Kwamamaza

Gisagara: Umuryango wa Musabyimana wageze iwabo asanga yarashyinguwe uri mu gihirahiro

Yanditswe kuya 13-09-2016 saa 09:15' na Prudence Kwizera


Umuryango wa Claudine Musabyimana, uvuka mu Kagari ka Cyiri, Umurenge wa Gikonko, mu Karere ka Gisagaraga uvuga ko uri mu gihirahiro gikomeye, aho wibaza ikizakurikiraho nyuma yaho ushyinguye umuntu uzi ko ari umwana wabo, nyuma bakabona agarutse ari muzima.

Muri Mata 2016, ni bwo hamenyekanye inkuru y’uko Umukobwa witwa Musabyimana Claudine, wakoreraga mu Murenge wa Nyakabanda mu Mujyi wa Kigali, yapfuye nyuma yo kwitaba telefoni.

Ababyeyi ba Musabyimana bakimara kumva itangazo rirangisha umurambo w’uwitwa Claudine ukomoka mu kagari ka Cyiri, ngo baketse ko ari umwana wabo dore ko bari bamaze igihe batamubona. Byatumye bahurura bageze ku bitaro bya Kacyiru basanga uwapfuye asa neza n’umwana wabo baramutwara bajya kumushyigura.

Nyuma y’amezi agera kuri ane, tariki ya 10 Kanama 2016, ababyeyi ba Musabyimana ndetse n’abaturanyi babo, ngo bagiye kubona babona atungutse mu rugo, batungurwa no kumubona ari muzima kandi bari bazi ko yapfuye.

Ubwo IGIHE yasuraga umuryango wa Claudine Musabyimana kuri uyu wa 12 Nzeri 2016, nyina umubyara yavuze ko n’ubwo babanje gukeka ko uwo ugarutse atari umwana wabo, ngo kuri ubu bamaze kubona neza ko ari we bidashidikanywaho, ahubwo ko uwo bashyinguye bamwibeshyeho.

Françoise Dusabimana yagize ati “Umwana wanjye ni we, ntakuvuga ngo yaturutse ikuzimu, ni we rwose, ahubwo uwo twashyinguye ni we twibeshyeho kandi na nyira we ntaraboneka”.

Uyu mubyeyi avuga ko batwaye umurambo basa n’abashidikanya ariko ntibabitindaho kuko ibitaro byari byamaze kubishyuza ibihumbi 200 by’amafaranga y’u Rwanda kandi bamaze kuyatanga.

Uyu muryango uvuga ko uri mu gihirahiro

N’ubwo abagize umuryango wa Claudine Musabyimana bishimira ko bongeye kubona umwana wabo kandi bari bazi ko yapfuye, bavuga ko kuri ubu bafite ibibazo bibiri bibakomereye.

Ikibazo cya mbere ngo ni uko kugeza ubu iyo bagiye kongera kumwandikisha mu gitabo cy’irangamimerere, ubuyobozi bw’umurenge wabo bubabwira ko bisaba kubaza mu nzego zo hejuru, bakibaza amaherezo yabyo bakayabura.

Dusabimana ati “Nagiye ku Murenge n’umwana turi kumwe, ushinzwe kwandika arambwira ngo nzagaruke mu cyumweru gitaha azabanze abaze mu nzego zo hejuru, ubwo icyumweru cyarashize mbwira umuyobozi w’umudugudu ngo amumpamagarire, amuhamagaye aramubwira ngo mbe ndetse, na n’ubu nta gisubizo gifatika ndahabwa.”

Akomeza agira ati “Mfite impungenge kuko urabona ko mpora nirukanka, kandi ndirukanka mbabaye. Nifuza ko bamwandika bakamusubiza mu gitabo nk’aho yari ari”.

Ikibazo cya kabiri uyu muryango ugaragaza ni uko uhora wibaza niba ntacyo ubuyobozi bwabafasha dore ko ngo ubwo bajyaga gufata umurambo ku bitaro bya Polisi bya Kacyiru baciwe akayabo bibasaba kugurisha isambu, inka, n’ishyamba, bituma basigara mu bukene bukomeye.

Dusabimana ati “Urabona urugo rwarasenyutse, twagurishije inka yari hano, tugurisha isambu iri mu Cyiri, tugurisha n’ishyamba kugira ngo tubone ayo twishyura ibitaro, kuko baduciye ibihumbi 200 noneho wakongeraho n’ayo twategesheje bikagera mu bihumbi 250”.

Uyu mubyeyi w’abana umunani avuga ko isambu bagurishije ari yo yamufashaga kubona ibitunga umuryango, akabona n’amafaranga ya Mitiweli, naho inka ikamuha ifumbire none ubu ngo bari mu bukene.

Uyu mubyeyi w’imyaka 44 y’amavuko yifuza ko ubuyobozi bwamworohereza kongera kwandikisha umwana we ndetse agahabwa n’ubufasha ku mutungo wabo wahatikiriye bishyura ibitaro ndetse banajyana umurambo kuwushyingura.

Umunyambanga Nshingwabikorwa w’Umurenge wa Gikonko, Ignace Kayumba yirinze kugira byinshi atangaza kuri iki kibazo, avuga ko ibivugwa n’uyu muryango ari ibinyoma kuko batigeze baza ku Murenge kwandikisha Musabyimana cyangwa ku kindi kibazo kijyanye na we.

Yagize ati “Bababwiye ko kumwandikisha byananiranye gute? Ntabwo bigeze baza”.

Inkuru bifitanye isano

- Nyarugenge:Amayobera ku rupfu rw’umukobwa bivugwa ko yitabye telefoni agahita apfa

- Gisagara:Yageze iwabo asanga bamaze amezi ane bamushyinguye

Françoise Dusabimana avuga ko umutungo wabo watikiriye mu gushyingura umurambo bari bazi ko ari uwabo bityo bagasaba ubufasha
Musabyimana Claudine wari umaze amezi ane bizwi ko yapfuye ari kumwe na nyina
Musaza we afashe umusaraba wanditseho Musabyimana Claudine

[email protected]


Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Sunday 25 September 2016
Copyright © 2009 -2014 - IGIHE Ltd - All Rights Reserved