Gicumbi: I&M Bank yifatanyije n’abaturage mu muganda inishyurira abatishoboye Mituweli

Yanditswe na Twarabanye Venuste
Kuya 30 Ugushyingo 2019 saa 08:06
Yasuwe :
0 0

I&M Bank Rwanda yifatanyije n’abaturage bo mu Murenge wa Nyamiyaga mu Karere ka Gicumbi, gukora umuganda ngarukakwezi ndetse yishyurira abagera ku 1,000 bo mu Mirenge itatu y’ako karere ubwisungane mu kwivuza, Mituweli.

Iyo Mituweli ifite agaciro ka miliyoni eshatu z’amafaranga y’u Rwanda, yishyuriwe abatabasha kuyibonera mu buryo bworoshye bo mu Mirenge ya Nyamiyaga, Rutare na Bukure.

Umuyobozi Mukuru wa I&M Bank Rwanda, Robin Bairstow, yavuze ko gukora umuganda no gufatanya mu bindi bikorwa ari uburyo iyi banki yiyemeje bwo gushyigikira gahunda za leta zo kwishakamo ibisubizo.

Ati "Twishimiye gukorana namwe umuganda, kandi dushyigikira gahunda z’igihugu zo kwishakamo ibisubizo. Binyuze mu muganda, u Rwanda rwagaragaje ko hari ibisubizo abaturage bakwibonera niyo mpamvu twaje ngo dufatanye kandi tubashyikirize mituweli z’abantu 1000 twabemereye.”

Yavuze ko nka I&M Banki bazakomeza gushyigikira gahunda za leta no gufatanya n’abaturage.

Umunyamabanga Nshingwabikorwa w’Akarere ka Gicumbi, Epimaque Mpayimana, yashimiye I&M Bank avuga ko abadafite ubushobozi butuma biyishyurira mituweli bagiye kubona uburyo bwo kwivuza.

Ati “Hari n’ibindi bikorwa dusanzwe dufatanya by’umwihariko muri uyu mwaka badufashije kugira abaturage bacu bishyurira ubwisungane mu kwivuza, bagera ku 1000. Ni igikorwa cyiza twishimiye nk’Akarere, zirahabwa abatabashaga kuziyishyurira ku buryo bworoshye.”

Mu biganiro bisanzwe bihuza abaturage nyuma y’umuganda, Mpayimana yaganirije abaturage kuri gahunda zitandukanye zirimo; akamaro k’Abunzi asaba abaturage kubagana no gukemura ibibazo mu bwumvikane, kwita ku bafite ubumuga, no kwirinda amakimbirane mu miryango.

Yasabye ubufatanye mu ku kibazo cy’abangavu baterwa inda ndetse abibutsa kwitabira guteganyiriza iza bukuru mu kigega Ejo Heza.

Abakozi ba I&M Bank bafatanyije gukata no guterura urwondo
I&M Bank ishyigikira gahunda zo kwishakamo ibisubizo kuko iyo abantu bafatanyije bagera kuri byinshi
Inama ya nyuma y'umuganda yasojwe no kwishimira Mituweli bahawe
Mu biganiro bya nyuma y'umuganda Umuyobozi Mukuru wa I&M Bank Rwanda, Robin Bairstow yashimiye abaturage bafatanyije umuganda abatangariza ko bishyuriye mituweri abagera ku 1000
Umunyamabanga Nshingwabikorwa w'Akarere ka Gicumbi, Epimaque Mpayimana yashimiye I&M Bank avuga ko abadafite ubushobozi butuma biyishyurira mituweli bagiye kubona uburyo bwo kwivuza
Umunyamabanga Nshingwabikorwa w'Umurenge wa Nyamiyaga, Bayingana Jean Marie Vianney aganira n'abaturage n'umukozi wa I&M Bank
Umuyobozi Mukuru wa I&M Bank Rwanda, Robin Bairstow niwe wari urangaje imbere abakozi
Umuyobozi Mukuru wa I&M Bank Rwanda, Robin Bairstow ashyigira cyane uburyo bwo gufatanya hagamijwe ko abantu bikemurira ibibazo bimwe na bimwe
Umuyobozi Mukuru wa I&M Bank Rwanda, Robin Bairstow yafatanyije n'abandi gutera inzu igishahuro

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza