Gisagara: Imyaka ine irashize abaturage barenga 120 bategereje ingurane

Yanditswe na Philbert Girinema
Kuya 3 Nzeri 2016 saa 12:07
Yasuwe :
0 0

Hari abaturage bo mu Murenge wa Save mu Karere ka Gisagara bavuga ko hashize imyaka ine batarahabwa ingurane y’imyaka yabo yangijwe ahaciwe imihanda yo kunoza imiturire.

Iyo mihanda yaciwe mu Kagari ka Rwanza ahatoranyijwe ko hashobora kubakwa Umujyi wa Gisagara mu 2012 nk’uko umwe muri bo yabitangarije IGIHE.

Ubwo yakorwaga yagiye igonga imyaka y’abaturage ikarandurwa ndetse ibyangijwe bikabarurwa ngo bizishyurwe, ariko n’ubu abaturage bavuga ko bitarakorwa amaso akaba yaraheze mu kirere.

Umwe ati “Mu isambu yanjye hanyuzemo imihanda igera kuri itatu, harimo ibiri itambika n’umwe umanuka waciye mu ishyamba ryanjye uhura n’undi wa kabiri utambika. Mu muhanda umanuka n’utambika narahapimye nsanga hareshya na metero kare 70.”

Mu kiganiro na IGIHE, Habimana Anatole, umwe muri bane bahagarariye aba baturage, yavuze ko bafite urutonde rw’abantu 129 babaruriwe imitungo yangijwe igomba kwishyurwa,uretse ko ngo hari n’abandi atibuka umubare babariwe nyuma bari baracikanywe.

Ati “ Baje kutwaka ibyangombwa by’ubutaka n’amarangamuntu twarabitanze. Tumaze amezi atandatu dufunguje amakonti.Ibyo twasabwaga byose tumaze amezi abiri tubitanze kuko twabibahaye muri Kamena uyu mwaka ariko nta n’umwe urishyurwa.”

Yavuze ko we yishyuza ibihumbi birenga 250 by’ibye byangijwe birimo ibiti bya gereveriya zari zikikije umurima, imbuto zirimo ibinyomoro,amaronji n’ibindi.

Ku murongo wa telefoni, Hanganima Jean Paul, Umuyobozi w’Akarere ka Gisagara wungirije ushinzwe ubukungu, yavuze ko ikibazo cy’aba baturage bakizi n’impamvu zatumye kitarabonerwa umuti.

Yagize ati “Icyabitindije turakizi.Amadosiye yabo yaje ku Karere mu mpera za Gicurasi uyu mwaka dusanga hari abatujuje ibyangombwa birimo nk’icyemezo kigaragaza niba koko ahacishijwe imihanda ubutaka ari ubw’umuturage. Hari umuturage ugerwaho ugasanga ubutaka butamwanditseho kandi kuba bamwe batujuje ibisabwa bitinza bagenzi babo mu kwishyurwa.”

Uyu muyobozi yavuze ko byasubijwe mu Murenge kugira ngo bikosorwe, akaba yizeza aba baturage ko bazishyurwa mu minsi ya vuba.

Yagize ati “Akarere kari gukorana n’Umurenge ku buryo nibigera mu Karere mu cyumweru gitaha, bitarenze ukwezi kumwe twaba twabishyuye. Icyemezo twafashe ni ukwishyura abujuje ibisabwa, aho kugira ngo bamwe batinze abandi.”

Muri Kamena uyu mwaka ubuyobozi bw’Umurenge wa Save bwari bwijeje aba baturage ko bazishyurwa bitarenze Nyakanga ariko n’ubu ntibirakorwa.

Uretse mu Murenge wa Save, hari n’ahandi hirya no hino mu gihugu hagenda humvikana abaturage bangirizwa imyaka n’ibikorwa runaka birimo n’ibifite inyungu rusange ariko bagatinda kwishyurwa.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza