Kwamamaza

Gisagara:Yageze iwabo asanga bamaze amezi ane bamushyinguye

Yanditswe kuya 13-08-2016 saa 10:21' na Thamimu Hakizimana


Umukobwa witwa Musabyimana Claudine ufite imyaka 19 yageze iwabo mu kagari ka Cyiri mu Murenge wa Gikonko mu Karere ka Gisagara, atungurwa no gusanga iwabo hari imva imaze amezi ane ishyinguwemo undi muntu bitaga ko ari we.

Ku wa Gatatu w’iki cyumweru tariki ya 10 Kanama 2016, nibwo Musabyimana wakoraga akazi ko mu rugo i Kigali, yasubiye iwabo agiye gushaka ibyangombwa, abamubonye batungurwa no kumubona ari muzima kandi bari bazi ko yapfuye.

Muri Mata uyu mwaka nibwo hamenyekanye inkuru y’uko Umukobwa witwa Claudine, wakoreraga mu murenge wa Nyakabanda mu mujyi wa Kigali, yapfuye nyuma yo kwitaba telefoni.

Ababyeyi ba Musabyimana barahuruye basanga uwapfuye asa neza n’umwana wabo baramutwara bajya kumushyigura, bararira barihanagura. Gusa icyateje urujijo ni uko baje kongera kumubona ari muzima, ibintu bisobanura ko uwo bashyinguye ashobora kuba atari uwabo.

Mu kiganiro na Tv1 Musabyimana, yavuze ko yaguye mu kantu ndetse akanababazwa no gusanga imva yitwa iye mu rugo iwabo kandi akiri muzima.

Yagize ati “ Nahageze umumotari ariwe uhangejeje badahari nsanga imva iraho, ntabyo nari nzi, umugore w’umuturanyi ni we wambajije ngo Claudine urazutse? Ndamubaza se njye nari narapfuye?”

Yongeyeho ko akimara kumubaza atyo, uwo muturanyi yahise yigendera kubera kumutinya.

Musabyimana yashenguwe no kuba yarasanze umurambo atazi aho waturutse ushyinguye iwabo ndetse ku musaraba handitseho amazina ye.

Ababyeyi be na bo bavuga ko batunguwe no kubona umwana wabo ngo kuko bari bamaze amezi agera kuri ane bazi ko yapfuye kuko bari baranamushyinguye.

Nyina yagize ati “ Batubwiye ko yapfuye ku tariki 8 Mata ngiye kumva numva ni umwana wacu kuko bavugaga ngo ni uwo mu kagari ka Cyiri natekereza ko koko yagiye nta rangamuntu nta na mituweli numva ari uwacu.”

Akomeza avuga ko bacyumva itangazo bahise bashakisha uko bashoboye ndetse banatanga ibyo bari bafite byose kugira ngo bajye kuzana umurambo i Kigali.

Yagize ati “ Nagezeyo ndawugaragura, barambaza ngo ese mukecuru urabona umwana ari uwawe?, ndagaragura mbona umurambo ari uwacu ku buryo ikimenyetso nabonye yari afite agakovu mu ivi barebye barakabona maze bawushyira mu isanduku turawuzana.”

Musaza we yagize ati “Hari ku tariki 8 Mata 2016 itangazo ryatambutse rivuga ko hari umwana wari uzwi ku izina rya Claudine wakoraga akazi ko mu rugo wagiye muri saloon kwisukisha akitaba telefone agahita apfa ndetse banavuga ko ari uwo mu kagari ka Cyiri.”

Kuba nta byangombwa uwapfuye yari afite bishobora kuba aribyo byatumye uwo muryango ushyingura umurambo utari uwabo kubera kuwitiranya.

Inkuru bifitanye isano:Nyarugenge:Amayobera ku rupfu rw’umukobwa bivugwa ko yitabye telefoni agahita apfa

Musabyimana Claudine wari umaze amezi ane bizwi ko yapfuye ari kumwe na nyina
Musaza we afashe umusaraba wanditseho Musabyimana Claudine

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Sunday 25 September 2016
Copyright © 2009 -2014 - IGIHE Ltd - All Rights Reserved