Gutunga ubwiherero mu Banyarwanda bihagaze bite?

Yanditswe na Evariste Nsengimana
Kuya 30 Ugushyingo 2017 saa 07:36
Yasuwe :
0 0

Ubwiherero bubona umugabo bugasiba undi mu bihugu bimwe na bimwe ku isi! Iyi nteruro si amakabyankuru kuko nko mu Buhinde, umugore ashobora gutandukana n’uwo bashakanye kubera ko yasanze atagira ubwiherero ku buryo yisanga ajya kwiherera mu gisambu bigatuma abaho adatuje.

Muri Kanama uyu mwaka, Urukiko rwo mu Buhinde muri Leta ya Rajasthan rwahaye umugore uburenganzira bwo gutandukana n’umugabo we kuko urugo rwe rutagira ubwiherero. Uyu mugore yavugaga iyo ashatse kujya kwiherera, yikinga hanze mu bihuru kandi nabwo bigasaba ko yitwikira ijoro ngo hato abaturanyi batamuha inkwenene.

Umugore yashinjaga umugabo we ko mu myaka itanu bari bamaranye, yananiwe kubaka ubwiherero imbere mu rugo. Hari n’undi mugabo wabenzwe ku munota wa nyuma ubukwe ntibwataha nyuma yaho umugeni we yari amaze gutahura ko ashobora kuzisanga ajya kwiherera mu gihuru mu masaha y’ijoro.

Kugeza ubu mu Rwanda nta rubanza nk’uru ruraba, gusa ni mu gihe kuko ugereranyije uko iki kibazo giteye mu Buhinde no mu Rwa Gasabo, hari itandukaniro rikomeye. Mu Buhinde, abagera kuri miliyoni 600 bafite ikibazo cy’ubwiherero.

Ibarura riheruka gukorwa n’Ikigo cy’Ibarurishamibare mu 2015, ryagaragaje ko 83,4% by’Abanyarwanda bakoresha bakanatizanya ubwiherero bwujuje ibyangombwa. Icyo gihe abanyamujyi bitumaga ku gasozi bitewe no kutagira ubwiherero bari 1% mu gihe mu cyaro bari 3%.

Mu Ugushyingo buri Mwaka, isi yizihiza iya 19 nk’umunsi mpuzamahanga w’ubwiherero, wahariwe gushishikariza abantu kugira isuku no kwituma ahabugenewe, aho Minisiteri y’Ubuzima (Minisante) yibutsa Abanyarwanda ko buri rugo rugomba kugira umusarane warwo kandi bakibuka gukaraba intoki n’amazi meza n’isabune mu gihe bavuye mu bwiherero.

Ishami ry’Umuryango w’Abibumbye ryita ku Buzima, OMS, rivuga ko 39% by’abatuye isi aribo bagerwaho na serivisi z’isukura, mu gihe byagaragajwe ko abantu baramutse bakoresheje amazi meza, isuku n’isukura byakongera amahirwe yo kubaho, bikarengera ubuzima bw’abantu barenga ibihumbi 842 mu bapfa bishwe n’umwanda.

Umukozi wa Minisante Ushinzwe Ishami ry’Ubuzima bushingiye ku bidukikije, Mukamunana Alphonsine, yabwiye IGIHE ko umubare w’Abanyarwanda bafite ubwiherero bwujuje ibyangombwa umaze kuzamuka bitewe n’ubukangurambaga bukorwa hirya no hino mu baturage n’inzego z’ibanze, abadashoboye kubwiyubakira, bakabwubakirwa.

Yavuze ko ibigenderwaho kugira ngo umuntu yizere ko afite ubwiherero budashobora gushyira mu byago ubuzima bwe nko kurwara indwara ziterwa n’umwanda birimo uburebure bwa metero nibura eshanu z’ubujyakuzimu, kuba butinze kandi bworoshye gukorerwa isuku, bwubakiye ku mpande, busakaye ndetse bukanakinze.

Kugeza ubu ku isi OMS ivuga ko habarurwa abantu batagira ubwiherero bwujuje ibisabwa mu ngo zabo barenga miliyari 4,5 naho abasaga miliyoni 862 bituma ku gasozi.

Mukamunana yasobanuye ko umuntu udafite ubwiherero atari we gusa bigiraho ingaruka ahubwo n’abaturanyi be zibageraho.

Yagize ati “Utabufite ahura n’ingaruka nyinshi, ndetse si nawe gusa, kuko n’abaturanyi be aba abashyira mu kaga. Umuntu udafite ubwiherero, bivuze ko yituma ku gasozi, ya myanda ishobora kumanukira mu masoko y’amazi, ukazasanga abaturage b’aho bose bahuye n’ikibazo cy’indwara zituruka mu mwanda.”

Imibare iheruka gushyirwa ahagaragara na OMS igaragaza ko abarenga miliyoni ebyiri ku isi, badafite ibikoresho by’ibanze by’isuku n’isukura. Ni mu gihe miliyari 1,8 usanga bakoresha amazi yandujwe n’imyanda iva mu misarane kandi 80% by’amazi ava mu misarane yongera gusubira mu rusobe rw’ibinyabuzima atakorewe isuku.

Mukamunana asobanura ko gukaraba amazi meza n’isabune igihe umuntu avuye mu bwiherero ndetse na mbere yo gufata ifunguro, bigabanya ibyago byo kurwara indwara ziterwa n’umwanda ku kigero cya 47%, bityo ko Abanyarwanda bakwiriye kubizirikana.

Mu mpera za 2016, Minisiteri y’Ubuzima yavugaga ko hafi kimwe cya kabiri cy’indwara zakirwa kwa muganga zituruka ku isuku nke. Izo zirimo impiswi, inzoka zo mu nda, igituntu, indwara zo mu kanwa, iz’uruhu na malariya.

OMS itangaza ko 10% by’abatuye isi batunzwe n’ibiribwa biba byuhiwe hakoreshejwe amazi y’umwanda, aho abantu barenga ibihumbi 280 bapfa bishwe n’impiswi ziwuturukaho.

Muri Mutarama uyu mwaka, OMS yatangaje ko miliyari 2.4 z’abaturage batagira uburyo buhagije bubafasha mu isuku kandi ko umwanda n’isuku nke biri mu bituma abana bagwingira, ku buryo hakenewe igikorwa mu kongera isuku.

Mu kubaka umusarane, umuntu asabwa kuwubaka neza akawutinda ku buryo umwanda utatera indwara

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza