Kwamamaza

Akamaro ka ’infographics’ mu kuryoshya inkuru zagakwiye kuba zirurira abazisoma

Yanditswe kuya 30-11-2016 saa 13:15' na Mukaneza M.Ange


Ikigo cy’Igihugu cy’Ibarurishamibare (NISR), cyagaragaje ko gukora inkuru hifashishijwe ibishushanyo (Infographics) cyane cyane izirimo ibyerekeranye n’imibare bituma irushaho kumvikana no kuryohera abayisoma cyangwa abayireba.

Ibi byagaragajwe ku itariki 29 Ugushyingo 2016, ubwo abanyamakuru bahabwaga amahugurwa ku gusesengura no gutangaza amakuru ashingiye ku ibarurishamibare yateguwe n’Inama Nkuru y’Itangazamakuru (MHC) ifatanyije na NISR ku nkunga y’Ishami ry’Umuryango w’Abibumbye rishinzwe iterambere (UNDP).

Muhayiteto Ruben, Umukozi mu ishami rishinzwe gusakaza ubushakashatsi muri NISR yavuze ko gukoresha ‘Infographics’ mu nkuru zirimo imibare bituma umuntu arushaho gusobanukirwa kandi ibyo asoma ntibimurambire.

Ati” Niba uri gukora inkuru y’ubukungu ukaba udashyiramo ibarurishamibare iyo nkuru koko isobanutse gute? Ntabwo iyo nkuru iryoshye, nta nubwo ifasha abantu kuko idafite ibimenyetso. Kora inkuru rero kugira ngo ifashe abantu ushyiremo ‘Infographics.’”

Nyirimanzi Jean Claude na we muri NISR yasobanuye ko ibarurishamibare ari ingenzi cyane kuko ryifashishwa mu gufata ibyemezo bitandukanye birebana na gahunda y’iterambere ry’igihugu, bityo bikaba ari ngombwa ko itangazamakuru riyitangaza kugira ngo abayikeneye bayimenye.

Bamwe mu banyamakuru bitabiriye aya mahugurwa bavuze ko bigoranye gutangaza amakuru yuzuyemo imibare kuko usanga uretse kuba nabo ubwabo harimo ababa batayumva hari n’abanyarwanda badahita bayisobanukirwa.

Abandi barimo Muragijemariya Juventine ukorera City Radio bo berekanye ko hari n’abayobozi b’ibigo runaka usaba amakuru ariko ugasanga ibyerekeye imibare babikomeyeho.

Ati “Ugirana ikiganiro n’umuyobozi w’akarere runaka wamubaza imibare akarya indimi, akakohereza nko ku mukozi na we bikaba mu gicuku. Urumva wowe uri jyewe wagira ute? Birakwiye ko aya mahugurwa yanagenerwa n’izindi nzego kuko ahanini ari zo ziduha amakuru dutangaza.”

Umunyamabanga Nshingwabikorwa w’Inama Nkuru y’Itangazamakuru, Peacemaker Mbungiramihigo yavuze ko impamvu y’aya mahugurwa ari ugufasha abanyamakuru kunguka ubumenyi butuma barushaho gukora inkuru zifite ireme kandi zirekana aho u Rwanda rugeze hakoreshejwe imibare.

Ati” Ntibivugwa mu magambo gusa, bishingirwa ku bipimo, ku mibare. Ni yo mpamvu bisaba ubumenyi bwisumbuye ubwo abantu basanzwe bafite; Abanyamakuru na bo basabwa kugira ubumenyi buhagije kugira ngo batangaze inkuru zifite ireme.”

Uretse aya mahugurwa bahawe, aba banyamakuru bagera kuri 30 bazoherezwa mu turere 12 tw’igihugu aho bazakora inkuru zitandukanye zizaba zishingiye ku ibarurishamibare babifashijwemo n’abakozi ba NISR na MHC.

Urugero rwa Infographics: Ibyagezweho mu myaka 6 ishize ya manda ebyiri za Perezida Paul Kagame

Urugero rwa 'Infographics' ku byo u Rwanda rwagezeho kuva 2010 kugeza uyu munsi
Abanyamakuru bahawe ubumenyi mu gusesengura no gutangaza inkuru zishingiye ku ibarurishamibare

[email protected]


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Sunday 4 Ukuboza 2016
Copyright © 2009 -2014 - IGIHE Ltd - All Rights Reserved