Gukunda igihugu, umuhate, icyizere: Urwibutso abadepite basigaranye kuri Ndahiro Logan

Yanditswe na Habimana James
Kuya 31 Ukwakira 2019 saa 03:19
Yasuwe :
0 0

Mu gitondo cyo kuri uyu wa Kane nibwo hasakaye inkuru y’incamugongo ko Depite Ndahiro Logan, wari umwe mu bagize inteko ishinga amategeko y’u Rwanda, yitabye Imana azize indwara ya Cancer yo mu maraso.

Ni urupfu rwashegeshe abo mu muryango we, abo bakoranye mu nzego zitandukanye by’umwihariko bagenzi be bari bamaranye umwaka mu mutwe w’abadepite, bemeza ko abanyarwanda bakwiye kumwigiraho ubutwari bwamuranze kugeza ku munota wa nyuma.

Ndahiro yagiye kwivuriza mu Buhinde kabiri ariko yaguye mu bitaro byitiriwe Umwami Faisal.

Rtd Capt Ndahiro Logan ni umwe mu barwanye urugamba rwo kubohora igihugu akaba yarananditse igitabo kivuga ku mateka yarwo yise ‘Inzira y’inzitane yo kwibohora kw’abanyarwanda’.

Abadepite bakoranye umunsi ku munsi na Ndahiro, babwiye IGIHE uko bari bamuzi ndetse n’icyo Abanyarwanda bakwiye kumwigiraho.

Depite Rwaka Pierre Claver yavuze ko yamenyanye na Ndahiro kuva kera agikorera muri Minisiteri y’Ubutegetsi bw’Igihugu, Minaloc. Yavuze ko yari umugabo usabana kandi uganira, akaba yari umuntu uzi amateka y’ikinyarwanda, ibi bikaba biri mu byo banakundaga kuganira.

Yagize ati “Nyuma twaje no guhurira mu Muryango wa FPR-Inkotanyi, njye nari umudepite we ataraza, gusa na mbere tumaze kumenya ko arwaye twaramusuye i Kibagabaga aho yari atuye, atubwira ko arimo kwandika igitabo cy’urugamba nk’umuntu warubayemo mu kubohora igihugu”.

“Amaze kwandika iki gitabo twagiye tumufasha kukimenyakanisha no kukiganiriza abandi ngo bamenye amateka y’igihugu cyacu, nyuma aje mu Nteko arwaye wabonaga nta mbaraga nyinshi afite gusa ukabona agira ubushake n’imbaraga mu kazi, agashaka gukora kandi ubona ko arwaye.”

Depite Rwaka avuga ko abantu bakwiye kumwigiraho gukunda igihugu, kuko uyu mugabo mu buzima bwe yumvaga agomba kukirata akacyandika kandi akakivuga ibigwi byacyo.

Visi Perezida w’Inteko ishinga amategeko, Umutwe w’Abadepite, ushinzwe Imari n’Abakozi Sheikh Musa Fazil Harerimana, yagaragaje ko Ndahiro yari umuntu usoma cyane akaba yarabonye n’umwanya wo kwandika.

Ati “Urabizi ko iki ari ikintu muri rusange tunengwamo nk’abanyarwanda. Ikindi tumwibukiraho ni uko ubwo yari akiri mu rubyiruko yagiye mu gisirikare agamije kuza mu Rwanda nk’uko ruri uyu munsi, icyo ni ikintu gikomeye gituma yaratekerezaga neza no mu kazi ke, kuba ubwo yari akiri mu rubyiruko yaravuze ati ngomba gutabarira u Rwanda napfa nkarupfira ariko naba muzima nkarukorera, n’iyo abonye akazi agakora neza cyane.”

Depite Harerimana avuga ko Ndahiro yari umuntu udacikwa n’akantu gato mu kubaka igihugu cye kuko no mu burwayi bwe wabonaga akemura ibibazo kugira ngo bibone umurongo.

Ati “By’umwihariko njye ndamuzi kuko yari mu nama y’ubuyobozi y’Urwego rw’Igihugu rushinzwe amagereza mu Rwanda, yari mu nama yayo ahagarariye Minisiteri y’ubutegetsi bw’igihugu, ibyo mbabwira rero ndamuzi rwose niko yari ameze, yahoraga avuga ati igihugu kiratera imbere gute.”

Kimwe n’abandi bose bamenye Ndahiro, bahamya ko yari umuntu ucisha make ariko ku gihugu cye ntacishe make, kuko nta wakivugaga nabi amwumva.

Depite Mutesi Anitha na we wakoranye na Ndahiro, avuga ko ikintu yari amuziho cyane yari umuntu udasanzwe kuko yagiraga umwete mu bintu byose, ko niyo yabaga arwaye atashakaga kubikwereka ahubwo yumvaga yajya mu kazi.

