Kwamamaza

Gicumbi:NAEB n’ubuyobozi bw’Akarere baritana bamwana ku gutererana abahinzi ba Kawa

Yanditswe kuya 1-09-2016 saa 12:45' na Pacifique Ntakirutimana


Abahinzi ba Kawa mu Karere ka Gicumbi baravuga ko kuba magingo aya iki gihingwa gisa n’ikitakibashishikaje byatewe n’uko inzego zitandukanye zifite aho zihuriye na Kawa zabatereranye.

Ibihingwa nka Kawa, Icyayi n’Ibisheke ni bimwe mu bihingwa ngengabukungu byatoranijwe guhingwa mu Karere ka Gicumbi, nyamara iyo uganiriye na bamwe mu bahinzi bakubwira ko bagorwa no guhinga kawa kuko batakibona imiti n’amafumbire bakenera, ibi bikiyongeraho igiciro umuhinzi wa Kawa ahabwa kidahura n’imbaraga atakaza.

Umusaza Kayijuka Papias w’imyaka 61 y’amavuko atuye mu Murenge wa Giti, avuga ko amaze imyaka isaga 40 ahinga Kawa, kuri we ngo kuyihinga ubu ni ukubura icyo ukora.

Yagize ati“ Kera umugabo yaguraga igare yafashe amafaranga ya Kawa, yaguriraga umugore n’umwana umwenda yagurishije Kawa, wabonana umuntu inote nshya uti ‘aya ni aya Kawa mbese umuhinzi wayo yabaga ari umukire! Ariko se ubu ninde wakubeshya ngo Gicumbi umuhinzi wa Kawa imuha amafaranga? Ubu uwampa uburenganzira izo mfite nazirandura nkahatera urutoki kuko abaruteye ejo bundi bamaze gukira kuko n’ubuyobozi bubitayeho.”

Nkurikiyinka Martin na we ni umuhinzi wa Kawa mu Murenge wa Rwamiko, kuri we ngo gucika kwa Kawa byatewe n’uko umuhinzi yibonye atakigira umukurikirana.

Ati“ mbere twabaga dufite abakozi bihariye badukurikirana bakamenya ibibazo dufite hakaba ubwo banaguhwitura igihe cyo gusazura cyageze.Nawe reba ubu ninde muyobozi wakwihandagaza akemeza ko muri Gicumbi hari amakuru afite ku gihingwa cya Kawa? Baradutereranye natwe turarekera ubu n’aho ziri ni ibiti bihagaze biri mu kigunda.”

Kuba ubuhinzi bwa Kawa muri Gicumbi bwasubiye inyuma binemezwa n’ubuyobozi bw’Akarere. Muhizi Jules Aimable,Umuyobozi w’Akarere wungirije ushinzwe ubukungu n’iterambere, yemera ko ubuhinzi bwa Kawa muri aka Karere bwasubiye inyuma.

Yagize ati“Ni byo koko Kawa iri mu bihingwa byasubiye inyuma hano, ariko iyo urebye usanga abazihingaga baratereranwe harimo nko kutabona ifumbire n’imiti ku gihe n’ibyitwa ngo birabonetse bikaza bidahagije. Ubu rero tugiye guhaguruka dufatanye n’inzego zose bireba Kawa ya Gicumbi igaruke ku isoko,tutiriwe dutinda mu kuvuga ngo byatewe n’uyu ahubwo noneho inzego zose bireba zigahagurukira rimwe umuhinzi akabona ko ashyigikiwe.”

Kuruhande rw’Ikigo cy’Igihugu gishinzwe guteza imbere umusaruro w’ibyoherezwa mu mahanga(NAEB),ari nabo batungwa agatoki cyane ku kuba baradohotse, mu gukorana bya hafi n’abahinzi bavuga ko kuba Kawa yarasubiye inyuma muri Gicumbi byaturutse ku ntege nke z’ubuyobozi n’inganda ziyitunganya kuko ngo aribo bari bafite inshingano z’ibanze mu gukurikirana abahinzi babagezaho ibyo bakenera nk’amafumbire n’imiti.

Kabagire John ukuriye NAEB mu Ntara y’Amajyaruguru aganira na IGIHE yagize ati“ Ntabwo ibyo bibazo byose wabishyira kuri NAEB kuko hari utundi Turere abahinzi bahagurukiye guteza imbere Kawa nka Gakenke na Rulindo kubera ko abayobozi baho babishyizemo ingufu bakatwegera natwe tukabafasha kubona ibyo abahinzi bifuza, ndatekereza ko ubwo ibijyanye n’imiti n’amafumbire bigiye kujya bigera ku bahinzi binyuze mu Nkeragutabara ibibazo bigiye gushira, ariko n’ubundi abayobozi barasabwa kubigiramo uruhare.”

Ubushakashatsi NAEB iheruka gukora muri Gicumbi mu mwaka wa 2015, bugaragaza ko ubuhinzi bwa kawa bukorerwa mu mirenge 18 kuri 21 igize aka Karere bugakorwa n’abahinzi 11,783, bose hamwe bafite ibiti 2,271,589 biteye ku buso bungana na ha 1,046.318.

Ibiro by'Akarere ka Gicumbi

[email protected]


Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Wednesday 2 Ugushyingo 2016
Copyright © 2009 -2014 - IGIHE Ltd - All Rights Reserved