Gicumbi:Polisi yafashe imodoka ebyiri zinjiza ibiyobyabwenge mu Rwanda

Yanditswe na Kanamugire Emmanuel
Kuya 1 Ukwakira 2016 saa 01:00
Yasuwe :
0 0

Polisi yo mu Karere ka Gicumbi yafashe imodoka ebyiri zari zitwaye ibiyobyabwenga byiganjemo Kanyanga, ku wa 30 Nzeri 2016.

Mu kagari ka Karurama, Umurenge wa Rushaki niho hafatiwe ivatiri yari ipakiye amakarito 590 ya Waragi n’imizingo y’ibitenge 12 amakuru avuga ko yafashwe bagerageza kubyerekeza mu karere ka Nyagatare.

Indi modoka ya kabiri yo mu bwoko bwa Dyna ikaba yafatiwe mu murenge wa Nyankenke mu kagari ka Kinishya aho yari ipakiye litiro 357 za kanyanga n’amakarito 1280 ya Chief waragi ibi byose bikaba byari byambukijwe biva muri Uganda byerekezwa mu mujyi wa Gicumbi.

Inzego zitandukanye zarasabwe guhagurukira ikibazo cya kanyanga mu karere ka Gicumbi zifatanije n’abaturage.

Mu nteko rusange y’akarere ka Gicumbi iheruka kuba, Guverineri w’Intara y’Amajyaruguru,Bosenibamwe Aimé yavuze ko aho bigeze abayobozi b’ibanze bagiye kujya babihanirwa mu gihe bigaragaye ko batatanze amakuru.

Yagize ati“Aho bigeze ikibazo cya kanyanga kirarambiranye, igisigaye ni uko inzego zose zihaguruka tugahangana na yo. Iyi kanyanga iri gucururizwa mu midugudu yacu, mu tugari tubereye abayobozi.Ubu rero aho tuzongera kuyifatira bigaragara ko basanzwe bayicuruza, umuyobozi waho azajya abibazwa kuko hari aho numva ko banazikingira ikibaba.Nimuhaguruke mwese dufatanye duhane amakuru abo bayinjiza nitubagaragaza ntabwo bazananira inzego zacu z’umutekano.”

Muri Kanama uyu mwaka, muri Gicumbi polisi iheruka gutwika ibiyobyabwenge bifite agaciro gasaga miliyoni 17 z’amafaranga y’u Rwanda byari byafatiwe hirya no hino mu mirenge igize akarere.

Inzoga zitemewe mu Rwanda zafataiwe muri izi modoka
Imodoka yo muri Uganda yafashwe yerekeza muri Nyagatare itwaye inzoga zitemewe

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza