Gicumbi:Umugore yishe umugabo we akoresheje ibuye

Yanditswe na Kanamugire Emmanuel
Kuya 25 Nzeri 2016 saa 01:02
Yasuwe : XX
0 0

Nyiramisago Maria, Umugore w’imyaka 45 y’amavuko yishe umugabo we Rufayire w’imyaka 52, mu Mudugudu wa Bukamba, mu Kagari ka Ngondore, Umurenge wa Byumba ho mu Karere ka Gicumbi.

Umunyamabanga Nshingwabikorwa w’Umurenge wa Byumba, Gahano Rubera JMV, yatangarije IGIHE ko Nyiramisago yishe umugabo we akamucoca umutwe akoresheje ibuye, ati “…yafashe arahondagura rwose, ibisebe ni byinshi mu mutwe.”

Yakomeje avuga ko nta makuru afatika yari yaboneka asobanura neza icyo yamuhoye, gusa ngo hari ayo bafite avuga ko bari basanzwe bagirana amakimbirane, ku buryo bari basanzwe banarwanira mu rugo rwabo.

Rufayire usanzwe uzwi muri ako gace nk’Umusangwabutaka yari amaranye igihe kinini n’uyu mugore babana nk’abashakanye aho banabyaranye abana benshi.

Gahano akomeza avuga ko ayo makimbirane bivugwa ko akomoka ku kuba Rufayire yashinjaga umugore we ubusambanyi, ari nayo mpamvu uwo mugore mu gufatwa yajyanywe kuri sitasiyo ya Polisi hamwe n’uwo mugabo ukekwaho kuba ari we basambanaga, akaba ari na we nyirabayazana w’urwo rupfu.

Nyiramisago, yemera icyaha cyo kwica abishaka Rufayire, ndetse kimuhamye yahanishwa igifungo cya burundu, dore ko icyaha cyo kwica uwo bashakanye gihanwa nk’icyaha cy’ubwicanyi giteganywa n’ingingo ya 140 y’igitabo cy’amategeko ahana.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE