Gicumbi: Ababyeyi biyemeje gushingira ku bukangurambaga ‘Baho Neza’ bakarinda abana inda zitateguwe

Yanditswe na Sekamana Mathias
Kuya 15 Kamena 2019 saa 06:05
Yasuwe :
0 0

Ababyeyi bo mu Mirenge ya Manyagiro na Rutare mu Karere ka Gicumbi, baravuga ko bagiye gukomeza inzira y’ubukangurambaga ‘Baho Neza’ bakarinda abana inda zitateganyijwe, kugwingira n’imirire mibi kandi bakitabira gahunda zo kuboneza urubyaro.

Ubu bukangurambaga bugamije kunoza imibereho y’umuryango, bwibanze ku nyigisho zo kuboneza urubyaro no kuruteganyiriza mu myigire, ubuvuzi n’ibindi.

Bushishikariza kandi abaturage kugana urugo mbonezamikurire mu rwego rwo guhashya ikibazo cy’igwingira mu bana.

Muri ubu bukangurambaga bwabereye mu Karere ka Gicumbi kuri uyu wa Gatanu, Umuryango Imbuto Foundation, wafatanyije n’ingabo z’igihugu mu gutanga serivisi zo kuboneza urubyaro no kuvura abaturage indwara zitandukanye ku buntu.

Natacha Rwigamba wari uhagarariye Imbuto Foundation muri iki gikorwa, yavuze ko bahisemo iyi mirenge kuko Manyagiro ari Umurenge udafite serivisi z’ubuzima zihagije no kuba ukora ku mupaka wa Uganda, bituma winjiramo abantu benshi naho uwa Rutare ukaba waragaragayemo abana benshi batwaye inda zitateganyijwe.

Ingimbi n’abangavu bitabiriye iki gikorwa bavuze ko bacengewe n’inyigisho zagitangiwemo haba mu ndirimbo, imivugo n’ubutumwa butandukanye, bemeza ko bigiye kubafasha kwirinda inda zitateganyijwe no kwishora mu busambanyi.

Manishimwe Claudette yagize ati “Wagira ngo baba batureba iyo abagabo bubatse badushukisha amafaranga na telephone zihenze. Turwana na byo ariko buriya twabyumvise ko tugomba kwihagararaho no kubashyikiriza ubuyobozi.”

Col Dr Robert Karangwa wari uhagarariye ingabo, yavuze ko begera abaturage kugira ngo abadafite ubushobozi bwo kwivuza mu mavuriro akomeye babone ubuvuzi ku buntu.

Ati “Twaje hano kuvura abaturage kuko tuzi ko hari abadafite ubushobozi. Mujye mwibuka kuboneza urubyaro kuko kubyara benshi udashoboye kurera biraguhangayikisha ukanarwaragurika. Mujye kandi mwita ku mirire myiza y’abana.”

Ababyeyi bo muri iyi mirenge nabo biyemeje gukomereza ku nyigisho zatanzwe muri ubu bukangurambaga bwa “Baho Neza” bagahangana n’inda zitateganyijwe mu bana.

Tharcisse Turatsinze yagize ati “Turakomerezaho twigisha abana. Ikindi tugiye gufatanya duhashye abashuka abana kuko akenshi bikorwa n’abasinzi n’abakoresha ibiyobyabwenge. Ababyeyi bareke guhugira ku mafaranga gusa bahe n’umwanya abana batazaba ababyeyi gito.”

Binyuze muri ubu bukangurambaga bwa Imbuto Foundation ku bufatanye n’ikigo cy’igihugu gishinzwe ubuzima, RBC, abahawe serivisi zo kuboneza urubyaro mu Murenge wa Manyagiro ni 138 naho mu Murenge wa Rutare hakaba haboneje urubyaro abagera ku 141.

Abahawe serivisi z’ubuvuzi bw’indwara zitandukanye mu Murenge wa Manyagiro ni 1370 naho mu Murenge wa Rutare ni 1020.

Ingabo z'u Rwanda zavuye abantu indwara zitandukanye ku buntu
Umuyobozi w'umurenge wa Rutare, Hydayat Mukandahiro niwe wari uhagarariye ubuyobozi bw'Akarere ka Gicumbi
Natacha Rwigamba wari uhagararioye Imbuto Foundation yasabye ababyeyi kwita ku bana babo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza