Gicumbi: RGB yahwituye abayobozi bakomeje guha urwaho ruswa n’akarengane

Yanditswe na Uwishyaka Jean Louis
Kuya 18 Nzeri 2016 saa 02:53
Yasuwe : XX
0

Ikigo cy’Igihugu cy’Imiyoborere( RGB), cyasabye abagize inama njyanama y’Akarere ka Gicumbi kugira uruhare mu guca ibibazo bya ruswa n’akarengane bikigaragara muri bamwe mu bayobozi.

Ibi byavuzwe kuri uyu wa Gatandatu tariki 17 Nzeri 2016, mu nama yahuje iki kigo n’abayobozi bagize Njyanama y’Akarere ka Gicumbi.

Ubushakashatsi bwakozwe n’Ikigo cy’Igihugu cy’Imiyoborere, RGB, mu mwaka wa 2015, bwagaragaje ko mu Karere ka Gicumbi abaturage bari hagati ya 30 na 40% bavuze ko bahuye na ruswa n’akarengane ubwo baganaga inzego z’ubuyobozi.

Ibi ni byo RGB ishingirwaho isaba abagize inama Njyanama y’Akarere ka Gicumbi kugira uruhare mu guhangana n’ibi bibazo bigaragara ko bigenda byiyongera buri mwaka.

Prof. Shyaka Anastase, Umuyobozi w’Ikigo cy’Igihugu cy’Imiyoborere,RGB, asanga abagize inama njyanama bagiye buzuza inshingano zabo ibibazo nk’ibi byacika.

Ati“Guca ruswa n’akarengane ntibisaba kubona inkunga zikomeye, ni uguhindura imikorere, aha ikintu gikomeye ni uko njyanama yajya igira uruhare rukomeye mu mikorere igafasha nyobozi gukurikirana no kureba mu Mirenge no mu Tugari aho ibintu bitagororotse ku buryo koko umujyanama agira uruhare rwo gucyamura abayobozi kugira ngo banoze imikorere umuturage abeho anyuzwe n’ibyo akorerwa.”

Bizimana Jean Baptiste uyobora inama njyanama y’Akarere ka Gicumbi, yemera ko hari inshingano abajyanama batuzuza uko bigomba.

Yagize ati“ Nibyo koko iyo urebye inshingano z’umujyanama nyuma ukareba n’uko rimwe na rimwe dukora, usanga hari aho dutererana abaturage kuko hari ubwo usanga umuntu adatuye mu Murenge yatorewemo icyo gihe ntiwavuga ko uwo akora inshingano ze uko bikwiye, ariko nyine kuba RGB iduhwituye ikanatwereka ibi bibazo, ubu tugiye guhaguruka dufatanye na nyobozi kureba aho biri duhereye ku Kagari kuburyo umuturage atubonamo umusaruro yari atwitezeho.”

Ibi RGB ibitangaje mu gihe mu Karere ka Gicumbi bamwe mu baturage batahwemaga kuvuga ko babangamiwe na ruswa ikomeje gufata indi ntera yakwa n’abayobozi bo mu nzego z’ibanze kugira ngo babahe ibyangombwa byo kubaka hakurikijwe igishushanyo mbonera cy’akarere.

Abajyanama b'akarere ka Gicumbi basabwe gukemura ibibazo bya ruswa n'akarengane bikomeje kuhagaragara

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza