Gisagara: Ubuzima bushaririye bwa Yankurije watewe inda akiri muto

Yanditswe na Prudence Kwizera
Kuya 4 Ukuboza 2017 saa 08:01
Yasuwe :
0 0

Umukobwa witwa Jeannette Yankurije w’imyaka 17 y’amavuko wo mu Murenge wa Muganza mu Karere ka Gisagara abayeho mu buzima bushaririye nyuma y’uko atewe inda akiri muto kandi iwabo ari abakene kuko batabasha kubona ibibatunga.

Yankurije avuga ko yatewe inda n’umuhungu baturanye mu kagari ka Rwamiko, Umurenge wa Muganza aho yakoraga akazi ko mu rugo, bahita bamwirukana asubira iwabo mu buzima bwa gikene, ubu ahetse umwana w’amezi ane.

Uyu mukobwa avuga ko yize mu mashuri abanza ageze mu wa kabiri avamo ajya gukora akazi ko mu rugo bitewe n’ubukene bwari mu muryango we, iwabo babyaye abana barindwi we ni imfura muri bo.

Aganira n’Umunyamakuru wa IGIHE yamubwiye ko abayeho mu buzima bubi kuko mu muryango we batabasha kumubonera ibyo kurya no kwambara ndetse n’umusore wamuteye inda ntacyo amufasha.

Ati “Bansigaga mu rugo hamwe n’uwo muhungu turi babiri tugakora iby’abana, twarakundanaga ariko njyewe nabonaga ari umwana nanjye ndi muto tutabyara. Umwana wanjye ndamwonsa nkamurera, ubu ntabwo nariye, ni ibintu twamenyereye ntabwo dusamura turya nijoro gusa, ariko iyo abaturanyi babona nashonje cyane uwatetse arampa”.

Yankurije avuga ko aho yakoraga mu rugo atahembwaga amafaranga ahubwo yakoreraga ibiryo gusa ariko akababazwa n’uko nyuma yo kubona ko atwite bahise bamwirukana atangira kubaho nabi.

Yatereranwe n’ubakamurenganuye

Yankurije avuga ko akimara kwirukanwa aho yakoraga yageze iwabo ababyeyi be bamaze kubona ko yatewe inda babimenyesha ubuyobozi bamujyana no kwa muganga, batumaho n’uwamuteye inda ariko abayobozi bemeza ko kumuhana ntacyo byamumarira.

Ati “Twagiye kwa muganga, abaganga baramubwira ngo yarampohoteye impapuro bazohereza kuri polisi babwira ababyeyi banjye ngo bazajyeyo bakurikirane ikibazo cyanjye, ubwo tujyayo ba DASSO baravuga ngo kumufunga ntacyo byamarira ngo nibemere umwana”.

Kugira ngo abashe kubonera umwana igikoma, Yankurije avuga ko ajya guca inshuro byamuyobera akajya gusaba ibyo kurya iwabo w’umuhungu wamuteye inda.

Uyu mwangavu avuga ko yifuza ko umuhungu wamuteye inda yamufasha kurera umwana ntamutererane kuko kumurera wenyine byamunaniye kandi niyo arwaye atabasha kumuvuza.

Umunyamabanga Nshingwabikorwa w’Umurenge wa Muganza, Marie Rose Uwimana, avuga ko muri uwo murenge hagaragara abangavu benshi batewe inda zitateguwe kandi abenshi bakomoka mu miryango ikennye, bityo bari gushaka uburyo babashyira mu matsinda kugira ngo bafashirizwemo.

Uwimana ati “Iki kibazo kirahangayikishije mu muryango, ni ikibazo kubona abana b’abakobwa ku musozi batanu, batandatu batwaye inda. Twagifatiye ingamba kuko twabonye gikomeye, cyane ko twabashishikarije kuvuga, gutinyuka ntibahishire ihohoterwa bakabivuga bikimara kuba, indi ngamba ni uko twabashishikarije kwandikisha abana, ikindi tugiye kubabumbira mu mashyirahamwe aho bari mu tugari tubegere”.

Ku bufatanye n’Umuryango Mpuzamahanga Nterankunga Ishami ry’u Rwanda (Action Aid Rwanda), muri uwo murenge wa Muganza hari gukorwa ibarura kugira ngo hamenyekane abangavu bose batewe inda zitateguwe bakiri bato, bashyirwe mu matsinda yo gufashirizwamo no kwigishwa.

Ubuyobozi bw’Akarere ka Gisagara ku bufatanye n’inzego z’umutekano bavuga ko bagiye gushyira ingufu mu gushakisha abagabo batera inda abangavu bagahanwa by’intangarugero.

Minisiteri y’Uburinganire n’Iterambere ry’Umuryango(Migeprof), iherutse gutangaza ko mu 2016, abana b’abakobwa bari hagati y’imyaka 16-19, bagera ku 17 500 batewe inda zitateguwe ndetse binabagiraho ingaruka zitandukanye zirimo kuva mu ishuri no kubaho mubuzima bushaririye.

Bamwe mu babyeyi mu byifuzo batanga, ni uko hajya hashakishwa n’abagabo batera inda abangavu bagahanwa by’intangarugero ndetse byaba ngombwa bakajya baburanishirizwa mu ruhame, kuko biteye agahinda kubona nk’umugabo w’imyaka 40 yateye inda umwangavu w’imyaka 12.

Umunyamabanga Nshingwabikorwa w’Umurenge wa Muganza,Marie Rose Uwimana, avuga ko bafite abangavu benshi batewe inda zitateguwe
Yankurije ahetse umwana w'amezi ane yabyaye, bigaragara ko babayeho mu buzima bushaririye

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza