Green Party igiye kwitabaza inguzanyo ya Banki mu matora ya Perezida wa Repubulika

Yanditswe na IGIHE
Kuya 15 Werurwe 2017 saa 09:58
Yasuwe :
0 0

Ishyaka ritavuga rumwe n’ubutegetsi mu Rwanda, Green Party, ryatangaje ko riteganya kwaka inguzanyo muri banki, kugirango ribone ingengo y’imari rizakoresha mu bikorwa byo kwiyamamaza mu matora ya Perezida wa Repubulika ateganyijwe muri Kanama uyu mwaka.

Iri shyaka ryamaze kwemeza ko rizatanga Umuyobozi waryo, Dr. Frank Habineza, nk’umukandida muri ayo matora, rirateganya gukoresha miliyari 1.6 y’amafaranga y’u Rwanda mu bikorwa byo kwiyamamaza no kwitegura amatora.

Mu kiganiro Habineza yagiranye na The East African, yatangaje ko muri uku kwezi inteko rusange y’ishyaka izafata icyemezo ku kwitabaza banki mu bikorwa by’amatora birimo no kwiyamamaza hirya no hino mu gihugu.

Yagize ati “Turacyagerageza kureba amafaranga tuzakura mu barwanashyaka bacu, nitutabona ahagije, turateganya kwaka inguzanyo muri banki, nubwo tutarabiganiraho nk’ishyaka. Kuguza ni ibintu bishoboka kuri twe kuko icyo banki zose zidusaba ni umubare w’abarwanashyaka bacu n’imisanzu batanga. Dufite abarenga 200 000. Tuzabikora nkuko ibigo by’amashuri byaka inguzanyo bigendeye ku bwishyu bw’abanyeshuri.”

Ibikorwa byo kwiyamamaza mu matora ya Perezida wa Repubulika byagenewe ibyumweru bitatu aho bizatangira kuwa 14 Nyakanga kugeza kuwa 3 Kanama 2017.

Habineza avuga ko mu byo bamaze kubarura bazakenera, icyo bizeye ari ugucungirwa umutekano nkuko babyemerewe na Polisi y’igihugu. Ku rundi ruhande ariko ntagaragaza ingano y’inguzanyo bazaka nubwo yemeza ko ku ruhande rwabo ayo bamaze gukusanya mu barwanashyaka ari make cyane.

Green Party ntabwo ariryo shyaka ryonyine ryaba ryatse inguzanyo yo kwiyamamaza kuko no mu 2010 ishyaka PL (Parti Liberal) ryayisabye n’ubu rikaba rikirwana no kuyishyura.

Amatora ya Perezida wa Repubulika y’u Rwanda ateganyijwe ku itariki 03 Kanama 2017 ku banyarwanda baba mu mahanga na tariki 04 Kanama 2017 ku baba mu gihugu.

Amategeko ateganya iki?

Itegeko rigenga imitwe ya politiki ntabwo riyemerera gutangaza mu ruhame ingano y’amafaranga izakoresha. Gusa isabwa gutanga raporo ngarukamwaka y’imikoreshereze n’imiterere y’ubukungu bwabo mu rwego rw’igihugu rw’imiyoborere (RGB) no mu rwego rw’Umuvunyi.

Babujijwe kandi kwakira inkunga izo ari zo zose ziturutse mu banyamahanga, mu madini no mu miryango runaka yaba iyegamiye kuri leta n’itayegamiyeho.

Imitwe ya politiki ibeshwaho n’impano n’imisanzu by’abarwanashyaka bayo. Icyakora iyo impano igera kuri miliyoni imwe y’amafaranga y’u Rwanda, itegetswe kubimenyesha muri RGB.

Iyo amatora arangiye, umutwe wa politiki witabiriye ibikorwa byo kwiyamamaza n’abakandida ku giti cyabo, basubizwa ingengo y’imari bakoresheje muri ayo matora iyo bagejeje ku majwi 5%. Mu matora aheruka ishyaka PSD na RPF niyo yayasubijwe kuko abakandida bayo babashije kurenza ariya majwi akenewe.

Guverinoma y’u Rwanda yateganyije miliyari 5.5 mu bikorwa by’amatora y’uyu mwaka.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza