Gukoreshwa mu cyayi n’inda zitateguwe ku isonga mu bibangamira abana b’i Nyaruguru

Yanditswe na Prudence Kwizera
Kuya 26 Ukuboza 2017 saa 08:00
Yasuwe :
0 0

Ubuyobozi bw’Akarere ka Nyaruguru, abafatanyabikorwa n’abaturage bahuriza ku bintu bitatu biza ku isonga mu bibangamira uburenganizira bw’abana bo muri ako karere, bakavuga ko bahagurukiye kubirwanya bivuye inyuma.

Icya mbere bahurizaho ni uko abana bakiri bato bakoreshwa mu mirima y’icyayi ntibajye kwiga, icya kabiri kikaba abangavu baterwa inda zitateguwe naho icya gatatu ni abana batiga birirwa bazerera mu muhanda cyangwa bajyanwa gukoreshwa mu ngo.

Ibi byose byavuye mu bitekerezo byatanzwe n’abaturage, abayobozi n’abafatanyabikorwa ku wa 20 Ukuboza 2017, ubwo muri ako karere habaga igikorwa cyo gusuzumira hamwe ibibazo abana bahura nabyo.

Umuryango witwa Children’s Voice Today umaze imyaka isaga ibiri mu bikorwa bijyanye no kwita ku burenganzira bw’umwana muri ako karere, wahurije hamwe ababyeyi, abarezi, abana abashinzwe umutekano n’abayobozi bafite umwana mu nshingano zabo kugira ngo baganire ku bibazo bikibangamira uburenganzira bw’umwana.

Muri ibyo biganiro byabereye mu Murenge wa Kibeho, hagaragajwe ko hakiri ibibazo bitatu by’ingutu bibangamira uburenganzira bw’umwana biyemeza ubufatanye mu kubikumira.

Umuhuzabikorwa wa Children’s Voice Today, Jean Marie Vianney Gakwaya, yavuze ko bafite intego yo gukuraho inzitizi zose zituma abana batiga cyangwa babaho nabi mu buzima budafite ejo hazaza heza.

Gakwaya ati “Icya mbere twasanze kiza ku isonga mu bibangamira uburenganzira bw’abana muri aka karere ni abagikoreshwa imirimo ivunanye, aho by’umwihariko bakoreshwa mu cyayi kuko inaha kihahingwa ku bwinshi, ikindi ni abakobwa baterwa inda zitateguwe bakiri bato bakava mu ishuri, ndetse hari n’ababyeyi batita ku bana babo bigatuma bava mu ishuri bakajya kuzerera mu muhanda cyangwa kuba abakozi bo mu ngo”.

Hari ababyeyi bo mu Karere ka Nyaruguru bavuga ko hakiri abana bakoreshwa imirimo ivunanye, abakobwa baterwa inda zitateguwe n’abana bazerera mu muhanda ndetse n’abakoreshwa mu ngo kandi bagombye kuba bari ku ishuri bagasaba ko byakwitabwaho by’umwihariko.

Nyirankuriza Lawrence wo mu Murenge wa Kibeho ati “Abana tubona mu mirimo ivunanye ni abakoreshwa mu gusarura icyayi ndetse n’abahinduwe abakozi bo mu ngo kandi bakiri bato bagombye kuba biga, naho ikibazo cy’abana b’abakobwa baterwa inda kirahangayikishije kuko nta musozi utabonaho umukobwa wabyaye. Twifuza ko twese twafatanya kurwanya ibyo byose bibangamira abana bato”.

Umuyobozi ushinzwe uburinganire n’iterambere ry’umuryango mu Karere ka Nyaruguru, Maureen Murebwayire, yavuze ko ku bufatanye n’abafatanyabikorwa , abaturage n’inzego z’umutekano biyemeje kurwanya no gukumira ikintu cyose gishobora kubangamira uburenganira bw’umwana.

Murebwayire ati “Icya mbere dukora ni uguhugura abana bakamenya uburenganzira bwabo, tukigisha n’ababyeyi ko bagomba kubahiriza inshingano zabo zo kurera. Ubu twashyizeho uburyo bwo gukumira ko hari umwana wasubira gukora mu cyayi, kandi ubu twatangiye gufasha abakobwa babyariye iwabo ndetse no guhana abagabo babateye inda”.

Mu rwego rwo guhuriza abana hamwe no kubigisha uburenganzira bwabo ndetse no kubatoza kugira uruhare mu bibakorerwa, mu mirenge umunani umuryango Children’s Voice Today ukoreramo washyizeho amatsinda y’abana aho rimwe ribarizwamo abari hagati ya 50 na 120.

Akarere ka Nyaruguru ntikagaragaza umubare w’abana bazwi bakoreshwa imirimo ivunanye cyangwa ababyariye iwabo kuko itarakusanywa ariko mu Murenge wa Ruheru honyine haherutse kubarurwa abakobwa 282 batewe inda zitateguwe.

Usibye mu Karere ka Nyaruguru, Umuryango Children’s Voice Today usanzwe ukorana n’abana bo mu Turere twa Gatsibo na Bugesera, umushinga ukora ku bufatanye na Plan International Rwanda.

Abana bo mu Karere ka Nyaruguru bigishwa guharanira uburenganzira bwabo kugira ngo bazagire ejo hazaza heza
Abana, ababyeyi n'abayobozi bahurijwe hamwe bungurana ibitekerezo ku gukumira ibibangamira uburenganzira bw'umwana
Abayobozi, ababyeyi n'abafatanyabikorwa mu Karere ka Nyaruguru biyemeje gushyira ingufu mu gukumira ikintu cyose gishobora kubangamira uburenganzira bw'umwana

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza