Kwamamaza

Gisozi: Irondo rimaze kugarurira abaturage icyizere cy’umutekano uhamye

Yanditswe kuya 10-10-2016 saa 10:27' na IGIHE


Umutekano u Rwanda rufite ni imwe mu nkingi zikomeye iterambere ry’igihugu ryubakiyeho ndetse n’imibereho myiza abarutuye bafite uyu munsi.

Abanyarwanda barenze intera yo gutegereza ingabo na polisi mu kwicungira umutekano w’imbere mu gihugu, barema umuco wo kwiyubakamo ubushobozi bwo kuwusigasira.

Mu bice byose by’igihugu kuva ku mudugudu usanga hari abantu bashyizweho ngo bayobore irondo nka kimwe mu bigize uburyo bwinshi bwo gukumira no kurwanya ibyaha.

Umuhuzabikorwa w’Irondo mu Murenge wa Gisozi, Habimana John yatangaje ko buri mugoroba afatanya na bagenzi be gucunga umutekano, ndetse aterwa imbaraga n’icyizere abaturage bamugirira n’uko yifuza ko abamukomokaho bazabaho mu gihugu gitekanye.

Habimana avuga ko iyo bari mu bikorwa byo gupanga irondo bakurikiza amakuru baba bahawe.

Yagize ati “ Tugaragaza ahakenewe abanyerondo tukaboherezayo. Duhana amakuru mu buryo bwinshi ariko ahanini dukoresha telefoni. Mu kazi kacu tugerageza gukorana na Polisi kuko hari aho tujya duhura n’ibibazo birenze ubushobozi bwacu kandi bisaba ubundi bumenyi.”

Umunyamabanga Nshingwabikorwa w’Umurenge wa Gisozi, Théophile Niragire,ashimangira ko irondo ryatumye abaturage bumva barindiwe umutekano.

Yagize ati “Mbere, Gisozi yakunze kurangwa n’ibikorwa byo kumena inzu, kuba indiri y’abanywa ibiyobyabwenge , ariko aho irondo ryatangiriye ,ibyo byose byarahagaze. Kubera akamaro karyo, abaturage bishimira gutanga imisanzu yabo kugira ngo rigire ingufu.”

Yakomeje avuga ko ibyerekeye umutekano bitegurwa mu buryo burambye ku bufatanye n’abafatanyabikorwa.

Ati “Gisozi ntikiri indiri y’abakora ibyaha kuko ahantu hose hari irondo, ikiyongeraho, abaturage bose biyumvamo inshingano yo kwicungira umutekano no kuba ijisho ry’umuturanyi.”

Polisi y’u Rwanda nk’urwego rwayoboye ubukangurambaga bwo kurwanya ibyaha ivuga ko irondo ari uburyo bw’ingirakamaro mu gukemura ibibazo by’umutekano kuva ku rwego rwo hasi mu baturage.

Umuyobozi wa Polisi mu karere ka Gasabo, Senior Superintendent of Police (SSP) Valence Muhabwa, avuga ko irondo ryagize akamaro, kuko ryongereye umubare w’abashinzwe umutekano mu baturage.

Yagize ati “Biciye mu bukangurambaga, ibyaha byaragabanutse cyane, n’amakuru ku byaha yariyongereye,..kwigisha biroroha iyo abaturage bumva uruhare rwabo n’umusanzu bakwiye gutanga. Mu bifatika irondo ryafashije mu gukumira ibyaha bitaraba , mu gufata ababikoze no gutabara ku gihe aho bikenewe.”

Uburyo ubukangurambaga bwo kurwanya ibyaha bwashyizwe mu bikorwa n’abaturage ni uburyo bwiza bwo kubikumira.

Umuyobozi w’Akarere ka Gasabo, Stephen Rwamurangwa atangaza ko irondo ryagize uruhare mu kurwanya ibyaha no kwiyumvamo umutekano.

Yagize ati “ Buri muntu wese utuye muri Gasabo, atanga umusanzu uri hagati ya 500 na 5000 bijyanye n’ubushobozi bwe; ni muri iyo misanzu akarere kabashije gushyiraho ibyuma ngenzuramashusho ahahurira imbaga n’ahiganje ibyaha , haguzwe imodoka z’irondo zikaba zoroshya ubutabazi bwihuse, hubatswe kandi inzu z’irondo muri hafi buri gace k’akarere.”

Izo nzu z’irondo n’ahagenzurirwa amashusho yafashwe, zikora amasaha 24, zafashije abaturage gutangira amakuru y’abanyabyaha ku gihe.

Yagize ati “Ibi byuma byafashije inzego zishinzwe umutekano n’irondo mu kugaragaza abagizi ba nabi, izi nzu kandi nizo zakira gutabaza kw’abaturage kandi zihurizwaho ibyafashwe, imodoka nazo zifasha no mu gucyura abasinzi bananiwe gutaha.”

Akarere ka Gasabo gafite abakora irondo bagera ku 2219 babihuguriwe, nibura abanyerondo 115 bagenzura ubuso bwa 8.2 km mu Murenge wa Gisozi.

Imodoka yifashishwa n'abanyerondo mu gucunga umutekano mu Murenge wa Gisozi

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Sunday 11 Ukuboza 2016
Copyright © 2009 -2014 - IGIHE Ltd - All Rights Reserved