Kwamamaza

Gicumbi:Kudahabwa amata iwabo bituma bayanywera mu nzira iyo bayagemuye

Yanditswe kuya 17-09-2016 saa 08:28' na Pacifique Ntakirutimana


Bamwe mu bana bo mu Karere ka Gicumbi bafashe umwanzuro wo kujya banywera amata mu nzira mu gihe iwabo bayabahaye ngo bayagemure ku makusanyirizo batabageneye ayo kunywa mu rugo.

Ibi byagaragaye mu gihe hashize igihe bamwe mu borozi bo muri kano Karere bakomeje gushinjwa gushyira amazi mu mata bagemurira amakusanyirizo.

Iki kibazo cyakomeje kuba uruhererekane kuko aborozi na bo bikomaga abitwa ‘Abacunda’ kuko ari bo bashyikiriza amata yabo nyuma na bo bakayageza ku makusanyirizo.

Inkomoko y’aya mazi yaje kumenyekana ubwo Abacunda bahabwaga utwuma tubafasha gupima amata arimo amazi mbere yo kuyakira avuye ku mworozi ngo agezwe ku ikusanyirizo.

Kabera Andrew, umucunda mu Karere ka Gicumbi, aganira na IGIHE yavuze ko batarabona utwo twuma bahoranaga ibibazo n’aborozi.

Ati“ Mbere umworozi yatuzaniraga amata tukamwandikira ku gipande litiro aduhaye twayageza ku ikusanyirizo bakabonamo amazi, ubwo amata yose bakayadusubiza kuko twabaga twayavanze nyamara atari bose bayashyiramo amazi, aho utwuma tuziye byadufashije gupimira umworozi mbere yo kuyavanga, uwo dusanganye amazi tukayamusubiza.”

Nubwo hari hamaze kuboneka uburyo bwo gupima amata arimo amazi ariko byakomeje kuba urujijo mu borozi cyane ko aho byagaragaraga wasangaga bahakana bivuye inyuma ko nta mazi bashyira mu mata yabo.

Nshimiyimana Jean Baptiste, umworozi mu Murenge wa Rukomo muri Gicumbi avuga ko inkomoko y’iki kibazo yaje kumenyekana binyuze mu bana bagemura amata.

Yagize ati“ Abantu bakomeje kubiyoberwa ariko nyuma abana bakajya batubwira ko hari abagera mu nzira bakayanywa maze bakaza kuzurishaho amazi kugira ngo litiro bahawe n’iwabo zitagabanuka.Byaje kugaragara rero ko akenshi bikorwa n’abana bava mu ngo zikama amata yose akagemurwa badasigiye abana ayo kunywa.”

Kuba hari imiryango ikama ikagemura amata yose ntayo basigiye abana yo kunywa muri Gicumbi ni ikibazo cyakunze kugarukwaho n’abayobozi batandukanye ndetse bamwe bakanagihuza na bimwe mu bikomeje gutiza umurindi indwara zikomoka ku mirire mibi zikihagaragara cyane mu bana bari munsi y’imyaka itanu.

Depite Gatabazi Jean Marie Vianney ukunze kugenderera aka Karere cyane ko anagakomokamo, aherutse gusaba aborozi kureka gukunda amafaranga kurusha abana babo, aho yagarutse ku bagemura amata yose ntihagire ayo basiga mu rugo.

Yagize ati“ Birababaje kubona amata Gicumbi ifite ariko ukabona abana bakirwaye bwaki.Iyo naje ino aha nkubitana n’abana mu gitondo bikoreye amata bagemuye ariko noneho ninjya mpura na bo nzajya mpagarara mbicaze bayanywe.”

Mu gufatira umwanzuro iki kibazo ubuyobozi bw’Akarere ka Gicumbi bwashyizeho ibwiriza ry’uko nta mworozi wemerewe kugemura amata ari munsi ya litiro eshatu, ibi bikagenzurwa n’inzego z’ibanze hanarebwa niba aborozi mbere yo kugemura amata ku isoko babanza guha imiryango yabo.

Kugeza ubu imibare igaragaza ko aborozi bo muri Gicumbi ku munsi bagemura ku isoko amata asaga litiro ibihumbi mirongo itandatu na bitanu bamwe banemeza ko ariko karere ka mbere mu kugira amata menshi.

Nyamara Gicumbi iri mu turere twa mbere dufite umubare munini w’abana bafite imirire mibi.

[email protected]


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Saturday 10 Ukuboza 2016
Copyright © 2009 -2014 - IGIHE Ltd - All Rights Reserved