Kwamamaza

Gicumbi:Umuhigo bihaye wo gusubiza abana bose mu ishuri uracyari ingorabahizi

Yanditswe kuya 10-09-2016 saa 10:49' na Pacifique Ntakirutimana


Kuvana abana ku mihanda no gusubiza mu ishuri abari bararivuyemo, ni umwe mu mihigo Komite Nyobozi nshya y’Akarere ka Gicumbi ikimara gutorwa yahise yiha, inatangaza ko mu gihe cy’ukwezi kumwe gusa icyo kibazo kizaba kibaye amateka, nyamara kuri ubu hirya no hino muri Gicumbi hacyagaragara abana batiga.

Hari tariki ya 3 Gicurasi 2016, ubwo ubuyobozi bw’Akarere ka Gicumbi bwatumizaga inama yari yahuje abayobozi b’ibigo by’amashuri, abarezi, abakozi kuva ku Kagari bafite uburezi mu nshingano ndetse n’Abanyamabanga Nshingwabikorwa b’Imirenge yose igize Gicumbi.

Intego nyamukuru y’iyi nama kwari ukurebera hamwe uko muri aka Karere abana bose bakigaragara ku mihanda batari ku ishuri bahavanwa mu maguru mashya bagasubizwa ku mashuri.

Aha ni ho hafatiwe umwanzuro w’uko mu kwezi kumwe gusa abana bose bazaba bamaze gusubizwa ku mashuri,nyamara magingo aya biracyari umugani.

Mu ruzinduko abadepite bamaze iminsi bagirira muri Gicumbi, ikibazo cy’abana bataye amashuri kiri muri bimwe mu Banyamabanga Nshingwabikorwa b’Imirenge y’aka karere babagaragarije ko kikibagoye. Ubwo abadepite Kantengwa Julienne na Mporanyi Théobard basuraga Umurenge wa Miyove, iki kibazo kiri muri bimwe mu byo basanganijwe.

Ngezahumuremyi Théoneste, Umunyamabanga Nshingwabikorwa w’Umurenge wa Miyove, yagize ati“Mu bibazo tugihura na byo kandi biduhangayikishije harimo icy’uko muri uyu Murenge kugeza ubu tubara abana magana abiri tutarabasha gusubiza mu ishuri ubu bakigaragara ku mihanda ndetse no mu mirimo itandukanye irimo gukora mu mirima y’icyayi ndetse no gukora mu birombe bicukurwamo zahabu.”

Uyu muyobozi avuga ko kuba badashobora gusubiza abana bose mu mashuri ahanini biterwa n’uko bamwe mu babyeyi bateshuka ku nshingano zabo zo kurera, aho usanga bahora mu makimbirane kugeza ubwo umwana yigenga akarinda asohoka mu muryango.

Uwimana Jean Baptiste utuye muri uyu Murenge, aganira na IGIHE yatunze agatoki imwe mu miryango ku kuba intandaro yo gutuma abana bata ishuri muri aka karere.

Ati“Jye mbona biterwa n’ubusinzi kuko muri Miyove hari Kanyanga nyinshi, reba umugabo azinduka ajya gushakisha yataha akajya kunywa akagera mu rugo yasinze ari na bwo atangira guhondagura abo asanze, ubwose umwana urumva yakurira muri ubwo buzima? Bamwe bahitamo kujya kwishakishiriza ubuzima nyine.”

Kuri iki kibazo Depite Kantengwa Julienne yibutsa ababyeyi ko ari bo ba mbere bafite inshingano ku bana babo.

Ati“Ubundi mbere y’uko ikibazo kibazwa umuyobozi runaka kigomba kubazwa mbere na mbere ababyeyi kuko ni bo bafite inshingano za mbere zo kurera abana babo, ikindi abayobozi nabo bakamenya gukurikiranira hafi imiryango babonamo ibyo bibazo kuko twese tugomba kwita ku mwana niba dushaka ejo heza.”

Mu kwezi kwa Gatanu uyu mwaka wa 2016, imibare yagaragaza ko muri aka karere abana bataye ishuri bageraga ku 7728 mu mashuri abanza n’abasaga 23 mu mashuri yisumbuye.

Ba Depite Mporanyi Théobard na Kantengwa Julienne baganira

[email protected]


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Thursday 8 Ukuboza 2016
Copyright © 2009 -2014 - IGIHE Ltd - All Rights Reserved