Kwamamaza

Gicurasi, iherezo ry’abazunguzayi muri Kigali- Ikiganiro kirambuye na Meya Mukaruliza

Yanditswe kuya 21-10-2016 saa 11:39' na IGIHE


Umuyobozi w’Umujyi wa Kigali, Monique Mukaruliza, amaze amezi arindwi ku buyobozi bw’umujyi, ku ikubitiro agitorwa yasanze ikibazo cy’ubucuruzi bwo mu muhanda giteye inkeke aho bamwe batezaga umutekano muke, bakagongwa n’imodoka abandi bakarwana n’abashinzwe umutekano bikabaviramo n’urupfu.

Mu kiganiro kirambuye yagiranye na IGIHE, Mukaruliza yagaragaje aho Umujyi ugeze ukemura iki kibazo benshi bemeza ko ari ingutu.

IGIHE: Hashize amezi atanu Umujyi wa Kigali uhagurukiye bikomeye ikibazo cy’abacururiza mu muhanda, ni iyihe ntambwe mumaze gutera?

Mukaruliza: Gahunda yo gukura abazunguzayi cyangwa se abahoze bacururiza mu mihanda tubona igeze ahantu hashimishije cyane ko byabaye ikibazo kiremereye nko kuva mu kwezi kwa gatanu uyu mwaka, aho nka Nyabugogo wasangaga hari umutekano mucye, bariya bacururiza mu mihanda bajyamo bamwe bakagongwa n’imodoka, gare ya Nyabugogo ukabona yahindutse nk’isoko kandi bigatuma banica n’ubucuruzi. Nyabugogo niho hari benshi cyane.

Ikibazo twarebye uburemere bwacyo cyane cyane kugira ngo umutekano ube waboneka hafi ya gare ya Nyabugogo n’utundi duce twose tw’Umujyi wa Kigali aho bariya bacururizaga mu muhanda bari benshi cyane. Ariko na none tunareba ikibazo cyaba kibatera kujya mu mihanda, bigaragara ko abenshi bajyaga mu muhanda kugira ngo bashake imibereho ugasanga bafite ubushobozi buke bigatuma bakora ibyabashobokera kugira ngo bashobore kubaho.

IGIHE: Hari ibarura mwaba mwarigeze mukora ngo mumenye umubare wabo?

Mukaruliza: Tumaze kubona ko buriya bucuruzi bwo mu muhanda buhungabanya umutekano kandi bugahungabanya n’ubucuruzi muri rusange mu mujyi wa Kigali, twahuye nabo tureba uko bangana tuganira nabo tumenya icyo bifuza, byatumye tumenya uburemere bw’ikibazo.

Twabaruye abagera ku 9000 mu Mujyi wa Kigali wose, Nyarugenge bari 5000 birenga, Gasabo bari 2000 birengaho bake na Kicukiro bari hafi kugera ku 2000.
Ntawatekerezaga ko muri uyu mujyi harimo 9000 bagenda mu muhanda bacuruza.

Kubona uburemere bw’ikibazo byatumye tureba ingamba zafatwa zirimo gushaka ubushobozi kugira ngo dushobore kubabonera amasoko babone aho bakorera, kuko bari bafite ubushobozi buke butabemerera kujya mu masoko asanzwe bari bugende bagakodesha aho bakorera bakishyura n’imisoro. Dufatanyije n’uturere tugize umujyi twafashe ingamba zo kubashakira amasoko cyane cyane aria ho bakunda gucururiza.

Iyi gahunda yari yarabayeho muri 2014/2015 aho habayeho gahunda ya Free Market bashakirwa amasoko ariko ntibayatindamo bayavamo bavuga ko yari yagiye ahantu kure, hihishe, badashobora kubona ababagurira, twebwe twaganiriye nabo tubashakira amasoko hafi y’aho basanzwe bakorera.

Amwe twumvikanye na ba rwiyemezamirimo barayubaka turayakodesha, hari aho uturere twubatse amasoko. Nka Nyabugogo hari amasoko manini arimo abantu bagera ku 3370 bakoreramo, Gasabo naho hari amasoko yuzuye n’andi agiye kuzura ayo masoko arimo abantu bagera ku 1700 muri Kicukiro bashakiwe imyanya mu masoko yari asanzwe ku buryo abantu bagera hafi kuri 500 bafite aho bakorera. Abagiye mu masoko asanzwe n’abagiye mu mashya turabakodeshereza ibibanza bakoreramo tunabishyurire imisoro mu gihe cy’umwaka umwe.

Meya Mukaruliza avuga ko abasaga 5000 bamaze gukurwa mu bucuruzi bwo mu muhanda

Iyi ni intambwe ikomeye kuko iyo ugiye muri ariya masoko usanga hari abamaze kumva ko bagomba gucuruza mu buryo bwemewe n’amategeko cyane cyane ko twagiye tubigisha tunabamenyesha ko gucururiza mu kajagari bitemewe kandi bihanirwa.

Twabashyize mu matsinda y’abantu 50 dufatanyije n’ikigo cy’amakoperative turareba ukuntu twabigisha uko bakishyira hamwe mu makoperative no kugana ibigo by’imari kugira ngo nubwo batangiye bafite ubushobozi buke bazavemo abacuruzi bakomeye bameze nk’aba tubona bubaka imiturirwa hirya no hino mu Mujyi wa Kigali.

IGIHE: Mwavuze ko mwashatse ubushobozi bwo kubafasha, mu bijyanye n’amafaranga twavuga ko iki gikorwa kimaze gutwara angana iki?

