Kwamamaza

Gukoresha EBM bigiye kugirwa itegeko ku bacuruzi bose

Yanditswe kuya 10-10-2016 saa 09:28' na Rabbi Malo Umucunguzi


Minisiteri y’Imari n’Igenamigambi iri kunoza umushinga w’itegeko rizavugurura irisanzwe rigenga imisoro, aho abacuruzi bose bazasabwa gukoresha utumashini tw’ikoranabuhanga dutanga inyemezabwishyu, Electonic Billing Machine (EBM).

EBM mu Rwanda zisanzwe zikoreshwa n’abacuruzi bishyura umusoro ku nyongeragaciro, TVA, wishyurwa n’umucuruzi winjiza guhera kuri miliyoni 20 Frw ku mwaka cyangwa miliyoni 5 Frw ku gihembwe.

Gusa Ikigo cy’Igihugu gishinzwe Imisoro n’Amahoro, RRA, kivuga ko bigorana kumenya niba umucuruzi yarageze mu cyiciro cyo kwishyura TVA.

Umuhuzabikorwa w’Umushinga wa EBM muri RRA, Emmy Mbera, yabwiye The New Times ko gukoresha utu tumashini dutanga inyemezabwishyu bigiye kugirwa itegeko ku bucuruzi bwose.

Ati “Mu gukurikirana no gushyira mu bikorwa ikoreshwa rya EBM, byagaragaye ko harimo guhindagura ibiciro n’amahirwe atangana mu guhangana ku isoko hagati y’abishyura TVA n’abatarageza igihe, bigatuma hari abadakoresha EBM neza kugira ngo ibikorwa byabo bidahungabana. Niyo mpamvu guverinoma y’u Rwanda ishaka ko abacuruzi bose bakoresha EBM, baba batanga TVA cyangwa batayitanga.’’

Mbera yavuze ko nubwo hari abacuruzi badakoresha EBM bitewe n’ubucuruzi bwabo, kuba batishyura TVA bitavuze ko batishyura umusoro, ahubwo hari indi batanga nk’umusoro ku nyungu.

Ati “Muri ubwo buryo, RRA izaba ibasha kugenzura inyungu ya buri bucuruzi. Umunsi itegeko ryasohotse, RRA izafasha abacuruzi bose gukoresha EBM.’’

EBM zatangiye gukoreshwa mu Rwanda mu 2013, zisimbura inyemezabwishyu zandikishwaga intoki ku mpapuro, zafatwaga nk’izishobora kwangirika byoroshye cyangwa zigahimbwa, bikaba byatuma hatangwa umusoro udahwanye n’ubucuruzi bwakozwe.

Ubwo EBM zatangiraga gukoreshwa, RRA ivuga ko mu 2014 zongeye 6.5% ku iyishyurwa rya TVA, mu gihe mu 2015 TVA yishyuwe ku bucuruzi bwamenyekanishijwe yiyongereyeho 20%, naho hagati ya Mutarama na Kanama 2016 yari imaze kwiyongeraho 12% ugereranyije na 2015.

RRA iteganya ko mu mwaka w’ingengo y’imari wa 2016/17 izinjiza miliyari 1 071 Frw, harimo TVA ya miliyari 346 Frw ingana na 33% by’umusoro wose. Za gasutamo zizinjiza miliyari 117 Frw, umusoro w’imbere mu gihugu ugere kuri miliyari 229 Frw, zingana na 22% by’umusoro wose uteganyijwe.

Byitezwe ko gutanga EBM ku bacuruzi bose bizatuma ku isoko hagera imashini 80 000 mu myaka itanu iri imbere, zivuye ku 14,000 zihari uyu munsi.

Umuhuzabikorwa w’Umushinga wa EBM muri RRA, Emmy Mbera

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Saturday 10 Ukuboza 2016
Copyright © 2009 -2014 - IGIHE Ltd - All Rights Reserved