Kwamamaza

Gikondo: Afunzwe akekwaho gutera ibyuma uwo yita ihabara ry’umugabo we

Yanditswe kuya 26-09-2016 saa 13:33' na Thamimu Hakizimana


Mwiza Christelle utuye i Gikondo mu Karere ka Kicukiro afungiye kuri sitasiyo ya Polisi ya Gikondo azira gutera Mutuyimana Clarisse ibyuma mu nda no mu mbavu amuziza kumutwara umugabo.

Mu ijoro ryo ku wa Gatanu tariki ya 23 Nzeri 2016, nibwo Mwiza Christelle yasanze mu Kabari Mutuyimana Clarisse amutera ibyuma mu nda no mu mbavu amuziza ko yamutwaye umugabo we bashakanye byemewe n’amategeko witwa Mureberwa Samuel uzwi ku kabyiniro ka Mazambi.

Abaturage bo muri aka gace bavuga ko Mwiza yateye ibyuma Mutuyimana nyuma y’uko umugabo we amutaye akajya kwibanira na we ndetse akaza no kumufungurira akabari i Gikondo gafite agaciro ka miliyoni eshanu.

Umuvugizi wa Polisi wa Polisi mu Mujyi wa Kigali, Supt. Hitayezu Emmanuel yabwiye IGIHE ko uyu mugore afungiye kuri sitasiyo ya Polisi ya Gikondo aho akurikiranyweho icyaha cyo gukubita no gukomeretsa bikomeye mugenzi we witwa Mutuyimana Clarisse.

Yagize ati “ Iki cyaha cyo gukubita no gukomeretsa bikabije cyakozwe ahagana saa sita z’ijoro ryo ku tariki 23 Nzeri aho bicyekwa ko Mwiza Christelle yateye icyuma mugenzi we Mutuyimana, ubu akaba arwariye muri CHUK aho ari gukurikiranwa n’abaganga nyuma yo gukomeretswa bikomeye.”

Yongeyeho ko Polisi ifite amakuru avuga ko mu rugo rwa Mwiza hari hamaze igihe harangwa amakimbirane ashingiye ku muryango aho bivugwa ko atari abanye neza na Mureberwa bashakanye.

Supt Hitayezu yagize ati “ Mu rugo rwabo hari hamaze igihe harangwa amakimbirane ndetse iyo polisi ibimenye ibikorera iperereza uretse ko bidakuraho ko uwakoze icyo cyaha cyo guhohotera akanakomeretsa mugenzi we akurikiranwa.”

Yakomeje avuga ko kugeza ubu umugore wateye mugenzi we icyuma afungiye kuri Sitasiyo ya Polisi ya Gikondo aho iperereza rikomeje kugira ngo dosiye ishyikirizwe urwego rw’ubushinjacyaha.

IGIHE yamahagaye kuri telefone Mureberwa Samuel, umugabo w’umugore ukurikiranyweho icyaha cyo gukubita no gukomeretsa ariko yirinda kugira icyo abivugaho.

Yagize ati “ Ubu nta makuru nabasha kuguha nonaha, rwose ntacyo nabivugaho.”

Bamwe mu baturanyi b’umuryango wa Mwiza Christelle bakomeje kwibaza ku buzima bw’abana be basigaranye n’umukozi gusa nyuma y’igihe kitari gito Se abataye.

Ingingo ya 148 yo mu gitabo cy’amategeko ahana y’u Rwanda iteganya ko uwahamwe n’icyaha cyo gukubita no gukomeretsa mu buryo bubabaje ahanishwa igihano cy’igifungo kiri hagati y’amezi atandatu n’imyaka ibiri ndetse n’ihazabu y’amafaranga y’u Rwanda kuva ku bihumbi 100 kugeza ku bihumbi 500 cyangwa kimwe gusa muri ibyo bihano biturutse ku mwanzuro w’ubucamanza.

Mutuyimana Clarisse watewe ibyuma mu nda no mu mbavu arwariye mu bitaro bya CHUK
Mureberwa Samuel na Mutuyimana Clarisse watewe ibyuma bivugwa ko bari mu rukundo mu buryo bwa rwihishwa

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Thursday 24 Ugushyingo 2016
Copyright © 2009 -2014 - IGIHE Ltd - All Rights Reserved