Kwamamaza

Gicumbi:Batewe impungenge n’ibikorwa bitsikamira uburenganzira b’umwana

Yanditswe kuya 31-08-2016 saa 19:54' na Pacifique Ntakirutimana


Mu karere ka Gicumbi ni hamwe mu hakigaragara ibikorwa bitsikamira uburenganzira bw’abana, bikaba biteye impungenge inzego z’ubuyobozi, imiryango nterankunga n’abandi.

Ibi byatumye umuryango ugamije gukora ubuvugizi ku iyubahirizwa ry’uburenganzira bw’abana SOS, ishami rya Byumba,utegura ubukangurambaga bugamije kwita ku burenganzira bw’abana no kubaha umwanya kugira ngo bagire uruhare mu bibakorerwa.

Ni ubukangurambaga bwanyujijwe mu marushanwa y’imbyino,imivugo n’amakinamico byakorwaga n’abana bibumbiye mu matsinda y’ubumwe n’ubwiyunge akorera mu mashuri abanza n’ayisumbuye uyu mushinga ukoreramo yo mu Mirenge ya Nyankenke na Miyove.

Ibi bikaba bikozwe mu gihe ubuyobozi bw’Akarere ka Gicumbi bumaze iminsi busaba inzego zitandukanye kimwe n’abafatanyabikorwa bako gutanga umusanzu wabo mu guhangana no guhashya burundu ibikorwa byose bibangamira kandi bigahutaza uburenganzira bw’umwana nka bimwe mubibazo bikomeye bikihagaragara.

Munyezamu Joseph umukozi mu Karere ka Gicumbi ushinzwe uburinganire n’iterambere ry’umuryango yagize ati“ Kuba ubu butumwa butangiwe imbere y’imbaga y’ababyeyi bugatangwa n’abana babo biratuma burushaho kumvikana kuko ibyo abana bavuze nubwo babinyujije mu bihangano byabo ni ubuzima bamwe muri bo bahura na bwo. Turacyafite abana bari ku mihanda, abakoreshwa imirimo ivunanye harimo gucukura zahabu, gukora mu mirima y’icyayi,kwikorezwa imicanga n’amatafari mu birombe kandi byose bigakorwa ababyeyi turebera.”

“Batwibukije rero ko ari uburenganzira bwabo tuba duhutaza, ikindi twabonye ko na bo bafite ibitekerezo kuko niba umwana w’imyaka icyenda yicara agahimba umuvugo urimo ubutumwa ashaka gutanga biratwereka ko hari ubwo tubima ijambo mu rugo kandi na bo hari uruhare bagira cyane mu bibakorerwa.”

Mukansanga Faina ni umuhuzabikorwa w’umushinga w’ubuvugizi ku iyubahirizwa ry’uburenganzira bw’umwana muri SOS Byumba, yatangarije IGIHE ko bateguye iki gikorwa muri Gicumbi bamaze kubona ko hakiri ibibazo bibangamira uburenganzira bw’umwana.

Ati“ Nk’abafatanyabikorwa b’Akarere kandi n’ubundi dusanzwe twita ku mwana,twasanze uburenganzira bwe hano hari ubwo butubahirizwa kandi niba tuvuga ngo turashaka ejo heza, turashaka igihugu gifite abagabo n’abagore beza, abayobozi b’ejo beza, ibyo byose ntitwabigeraho turamutse tutita ku burenganzira bw’umwana kuko ni we pfundo ry’ejo.”

“Niba umwana atiga, ntavuzwe, akava ku ishuri yasize inka iwabo yewe ari na we wayahiriraga agasanga yagurishijwe atabiganirijweho ibyo byose biramuhungabanya. Ikindi hirya no hino mu miryango haracyagaragara amakimbirane mu babyeyi ibi byose bituma umwana asohoka mu muryango akajya ku muhanda.”

Aya marushanwa yari afite insanganyamatsiko igira iti“ Mubyeyi kura umwana mu muhanda agane ishuri kandi agire uruhare mu bimukorerwa, yaberaga mu Murenge wa Miyove mu Kagari ka Miyove, ahatuwe n’imiryango y’abasubijwe inyuma n’amateka hamwe mu hagaragara umubare w’abana batiga.

Yari agamije ko iyi miryango kimwe n’indi muri rusange ihindura imyumvire ngo igere ku rwego rw’abandi banyarwanda.

Urwunge rw’amashuri rwa Rwagihura ruherereye mu Murenge wa Nyankenke nirwo rwegukanye iri rushanwa ruhabwa ibihembo bifite agaciro k’ibihumbi 284000 birimo igikombe, umupira w’amaguru ndetse n’ibikoresho by’itorero ku bahungu n’abakobwa.

Muri rusange ibihembo SOS yageneye abarushanijwe bose bikaba bifite agaciro k’ibihumbi 416700 byose bikaba ari ibifasha abana kwidagadura.

Abana bagaragaje uburyo uburenganzira bwabo buhutazwa babinyujije mu makinamico
Manirakiza ufite ubumuga bwo kutabona yatangaje abantu ku bw'impano afite yo kuvuza ingoma no kuririmba
Abana bari mu marushanwa bagaragaza impano bifitemo
Haracyagaragara ibikorwa bihungabanya uburenganzira bw'umwana muri Gicumbi
Uturutse iburyo ni Mukasanga Faina ukuriye SOS ishami rya Byumba

[email protected]


Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Friday 30 Nzeri 2016
Copyright © 2009 -2014 - IGIHE Ltd - All Rights Reserved