Ati “Ndibuka ko hari igihe wabonaga afite intege nke ariko ukabona we adashaka kubigaragaza, wasangaga afite ubushake ko yakomeza agakora akazi. Twajyaga kumusura mu bitaro inshuro nyinshi ariko ukabona ari umuntu ufite ishyaka kandi ukunda igihugu cye.”

Depite Mutesi avuga ko ikintu abona abanyarwanda bamwigiraho ari ‘ugukunda igihugu, ukurikije ukuntu yitanze mu bihe byose, igitabo yanditse ku mateka y’urugamba n’uburyo abantu barwanirira igihugu cyabo’.

Depite Uwamariya Odette yihanganishije umuryango wa Ndahiro uri mu bihe bikomeye n’abanyarwanda muri rusange, avuga ko by’umwihariko yagize amahirwe yo gukorana na Ndahiro atari gusa guhura nk’abadepite, ko banakoranye muri Minisiteri y’ubutegetsi bw’igihugu [Uwamariya] ari Umunyamabanga uhoraho, we [Ndahiro] ari umuyobozi mu mushinga wari ushamikiye muri Minaloc.

Yagize ati “Yari umuntu twishimiraga gukorana na we kandi warangwaga no kugira umuhate mu kazi n’igihe yari amaze mu Nteko arwaye tukabibona, wabonaga we adukomeza, yahoranaga icyizere cyo gukira, yaratubwiraga ati nzivuza, akatubaza ati imirimo y’Inteko igeze he ndetse akavuga ko ari hafi gukira akagaruka mu kazi.”

Uwamariya akomeza agira ati “Ni umuntu waturemaga umutima cyane ku buryo niyo wabonaga bikomeye ukajya kumusura mu bitaro, wowe wabonaga arwaye arembye ariko ugataha wumva ukomeye kubera ko yahoranaga icyizere, yari umuntu w’intwari, byatubabaje kuba yitabye Imana ariko na none twishimira ibyo yashoboye gukora mu gihe Imana yamuhaye kubaho muri iki gihugu.”

Capt. Ndahiro Logan yavukiye mu Murenge wa Nyagatare mu Karere ka Nyagatare mu 1951, yize amashuri ye muri Uganda nyuma akomereza muri Leta Zunze Ubumwe za Amerika, aho yakuye impamyabumenyi y’icyiciro cya gatatu cya kaminuza mu by’ubuzima.

Ni umwe mu basirikare bagize uruhare mu rugamba rwo kubohora igihugu, aza gusezererwa mu ngabo afite ipeti rya Captaine. Yakoze ibikorwa bitandukanye mu rugendo rw’iterambere ry’u Rwanda, by’umwihariko anandika igitabo kivuga ku rugamba rwo kwibohora cyitwa “Inzira y’inzitane yo kwibohora kw’abanyarwanda”.

Rtd Capt Ndahiro Logan yinjiye urugamba rwo kubohora igihugu afite imyaka 39, yigeze kubwira IGIHE ko impamvu yanditse iki gitabo ari ukugira ngo urubyiruko ndetse n’abandi bantu batandukanye basobanukirwe n’ibyaruranze.

Ndahiro yari asigaye ari umwe mu badepite bagize Inteko Ishinga Amategeko y’u Rwanda muri manda izarangira mu 2023, aho ariwe wari mukuru mu myaka muri bose. Yari ahagarariye Umuryango wa FPR Inkotanyi abarizwamo.

Mu mirimo yakoze harimo ko kuva mu 1994 kugera mu 2001, yari umukozi wa Minisiteri y’Ubuzima ushinzwe ubuzima bwo mu mutwe, 2002 – 2003 akorera Umuryango Mpuzamahanga ushinzwe ubutabazi (International Rescue Committee) aho ariwe wari uhagarariye ku rwego rw’igihugu ibikorwa byo kurwanya agakoko ka Sida.

Yakoze kandi mu yindi miryango itegamiye kuri leta harimo nka Global Fund no mu mushinga wari ugamije kwegereza ubuyobozi abaturage.

Depite Musa Fazil Harerimana yavuze ko Ndahiroasigiye abanyarwanda amateka yo gukunda igihugu cyabo ariko no gukunda gusoma no kwandika
Depite Rwaka avuga ko abantu bakwiye kumwigiraho gukunda
Depite Uwamariya Odette yavuze ko Ndahiro yahoraga ababaza aho imirimo y'Inteko igeze no mu gihe babonaga ko arembye cyane
Depite Mutesi Anitha yavuze ko Ndahiro Logan yaranzwe no kwihangana no mu gihe yari arwaye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza