Giraso w’imyaka irindwi mu batsinze irushanwa rya Andika Rwanda 2019

Yanditswe na Iradukunda Serge
Kuya 23 Kamena 2019 saa 08:58
Yasuwe :
0 0

Giraso Ella Parfaite wiga mu Mwaka wa Kane w’amashuri abanza mu Rwunge rw’Amashuri rwa Kiruri mu Karere ka Rulindo ari mu banyeshuri batsinze mu irushanwa Andika Rwanda rya 2019.

Uyu mwana w’imyaka irindwi uri muri 30 bitwaye neza ku rwego rw’igihugu, yabonye intsinzi abikesha umuvugo yise ‘Reka guhohotera umwana”.

Andika Rwanda ni irushanwa ngarukamwaka ryo kwandika inkuru n’imivugo mu Kinyarwanda, rigamije gutoza abana gukurana umuco wo gusoma no kwandika, ritegurwa n’Ikigo cy’Igihugu cy’Uburezi (REB).

Mu muhango wo gutangaza abatsinze, wabereye i Remera ku wa 21 Kamena 2019, Umuyobozi Mukuru Wungirije muri REB, Tusiime Angelique, yagarutse ku mpamvu iri rushanwa ryashyizweho.

Yakomeje agira ati “Minisiteri y’Uburezi ijya gushyiraho iri rushanwa kwari ukugira ngo dukangurire abantu cyane cyane abana bato kubasha kwandika, cyane ko burya iyo umuntu yanditse aranasoma.”

Yongeyeho ko iri rushanwa rya Andika Rwanda rifasha mu kubona imfashanyigisho zikoreshwa mu mashuri abanza.

Ati “Bidufasha no kubona imfashanyigisho kuko izi nkuru z’abana banditse zivanwamo ibitabo byifashishwa na bagenzi babo mu gusoma.”

Ibihangano bitsinze ku rwego rw’Igihugu binononsorwa na USAID ifatanyije na REB, bigakurwamo ibitabo bikwirakwizwa mu mashuri ya Leta mu Rwanda.

Umuyobozi ushinzwe Uburezi mu Kigega cya Leta Zunze Ubumwe za Amerika gishinzwe Iterambere Mpuzamahanga (USAID), kikaba n’umuterankunga w’iri rushanwa, Luann Gronhovd, yavuzeko ko Amerika n’ u Rwanda bihuje icyerekezo.

Yagize ati “Ubu bufatanye buva ku kuba Leta ya Amerika n’iy’u Rwanda bifite intumbero imwe ariyo kureba ko abana b’u Rwanda biga gusoma kandi bakabikunda bakiri mu myaka y’amashuri yo hasi.”

Yashimangiye ko ubumenyi bw’ibanze mu bijyanye n’ubuvanganzo ari ingirakamaro ku iterambere ry’igihugu muri rusange

Irushanwa rya Andika Rwanda ryatangiye mu 2014, rikaba ryitabirwa n’abana biga mu mashuri abanza n’ayisumbuye, iry’uyu mwaka rikaba ryaritabiriwe n’abana 102 634 bavuye mu gihugu hose.

Amajonjora yaryo ahera mu bigo by’amashuri aho abana bafashwa n’abarimu bagahitamo inkuru nziza na zo zikajya ku rwego rw’Akarere aho abitwaye neza bahurira ku rwego rw’igihugu.

Giraso wiga muri GS Kiruri ari mu bakiri bato bitwaye neza cyane ndetse abitabiriye iki gikorwa bagaragaje ko ari iby’agaciro ko abakiri bato bagenda bimakaza umuco wo gusoma no kwandika.

Mu marushanwa ya 2019, abakobwa 21 n’abahungu icyenda ni bo batsinze muri rusange.

Umuyobozi wa REB wungirije, Tusiime Angelique, atangaza abana 30 batsinze irushanwa rya Andika Rwanda
Umuyobozi ushinzwe Uburezi muri USAID, Luann Gronhovd, yashimye umusaruro gahunda ya Andika Rwanda imaze gutanga

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza