Kwamamaza

Abanyeshuri batanu ba TTC Save birukanywe bazira kuvuga Ikinyarwanda

Yanditswe kuya 6-10-2016 saa 19:34' na Jean Louis Uwishyaka


Abanyeshuri batanu biga mu mwaka wa Gatandatu mu Ishuri Nderabarezi rya Save (TTC Save) riherereye mu karere ka Gisagara, birukanwe mu kigo by’Igihe gito banatumwa ababyeyi nyuma yaho hari umwe muri bo wavuze Ikinyarwanda, ariko bagenzi be ntibabashe kumwerekana.

Ubusanzwe muri iri shuri ngo hari amabwiriza y’uko nta munyeshuri n’umwe wemerewe kuvuga Ikinyarwanda (bavuga Icyongereza), ku buryo ngo ukivuze akurwaho amanota atatu y’imyitwarire, yabikora inshuro enye bakamwirukana by’igihe gito akajya kuzana umubyeyi.

Kuri uyu wa Gatatu tariki 5 Ukwakira 2016 ubwo abanyeshuri umunani bavaga mu dutsinda bakoreramo ibiganiro, ngo hari umwe muri bo wavuze ijambo ry’Ikinyarwanda maze umuyobozi wabo(Animatrice) wari ubari inyuma arabyumva, abasaba kwerekana ukivuze ariko ntiyaboneka.

Umwe muri aba banyeshuri birukanwe utashatse ko amazina ye atangazwa, yagize ati "Hari umwe twari kumwe wakivuze ariko twe ntabwo twari twamwumvise, batubaza ngo ’ni inde, tukamubwira tuti twe ntawe tuzi.’ Ubusanzwe iyo uvuze Ikinyarwanda bagukuraho amanota atatu y’imyitwarire ariko twebwe bahise bavuga ngo duhite dutaha, yavuze (animatrice) ngo niba yabuze ubwo nyine mwakivuze."

Yakomeje agira ati " Mu gitondo basonnye, twabonye ’Animatrice’ aje asoma amazina yacu;hari abari barimo ariko hari abandi basigaye twari turi kumwe atasomye, twe ntabwo tuzi icyo yakurikije. Yabwiye Umuyobozi ushinzwe imyitwarire ngo dutahe, ngo ni agasuzuguro no kuvuga Ikinyarwanda. Umuyobozi ushinzwe imyitwarire yadusabiye imbabazi ariko ’animatrice’ arabyanga birangira dutashye."

Aba banyeshuri bavuga ko batumva ukuntu bakirukanwa kandi batavuze Ikinyarwanda mu gihe n’iyo hari ukivuze itegeko riri mu kigo rimuhanisha kumukuraho amanota y’imyitwarire, aho kumwirukana ngo ajye kuzana umubyeyi.

Aba banyeshuri ngo babwiwe n’ubuyobozi bw’ikigo ko bagomba gusubira ku ishuri ku Cyumweru tariki 9 Ukwakira 2016, baherekejwe n’ababyeyi babo.

Umuyobozi w’ikigo ati ’Si nari mpari naho Animatrice yarengereye’

Frère Nsabimana Egide, Umuyobozi w’iki kigo yavuze ko ikigo ayoboye cyafashe ingamba zo gukangurira abanyeshuri kuvuga Icyongereza no gutinyuka, bityo ngo ni yo mpamvu uvuze Ikinyarwanda akurwaho amanota y’imyitwarire.

Ati "Twafashe ingamba z’uko abana bavuga Icyongereza kugira ngo tubamenyereze urwo rurimi, twigisha abana bazavamo abarezi ejobundi kandi ururimi ruri kwigwamo ubu ngubu ari Icyongereza, tukabamenyereza urwo rurimi. Dufite udukarita tubaha two kubahwitura no kugira ngo abana nabo bashyiremo ingufu. Iyo uvuze Ikinyarwanda umuntu akakubona, abayobozi bafite agakarita bagukuraho amanota atatu, noneho iyo ugize inshuro enye (amanota 12), twabyumvikanye n’ababyeyi, turakubwira tuti ’genda uzane umubyeyi tumwereke ko amanota 12 yabaye menshi’."

Uyu muyobozi yavuze ko atari mu kigo aba bana birukanwa kuko yari yagiye mu nama i Kigali, ariko ngo aba bana bashobora kuba birukaniwe kuba batagaragaje mugenzi wabo wari umaze kuvuga Ikinyarwanda ubundi animatrice akabifata nk’agasuzuguro. Gusa yavuze ko umuyobozi wabahannye yarengereye kuko ngo hari ibindi bihano byoroheje yari kubaha bitari ukubirukana.

Ati"Ashobora kuba yabahannye yihanukiriye, ubwo ni agasuzuguro no guhishira...oya ntabwo bari guhita birukanwa ahubwo bari kubaganiriza cyangwa bakabavugisha bakamenya uwari ukoze iryo kosa, cyangwa bakabaha n’utundi duhano mu ishuri, ariko ndabikurikirana ningerayo."

Abanyeshuri bo kuri TTC Save bavuga ko n’ubundi iki kigo gihana kihanukiriye umunyeshuri uba ugaragayeho ikosa, aho bavuga ko iyo umunyeshuri atakubuye cyangwa ngo akorope yoherezwa iwabo akamarayo icyumweru akagarukana umubyeyi.

Gusa ibyo guhana bihanukiriye Frère Nsabimana arabihakana akemeza ko ibyo ari ibikabyo by’abanyeshuri bitewe n’uko ngo mu bigo byose nta munyeshuri ukunda abayobozi ku buryo ngo n’iyo bamuhannye yumva igihano bamuhaye gihanitse.

Ababyeyi bati ’Hajye hahanwa abana ababyeyi ntibakabigwemo’

Umwe mu babyeyi barerera kuri iki kigo utifuje ko amazina ye atangazwa, avuga ko ibintu byo kwirukana abanyeshuri bakabatuma ababyeyi atari byo bitewe n’uko ngo ari ukubarushya.

Ati "Kubona itike y’umwana imuzana, imusubizayo n’iy’umubyeyi bareba igihe turimo ukuntu kimeze, hariho ubukene, ibibazo bitandukanye ariko buri gihe bakohereza abana bakirengagiza ibyo bibazo. Twifuza ko hajya hahanwa abana ku ishuri ababyeyi ntibabigwemo kubera ko ababyeyi ni bo bashaka amafaranga ya tike no gufata urwo rugendo ujyayo, urumva ko ari twe duhanwa kurusha abanyeshuri."

TTC Save ni ikigo cy’Abihayimana b’idini Gatulika ariko gifashwa na Leta, kibarizwaho amashami ane yigamo abanyehuri basaga 800.

Frère Nsabimana avuga umuyobozi wirukanye abo banyeshuri yabahannye yihanukiriye kandi bitari bikwiye

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Sunday 4 Ukuboza 2016
Copyright © 2009 -2014 - IGIHE Ltd - All Rights Reserved