Kwamamaza

Gisagara yasabye ubufasha kuri hegitari zisaga 3 700 z’ibishanga byahindutse ibihuru

Yanditswe kuya 29-09-2016 saa 17:18' na Prudence Kwizera


Ubuyobozi bw’Akarere ka Gisagara buvuga ko kugeza ubu bufite hegitari zisaga ibihumbi 3 770 z’ibishanga bidatutanyije, imwe mu mbogamizi ikomeye ku buhinzi kuko ngo biramutse bikoreshejwe umusaruro wakwikuba kabiri, abahinzi bagatezwa imbere n’umwuga wabo.

Mu itangizwa ry’igihembwe cy’ihinga cy’umuhindo, ryabaye mu mpera z’icyumweru gishize, Umuyobozi w’Akarere ka Gisagara, Jérôme Rutaburingoga, yagaragaje ko kuba ibyo bishanga bidatuganyije bituma batabona umusaruro uko babyifuza.

Iki gikorwa cyo gutangiza igihembwe cy’ihinga cyari cyitabiriwe na Minisitiri w’Intebe ndetse na Minisitiri w’Ubuhinzi n’Ubworozi, aho umuyobozi w’Akarere ka Gisagara yaboneyeho umwanya wo kubagaragariza izo mbogamizi.

Rutaburingonga yagize ati “Turacyafite ibishanga bifite ubuso busaga hegitari 3700 bitaratunganwa, Nyakubahwa Minisitiri, biramutse bitunganyijwe byakongera umuceri duhinga mu bwiza no mu bwinshi, kandi ukaba ushobora no kwikuba kabiri ku wo dusanzwe tweza mu karere ka Gisagara”.

Umuyobozi w’Akarere ka Gisagara yakomeje asobanura ko basanzwe bahinga umuceri mu bishanga bitunganyije bifite ubuso busaga hegitari ibihumbi 2 400, aho beza toni eshanu n’igice kuri hegitari imwe buri gihembwe cy’ihinga.

Uyu musaruro w’umuceri utunganyirizwa mu ruganda rwa Gikonko ruherereye muri aka karere, ibyo abaturage n’ubuyobozi bishimira ko ibyo bahinga bitunganyirizwa iwabo.

Minisitiri w’Ubuhinzi n’Ubworozi, Dr Gerardine Mukeshimana, yabwiye IGIHE ko byose bijyana n’ubushobozi buhari. Avuga ko hakozwe inyigo, kandi ubushobozi nibuboneka ibyo bishanga bizatuganywa.

Yagize ati “Ibishanga biri hirya no hino mu gihugu tugenda tubitunganya bijyanye n’uko habonetse ubushobozi. Ndumva harakozwe inyigo ku buryo ubushobozi nibuboneka biriya na byo bizatuganywa”.

Gutunganya ibi bishanga waba umuti w’ubushomeri ku rubyiruko

Bamwe mu baturage bo mu karere ka Gisagara baganiriye na IGIHE bavuga ko ibishanga biri mu karere kabo biramutse bitunganyijwe, byafasha kugabanya ubushomeri mu rubyiruko.

Bavuga ko hashyirwaho Koperative zibumbiye hamwe urubyiruko bagahabwa ibishanga bahingamo bakiteza imbere aho kwirirwa bicaye.

Ernest Kubwimana wo mu murenge wa Mamba ati “Icyifuzo natanga ni uko ibyo bishanga byatunganywa noneho urubyiruko rwirirwa rwicaye ngo rwabuze akazi rugakora Koperative, bakaruhamo kimwe cyangwa bibiri rugahinga. Ku bwanjye mbona byagabanya ubushomeri n’ubusinzi mu rubyiruko n’izindi ngeso mbi bazireka kuko batazibonera umwanya”.

Mu karere ka Gisagara, bimwe mu bishanga bihingwamo umuceri byatunganyijwe, harimo icya Musha, Murayi, Gikonko, Cyiri n’ibindi.

Kuva muri 2010, mu karere ka Gisagara hatunganijwe ubuso bw’ibishanga bungana na hegitari 1581.

Jérôme Rutaburingoga, avuga ko ibishanga biramutse bitunganyijwe umusaruro wakwiyongera
Dr Gerardine Mukeshimana avuga ko ubushobozi nibuboneka ibyo bishanga byo muri Gisagara bizatunganywa
Ibi bishanga ngo bishobora kugabanya ubushomeri mu rubyiruko igihe byaba bitunganyije

[email protected]


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Saturday 10 Ukuboza 2016
Copyright © 2009 -2014 - IGIHE Ltd - All Rights Reserved