GIZ yashyikirije WDA ibitabo bizatuma abiga imyuga bahatana ku masoko mpuzamahanga

Yanditswe na IGIHE
Kuya 13 Werurwe 2018 saa 09:36
Yasuwe :
2 8

Umushinga w’Abadage wita ku iterambere (GIZ) washyikirije Ikigo cy’igihugu gishinzwe guteza imbere imyuga n’ubumenyingiro (WDA), ibitabo byitezweho kuzamura ireme ry’amasomo ahabwa abiga imyuga mu Rwanda, bakabasha gukora ibikoresho binoze bishobora gucuruzwa ku masoko mpuzamahanga.

Impande zombi zifitanye amasezerano akubiyemo ibitabo 4000 ariko ku ikubitiro GIZ yatanze ibigera ku 1200, ku wa Kabiri tariki 13 Werurwe 2018.

Umuyobozi wa WDA, Jerome Gasana, yatangaje ko ibi bitabo ari ingenzi kuko u Budage ari kimwe mu bihugu u Rwanda rwiyemeje kureberaho uko bigisha imyuga. Ashimangira ko kuba rero habonetse ibitabo byerekana uko wahera hasi ugakora ikintu kinoze bizatuma abiga imyuga bahatana ku masoko yo mu mahanaga.

Yagize ati “Bigiye kuza kudufasha mu byerekeye ireme ry’ibyo twigisha no kuba dufite ibitabo bishyashya bijyanye n’ikoranabuhanga riri ku isoko ry’umurimo. Niba ugiye kubaza intebe, ubaze intebe wumva ko wayigurisha ku isoko ryo mu karere, wayohereza hirya ya Afurika.”

Yakomeje avuga ko kubigeraho bizanyura mu kwigira ku bunararibonye bw’Abadage bafite mu bijyanye no kunoza ibikoresho cyane cyane iby’imbaho, aho bahera ku kugira ubumenyi yaba mu gutera igiti, kukibungabunga, kukibaza, kucyumisha, kugikoramo ibyo wifuza kandi kikaramba.

Umuyobozi mu bijyanye n’ubujyanama mu bumenyingiro mu bijyanye no guhanga imirimo muri GIZ, Ellen Khalinoski, yavuze ko ibitabo biba bigomba kuvugururwa kugira ngo ibyigishwa bijyanishwe n’igihe.

Yagize ati “Ibitabo ni ingenzi mu gutegura amasomo kw’abarimu, bakamenya icyo bari bujyane mu ishuri, ni ibiki nkwiye kumenya ngo mbihe abanyeshuri. Ibitabo ni ahantu ho kureberaho.”

Ibitabo WDA yahise ibishyikiriza ibigo by’amashuri y’imyuga n’ubumenyingiro. Ni icyiciro cya gatatu kuko hashize amezi atatu itanze ibitabo bigera hafi ku 6000.

Umuyobozi wa Mpanda TVET School, Ndangamira Gilbert, yavuze ko ubusanzwe bari bafite ibitabo bike bitajyanye n’integanyanyigisho nshya, yemeza ko ibyo bahawe bizabafasha kuyishyira mu bikorwa abanyeshuri bakarangiza kwiga bashobora kunoza ibyo bakora.

Yagize ati “Tudakoze ibyiza abo hanze badutwara isoko. Turashaka gukora ku buryo duhangana ku isoko n’ibyo hanze, tukarusha no hanze gukora ku buryo n’ibyacu dukora mu gihugu tubijyana ahubwo mu mahanga.”

Umuyobozi wungirije muri Nyamirama TVET, ushinzwe amasomo, Mudahogora Germaine, yashimangiye ko hari byinshi bigiye gukemuka kuko bagorwaga no kubona aho bakura amasomo yo guha abanyeshuri.

GIZ yashyikirije WDA ibitabo bizafasha kuzamura ireme ry'uburezi mu biga imyuga

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza