Amajyaruguru.”

Ku bindi bibazo bitandukanye bivugwa muri ako karere birimo iby’abaturage n’abayobozi baho bigeze kujya mu bikorwa byo kwifatanya n’umutwe w’inyeshyamba urwanya u Rwanda (FDLR), ibiyobyabwenge n’ibindi; yavuze ko bazafatanya n’abaturage kubikemura.

Ati “Icya mbere ni uguhuza imbaraga , Sindabyinjiramo neza ngo menye ibibazo intara ifite, ariko ahari abantu haba ibibazo. Ariko icyo intara iberaho ni uguhuza imbaraga n’ibitekerezo kugira ngo ibibazo byose abaturage bafite bikemuke, kandi numva nanjye ari byo nzakora.”

Musabyimana yavuze ko azasohoza akazi ke yifashishije ubumenyi afite mu bya politiki yavomye mu muryango FPR Inkotanyi abarizwamo.

Ati “Ngira umuryango wa politiki mbarizwamo kandi mazemo igihe kirekire. Mba muri RPF Inkotanyi, ni umuryango wandeze urankuza mu bya politiki. Ngira inyigisho zituma koko niyumvamo ko nshobora kuba umuyobozi, nigiriye icyizere ku buryo nshobora kuyobora abandi kandi nkabagirira akamaro, nkuramo inyigisho nigisha zo gukunda igihugu no kugikundisha abandi. Ni ibintu umuryango RPF Inkotanyi wanyubatsemo kandi numva bimfasha mu kazi kanjye ka buri munsi.”

Yakomeje agira ati “Ndi umuntu kimwe n’abandi, nzitanga n’ubumenyi mfite, imbaraga mfite ntabwo ndakura cyane. Imbaraga mfite, ibyo nagiye mbona mu buzima, abantu dusanzwe dukorana mu nzego zose n’ibindi, birampa icyizere ko imirimo nashinzwe nzayikora neza, kandi ntabwo umuntu akora wenyine, ni urwego kandi rufite abarugize bakomeye, kandi akazi kacu ni uguhuza ngo duteze intara imbere."

Kwakira ko yagizwe Guverineri byabanje kumugora

Musabyimana yamenye ko yahawe izo nshingano nshya ubwo yari mu rugo avuye mu kazi bari biriwemo mu Karere ka Bugesera mu rugendoshuri rwo kwiga uko imidugudu mishya igaragaza gutura neza yubatswe.

Ati “Nanjye nabimenye nkigera mu rugo kubyakira birangorana, byatwaye umwanya kugira ngo mbyumve, byatwaye nk’amasaha nk’abiri nanjye ntarabyumva, kuko n’iyo nkuru sinari nakayiboneye njyewe ku giti cyanjye, ni abantu bambwiye abandi bahamagara abantu twari kumwe, n’uko ndayumva kubera ko ntari umwana narayakiriye nyishyira mu mwanya wayo.”

Hari icyo asaba abaturage yahawe kuyobora

Ati “Ndabasaba ubufatanye kugira ngo dutere intambwe mu cyerekezo igihugu cyacu kiganamo, kuko gifite gahunda nziza y’iterambere rishingiye ku muturage. Ndabasaba ubufatanye kugira ngo gahunda zose za leta zigerweho, kugira ngo abatugiriye icyizere n’abaturage baduha ibyo gukora bamererwe neza kandi bashimishwe n’ibyo dukora.”

Yizeza Perezida Kagame kutazamutenguha

Ati “Icyo nakongeraho ni ugushimira Nyakubahwa Perezida wa Repubulika y’u Rwanda kubera icyizere yangiriye anshinga uriya umwanya ukomeye kandi nkaba mwizeza ko tuzafatanya n’abaturage bose b’Intara y’Amajyaruguru tugakomeza guteza imbere iyi ntara.”

Musabyimana ni muntu ki?

Musabyimana w’imyaka 44 y’amavuko yavukiye mu Karere ka Burera, aho yize amashuri abanza. Amashuri yisumbuye yayarangije mu 1994, nyuma yo kuyigira mu turere twa Musanze na Gicumbi, muri Groupe Scolaire de la Salle (Byumba) na Groupe Scolaire Musanze.

Nyuma yaho yize mu yahoze ari Kaminuza Nkuru y’u Rwanda i Butare, mu bijyanye n’ubuhinzi, mu ishami rya Genie Rural mu 2002.

Mu bindi, yabaye umukozi w’umushinga wari ugamije kubaka ibyari byarasenywe mu gihe cy’urugamba rwo kubohora igihugu na Jenoside yakorewe Abatutsi. Icyo gihe yari umutekinisiye mu yahoze ari Intara ya Ruhengeri. Yahavuye ajya kwigisha muri kaminuza yahoze yitwa Isae Busogo.

Yaje kwiga amasomo y’icyiciro cya gatatu mu bijyanye n’ubumenyi mu by’imikoreshereze y’amazi. Ayarangije yatangiye umwaka umuganisha ku kubona impamyabumenyi y’ikirenga (PhD) ariko ntiyabasha kubirangiza kubera akazi ka leta.

Gukunda ibyijyanye no kuhira imyaka yabitewe n’urugendo bigeze gukora biga mu mwaka wa kabiri wa Kaminuza, basura igishanga cya Nasho atungurwa no kuhabona amasaka yumye kandi iruhande rwaho hari ibiyaga. Byatumye akangukira kwiga ibyo kuhira imyaka biciye mu gusoma ibitabo nubwo iyo gahunda yari itaratangira mu Rwanda.

Musabyimana yakoze kandi muri Minisiteri y’Ubuhinzi n’Ubworozi(MINAGRI), ashinzwe ibijyanye no kuhira imyaka, agirirwa icyizere agirwa umwe mu bagize itsinda ry’igihugu ryari rishinzwe gukoresha imashini no kuhira imyaka mu gihugu, ayobora n’imishinga yo kuhira muri MINAGRI kugera muri 2014, aho yatorewe kuba Umuyobozi w’Akarere ka Musanze wungirije ushinzwe imari n’ubukungu.

Musabyimana ngo ntiyigeze atekereza kuzaba umunyapolitiki ariko ngo yakuze yemera ko iyo umuntu yize neza agakora inshingano ze neza, akagira umuhate mu byo akora byanze bikunze atera imbere.

Akunda igitoki nubwo ibirayi byamuvangiye

Musabyimana yavuze ko akunda igitoki kivanze n’ibindi birimo ubunyobwa, amashaza, ariko ngo gutura no kuvukira ahantu hari ibirayi byatumye abikunda.

Ku bijyanye n’imyidagaduro, akunda abahanzi cyane abaririmba indirimbo za karahanyuze nk’Impala, ndetse n’iz’abahanzi bagezweho muri iyi minsi biciye mu butumwa batanga nka Jay Polly, Bruce Melody na Diplomate.

Ikintu cyamuryoheye mu buzima ni ukugira umugore bumvikana n’umuryango babanye neza mu gihe hari imiryango ibayeho mu bibazo.

Musabyimana Jean Claude yiteguye guhangana n'ibibazo byugarije Intara y'Amajyaruguru afatanyije n'abo ayoboye

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Wednesday 7 Ukuboza 2016
Copyright © 2009 -2014 - IGIHE Ltd - All Rights Reserved