Mukaruliza: Mu bijyanye n’amafaranga kuko amasoko amwe turacyubaka andi ni ba rwiyemezamirimo bayubatse, icyo nzi ni uko amafaranga y’ubukode nko ku masoko abiri ya Nyarugenge tuzajya twishyura bose hamwe arenze ibihumbi 500 bya buri kwezi. Gasabo hari aho ba rwiyemezamirimo batararangiza kubaka n’aho barangije, birasaba gukora igiteranyo tukongeraho n’imisoro tuzabishyurira.

IGIHE: Mwabaruye abantu 9000 abo mumaze guha amasoko barenga gato 5000, iyo urebye mu mujyi usanga hari abakirimo benshi barimo n’abahawe ayo masoko bakayavamo kuko nta bakiriya ngo babona, iki muzagikemura mute?

Mukaruliza: Birasaba gukomeza kubigisha umuntu akabereka ingaruka ziri mu gucururiza mu muhanda, umuntu arajya mu muhanda yahura n’abashinzwe umutekano bakamufata bakamwambura ibyo yari afite nk’igishoro. Hari kandi ibihano tugiye gutangira gushyira mu bikorwa bigaragara mu mabwiriza y’Inama Njyanama y’Umujyi wa Kigali, ahana ucururiza mu muhanda ndetse n’umuguriye.

Ntabwo twahise tuyashyira mu bikorwa kuko hagombaga kubaho kwigisha, abantu bakamenya ibyiza byo gucuruza mu murongo mwiza, gukorera hamwe, ahantu hazwi birinde izo mpanuka za buri kanya, ngaho barwanye n’abashinzwe umutekano...birasaba gukomeza kubigisha kandi muri bo hari abamaze kubyumva batanga ubuhamya bagira bati agataro kari karampeze ku mutwe umusatsi warapfutse ariko ubu mfite ahantu nkorera mu gitondo njya ku kazi nzi ko nta kibazo mpura nacyo uwo munsi.

IGIHE: Ibihano biteganywa mu mabwiriza ya Njyanama y’Umujyi byasohotse mu igazeti ya Leta bizatangira gutangwa ryari?

Mukaruliza: Ubu turi hafi gutangira kubitanga, turi hafi kuko ndatekereza ko igihe gishize abantu bamaze kuyamenya kuko twafatanyije n’itangazamakuru kugira ngo aya mabwiriza abantu bayamenye. Bidatinze tugiye gutangira kuyashyira mu bikorwa ku buryo ari ucururiza mu muhanda azajya acibwe ibihumbi 10 by’amafaranga y’u Rwanda n’uwaguraga acibwe ibihumbi 10.

IGIHE: Ubwo bidatinze ni ryari?

Mukaruliza: Nyuma yo kubigisha, igikurikiraho ni ibihano

Meya Mukaruliza ati "Nyuma yo kubigisha, igikurikiraho ni ibihano"

IGIHE: Muteganya ko iki kibazo kizaba cyakemutse burundu bitarenze ryari?

Mukaruliza: Twihaye umwaka kugira ngo abantu babe bamenyereye gucururiza ahantu hazwi. Nyuma yawo twumva ko ikibazo kizaba cyakemutse abantu bashobora gukora bishyize hamwe, bakorera mu makoperative kandi basobanukiwe n’ibyiza byo gukora ubucuruzi bwemewe n’amategeko bakabukorera ahantu hazwi. Ubwo ni muri Gicurasi umwaka utaha.

IGIHE: Gahunda yo gufasha aba bacuruzi bahoze bacururiza mu muhanda kubona inguzanyo yo igeze he?

Mukaruliza: Hari gahunda yabanje twafashijwemo na Minisiteri y’Abakozi ba Leta n’Umurimo muri 2014/2015 yari yatanzwemo amafaranga agurizwa bamwe mu bakoraga ubucuruzi bwo mu muhanda nk’igishoro, ubu arimo kwishyurwa.

Kuri aba bashya nta gishoro turi bubahe ahubwo kubafasha kwegera ibigo by’imari nibyo turimo gufatanya n’izindi nzego za Leta harimo n’ikigo gishinzwe amakoperative kugira ngo tubafashe kwishyira hamwe bagire ubushobozi bagane ibigo by’imari.

Buriya bufatanye bwasize abagera ku 1651 bafashwa bahabwa Miliyoni 223 z’igishoro.

IGIHE: Mwavuze ko mubishyurira ubukode n’imisoro mu mwaka umwe, nyuma y’aho bizagenda bite?

Mukaruliza: Nyuma y’umwaka turizera ko bazaba bamaze kugira aho bagera. Ubu turabishyurira ibihumbi bitanu by’ubukode buri kwezi, tukabishyurira ibihumbi hagati ya birindwi n’umunani by’umusoro buri kwezi, twatangiye gahunda yo kubatoza kuzigama nibura 100 cyangwa 200 ku munsi.

Muri iki cyiciro cya mbere ku bijyanye no kubakodeshereza ibibanza no kubasonera imisoro hamaze gutangwa miliyoni 217.

IGIHE: Uwo icyo gihe kizashira agicumbagira, ntaho aragera ubwo ntazasubira mu muhanda?

Mukaruliza: Oya ntabwo yasubirayo, ntabwo bishoboka kuko imibare yerekana ko uwizigamiye umwaka uzashira afite n’igishoro gishobora kudakenera kwifashisha ibigo by’imari nubwo ari byiza kubigana kugira ngo batere intambwe. Turabakangurira no gukorera ku mihigo, bakavuga bati uyu mwaka ndi hano utaha ndashaka kuba ndi hariya bikabafasha gutera intambwe ubutaha.

Ikiganiro mu mashusho


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Saturday 10 Ukuboza 2016
Copyright © 2009 -2014 - IGIHE Ltd - All Rights Reserved