Kwamamaza

Gisagara: Hagaragajwe uburyo abashakanye bagera ku iterambere rirambye

Yanditswe kuya 16-09-2016 saa 12:12' na Prudence Kwizera


Imiryango iharanira iterambere ry’umugore by’umwihariko wo mu cyaro n’ubuyobozi bwite bwa Leta, basanga bigoranye ko urugo rwatera imbere mu buryo burambye mu gihe hakiri umwe mu bashakanye uvunisha mugenzi we, cyangwa abagize umuryango batuzuzanya.

Byagarutsweho kuri uyu wa 15 Nzeri 2016, ubwo umuryango mpuzamahanga Action Aid ku bufatanye na Association Duhozanye bari mu gikorwa cyo kubakira ubushobozi abagore bo mu murenge wa Gishubi mu Karere ka Gisagara, ahatanzwe inka zigera kuri 23.

Amatsinda 17 abumbiye hamwe abagore 510 bo mu murenge wa Gishubi mu karere ka Gisagara ni yo yorojwe inka z’imbyeyi 23 zizabafasha kuzamura ubuhinzi bwabo bahingisha ifumbire, ndetse bakabona n’amata yo kunywa.

Umuyobozi wa Action Aid mu Rwanda, Josephine Uwamaliya, yavuze ko ibikorwa bakora byo gushyigikira umugore biba bigamije guteza imbere urugo rwose ndetse n’umuryango, ariko asobanura ko kugira ngo iterambere rigerweho ari uko abashakanye bagomba gutahiriza umugozi umwe bagafatanya muri byose ntawe uvunisha undi.

Uwamaliya ati “Umuryango ugizwe n’umugore, umugabo n’abana babo, nta wundi uzaza kububakira umuryango, ni mwe mugomba gufata iya mbere mukiteza imbere kandi mufatanyije nta wuvunisha undi. Twebwe iyo tuje tugatanga ubufasha ni ubufasha nyine, ariko uwifasha ni wowe ubwawe”.

Bamwe mu bagore bahawe inka bavuga ko zigiye kuzamura imibereho yabo kuko ngo batabashaka kubona ifumbire yo guhingisha ndetse n’amata yo kunywa.

Marie Gorette Niyonsaba ati “Kenshi nahingaga nta fumbire cyangwa natombora amafaranga nkayigura, ariko ubu iyi nka ngiye kuyitaho ijye impa ifumbire mpinge kijyambere abana banjye bane baone ibyo kurya bihagije kandi mbakamire n’amata”.

Umuyobozi wungirije ushinzwe imibereho myiza y’abaturage mu karere ka Gisagara, Clemence Gasengayire, nyuma yo gushimira iyi miryango ifasha mu iterambere ry’abaturage, yasabye abahawe inka kuzibyaza umusaruro no kuzoroza bagenzi babo, ndetse asaba n’abayobozi b’imidugudu, utugari n’imirenge kuba hafi y’abaterwa inkunga kugira ngo zitazabapfira ubusa.

Mu biganiro byatanzwe hibanzwe ku gukangurira abagabo guha agaciro imirimo ikorwa n’abagore ariko itinjiza amafaranga, ndetse bakareba n’uburyo bajya bayifatikanya kuko ngo ubushakashatsi bwerekanye ko bene iyi mirimo ivunisha abagore.

Iyo mirimo ni iyo murugo yiganjemo guteka, gukora isuku, kurera abana, gutashya, kuvoma n’iyindi.

Abashakanye kandi basabwe kugira umuco wo gutoza abana babo gufatikanya imirimo batavangura, kuko byagaragaye hamwe na hamwe ko hari abaharira imirimo imwe abahungu indi bakayiharira abakobwa, ibikunze kugaragara nk’ihohotera rishingiye ku gitsina.

Gahunda yo guteza imbere abagore by’umwihariko abo mu cyaro isanzwe ikorwa mu na Action Aid hirya no hino ku Isi, ikaba na kimwe mubigize umushinga wayo witwa Flow ( Founding Leadership and Opportunities for Women).

Mu Rwanda uyu mushinga uzamara imyaka itanu mu Rwanda, ukaba utera inkunga abagore bagera ku 6,000 n’abagabo igihumbi bo mu turere dutanu, aritwo Gisagara, Nyaruguru, Nyanza, Musanze na Karongi.

Usibye gutera inkunga abagore, hakorwa n’ibindi bikorwa nko kubahugura ku gukora imishinga ibyara inyungu, kubabumbira hamwe mu matsinda, kubatoza guharanira uburenganzira bwabo, no kwirinda ingeso mbi n’ihohotera.

Ikibonwa nk’umuti urambye wagabanya imirimo ivuna abagore, hagaragajwe ko abagabo bakwiye kujya bafatanya igihe bibaye ngombwa, ndetse hagashakwa n’uburyo bwo guteka bakoresheje Gazi (Gaz), kwegerezwa amavomero ndetse hagashyirwaho n’irerero ry’abana muri buri mudugudu.

Abagore bahawe inka zishobora gukamwa litilo 10 ku munsi
Gasengayire Clemence, Umuyobozi wungirije ishinzwe imibereho myiza y'Abaturage
Daphrose Mukarutamu, Perezidante wa Association Duhozanye
Josephine Uwamaliya,Umuyobozi wa Action Aid mu Rwanda

[email protected]


Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Sunday 25 September 2016
Copyright © 2009 -2014 - IGIHE Ltd - All Rights Reserved