00:00:00 IGIHE NETWORK KN KINYARWANDA EN ENGLISH FR FRANCAIS

Gisagara: Impinduka ku mibereho y’impunzi z’Abanye-Congo zikorana umushinga w’ubuhinzi n’Abanyarwanda

Yanditswe na Prudence Kwizera
Kuya 7 Ukwakira 2021 saa 07:33
Yasuwe :
0 0

Hagamijwe gufasha impunzi z’Abanye-Congo zicumbitse mu Nkambi ya Mugombwa iherereye mu Karere ka Gisagara, hashyizweho imishinga itandukanye zikorana n’abaturage b’Abanyarwanda irimo ubuhinzi.

Iyi nkambi iherereye ku gasozi kari mu Murenge wa Mugomba icumbikiye impunzi z’Abanye-Congo zisaga ibihumbi 10.

Umwe mu mishinga bakora ni ubuhinzi bakorera mu gishanga cya Misizi cyatunganyirijwe ku buso busaga hegitari 55 aho bakunze guhinga ibigori n’imboga. Gihingwamo n’abahinzi basaga 1473 harimo impunzi 300.

Ubwo hatangizwaga igihembwe cy’ihinga cya 2022 A abo bahinzi bahawe imbuto y’ibigori kugira ngo bazabone umusaruro mwiza.

Ruhumuriza Faustin yavuze ko icyo gishanga kibafatiye runini kuko bakuramo ibibatunga nk’impunzi.

Ati “Dukunze guhingamo ibigori, imboga n’ibishyimbo. Nk’iyo dusaruye ibigori turagurisha tukabona amafaranga adufasha kubaho. Iki gishanga Leta y’u Rwanda yaduhaye kidufitiye akamaro kanini cyane kandi gukorana n’Abanyarwanda ni byiza kuko bituma tubana neza.”

Murwanashyaka Innocent na we yavuze ko imibereho ye n’umuryango we yahindutse.

Ati “Baduhaye imbuto nziza n’ifumbire ku buryo twiteze umusaruro mwiza. Ubushize twari twasaruye toni 264, ubu twiteze ko tuzakuramo toni zirenga 300.”

Umuyobozi wungirije ushinzwe iterambere ry’ubukungu mu Karere ka Gisagara, Habineza Jean Paul, yavuze ko abaturage babanye neza n’impunzi kandi bakorana ibikorwa by’iterambere.

Ati “Ni uburyo bwiza bwo kubana n’impunzi kandi na zo zikishima. Nabo bakagera ku bukungu kubera gukorana neza n’abaturage hano mu Karere kacu, ni amahirwe gukorana na bo, ni abafatanyabikorwa.”

Umunyamabanga wa Leta muri Minisiteri y’Ubuhinzi n’Ubworozi, Dr Ngabitsinze Jean Chrysostome, yasabye abahinzi guhinga neza hakiri kare kandi bagakoresha imbuto nziza n’inyongeramusaruro kugira ngo bazabone umusaruro mwiza.

Usibye ubuhinzi, impunzi zo mu Nkambi ya Mugombwa mu Karere ka Gisagara zikorana n’abaturage b’Abanyarwanda imyuga irimo ubudozi n’ubwubatsi.

Hafi y’iyo nkambi huzuye ishuri ryigishyirizwamo imyuga itandukanye irimo kubaka, gusudira, kubaza, gutunganya imisatsi n’iyindi.

Dr Ngabitsinze yifatanyije n'Abanyagisagara mu gutangiza igihembwe cy'ihinga cya 2022 A.
Igihembwe cy'ihinga cya 2022 A cyatangirijwe mu gishanga cya Misizi aho impunzi z'Abanyekongo zifatanya ubuhunzi n'Abanyarwanda
Impinduka ku mibereho y’impunzi z’Abanyekongo zikorana imishinga n’Abanyarwanda mu Karere ka Gisagara
Umunyamabanga wa Leta muri Minisiteri y'Ubuhinzi n'Ubworozi, Dr Ngabitsinze Jean Chrysostome, yasabye abahinzi guhinga neza hakiri kare kandi bagakoresha imbuto nziza n’inyongeramusaruro

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .