Guhuza Minisiteri y’Ubucuruzi na MINEAC ni ukureba kure-Minisitiri Kanimba

Yanditswe na Kanamugire Emmanuel
Kuya 7 Ukwakira 2016 saa 10:50
Yasuwe : XX
0

Minisitiri w’Ubucuruzi n’Inganda n’Ibikorwa by’Umuryango wa Afurika y’Uburasirazuba, François Kanimba, yavuze ko guhuza Minisiteri y’Ubucuruzi n’Inganda (MINICOM) n’iyari ishinzwe Ibikorwa by’Umuryango wa Afurika y’Uburasirazuba (MINEAC),ariko ukureba kure kuko bizatuma hakorwa byinshi kandi mu buryo budahenze.

Kuwa 04 Ukwakira nibwo byatangajwe ko izo Minisiteri zahujwe, ndetse Amb. Rugwabiza wayoboraga MINEAC agirwa intumwa y’u Rwanda mu Muryango w’Abibumbye i New York.

Muri ayo mavugurura kandi Umunyamabanga Uhoraho muri Minisiteri y’Ubucuruzi n’inganda, Emmanuel Hategeka, yagizwe Umuhuzabikorwa w’Imishinga yo mu muhora wa Ruguru.

Mu ihererekanyabubasha ryabaye kuri uyu wa Gatanu, Minisitiri Kanimba yashimye Perezida Kagame wamuhaye izi nshingano nshya, avuga ko yiteguye gukora ibishoboka byose ku buryo ibyo u Rwanda rwohereza mu bihugu bigize EAC n’agaciro kabyo byakwiyongera.

Ati “Guhuza MINEAC na MINICOM, ni uko uyu muryango wa EAC, urebye inshingano n’intego zayo ari ugushyiraho akarere kamwe mu rwego rw’ubucuruzi, mu rwego rwo guhahirana, no guhuza ishoramari. Hari n’izindi nshingano z’umutekano, amashuri, ariko ibyinshi ni ukubaka isoko rimwe.”

“Ariko urebye uko u Rwanda rwakoraga, izi minisiteri zombi twakoranaga, ku buryo kuzishyira hamwe ntabwo bitangaje, harimo kureba kure mu byerekeranye n’uburyo akazi gashobora kugenda neza ndetse ku buryo budahenze cyane.”

Ambasaderi Rugwabiza na we yashimiye Perezida Kagame wamuhaye kuyobora MINEAC mu myaka ibiri ishize, avuga ko yatanze umusaruro mu nzego zinyuranye.

Yakomeje agira ati “Iri huza rya minisiteri rifite intego. Guhuza ubucuruzi, inganda n’ibikorwa bya EAC ni ngombwa kuko mwese mwakoreraga hamwe muzi ihuriro riri hagati y’izi Minisiteri ebyiri. Ubu noneho zombi zishyizwe hamwe.’’

‘‘Byose muzaba mubikorera hamwe, haba mu koroshya ubucuruzi n’ibindi byose biri mu kugera ku isoko rusange nk’ibintu dushyize imbere uyu munsi. Mufite umwanya wo kurenza ku byo twakoze, mu kubyaza umusaruro iri soko ry’akarere.’’

Ambasaderi Rugwabiza yavuze ko iyi Minisiteri nshya igiye gufasha mu kongera ishoramari hashingiwe ku kuba u Rwanda ruri muri EAC, kuko byagaragaye ko isoko rikomeye u Rwanda rufite ari irya EAC.

Ku bijyanye n’abakozi bo muri Minisiteri yayoboraga, Amb. Rugwabiza yavuze ko guhuza izi Minisiteri bitagamije ko iba Minisiteri imwe ifite abakozi benshi, ahubwo hagamijwe kuzamura umusaruro igihugu kibona.

Ati “Bamwe muri bo barashyirwa mu zindi nzego nk’uko itegeko ribigena, kuko haba hagomba kujyaho imiterere y’ikigo gishya. Nta mpungenge zikwiye kubaho ndetse na Minisitiri w’abakozi amaze iminsi abivuga. Icyo ntabwo ari ikibazo dufite, ni abakozi ba leta, baracyafite akazi. Igishobora guhinduka ni imirimo bakoraga kandi byose tugamije kongera umusaruro.”

Ubwo yakiraga indahiro z’abayobozi bashya muri guverinoma, kuri uyu wa Kane tariki 06 Ukwakira, Perezida Kagame yavuze ko nubwo Rugwabiza ari ambasaderi azaguma ari umwe mu bagize inama y’abaminisitiri (cabinet) cyane ko ahagarariye u Rwanda mu bihugu byinshi.

Ati “Igihe rero azaba yaje hano yibwira ko aje mu kiruhuko, agakubitana n’inama y’abaminisitiri azajya ayicaramo atubwire iby’aho avuye, tumubwire iby’aho aje.”

Ambasaderi Valentine Rugwabiza (iburyo) na Minisitiri Kanimba Francois
Umuhango w'Ihererekanyabubasha hagati ya Minisitiri Kanimba na Amb. Rugwabiza wari witabiriwe n'abantu benshi
Minisitiri Kanimba na Amb. Rugwabiza mu ihererekanyabubasha

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza