Gicumbi: Ababyeyi basabwe kwita ku buzima bw’imyororokere y’abana babo

Yanditswe na Ishimwe Israel
Kuya 27 Nzeri 2016 saa 01:50
Yasuwe : XX
0

Umunyamabanga Mukuru muri Komisiyo y’Igihugu yo gusezerera no gusubiza mu buzima busanzwe ingabo zavuye ku rugerero, Umulisa Henriette yatangaje ko kwigisha urubyiruko ibijyanye n’imyirorokere bigomba kuba inshingano za buri mubyeyi.

Ibi yabigarutseho ku wa Gatanu w’icyumweru gishize ubwo hizihizwaga Umunsi wo kwigisha urubyiruko ubuzima bw’imyororokere ndetse n’uburenganzira bwabo wabereye mu Rwunge rw’amashuri rwa Gishambashayo mu Murenge wa Rubaya ho mu Karere ka Gicumbi.

Uyu munsi wari ufite insanganyamatsiko igira iti “ Ni uburenganzira bwanyu kumenya ubuzima bw’imyororokere.”

Ubu bukangurambaga bwateguwe n’Imbuto Foundation bwatangiwemo inyigisho zijyanye n’ubuzima bw’imyororokere cyane ku bamaze kuba ingimbi n’abangavu hagamijwe kubafasha kwirinda agakoko gatera Sida ndetse n’inda zitateganijwe.

Umulisa yatangaje ko ababyeyi n’abafatanyabikorwa bose bakwiye gusobanurira urubyiruko ku buryo bwimbitse ibijyanye n’ubuzima bwabo bw’imyororokere.

Yagize ati“ Ubu ni uburyo bwo gufasha urubyiruko rwacu cyane umwana w’umukobwa kumenya uko umubiri we uhinduka kugirango ashobore kwirinda gutwara inda zitateganijwe ndetse n’agakoko gatera Sida bashobora guhurira nabyo mu busambanyi. Izi rero ni inshingano zacu nk’ababyeyi kugira ngo dukomeze kurerera igihugu dutegura Abanyarwanda b’ejo beza badafite ibibazo.”

Imbuto Foundation imaze imyaka itandatu itangiye ibikorwa byo gufatanya n’ibigo by’amashuri bitandukanye mu Rwanda muri gahunda zo kwigisha urubyiruko ku mashuri ibijyanye n’ubuzima bw’imyororokere mu rwego rwo kubafasha kumenya imiterere y’imibiri yabo n’uburyo bashobora kwitwara cyane igihe bageze mu myaka y’ubugimbi.

Ubu bukangurambaga Imbuto Foundation ikaba yaratangiye kubukora mu rubyiruko by’umwihariko ku mwana w’umukobwa mu gihe mu Rwanda hari hatangiye kuvugwa ibibazo byo gutwita inda zitateganijwe mu bigo by’amashuri ndetse n’ubwiyongere bw’ubwandu bwa virusi itera Sida cyane mu rubyiruko.

Umwe mu babyeyi bo mu Murenge wa Rubaya waganiriye na IGIHE yatangaje ko yishimiye cyane Imbuto Foundation kubera izi nyigisho yahaye abana babo.

Karemera John atuye mu kagari ka Gishambashayo, aganira na IGIHE yagize ati “ Izi nyigisho ni ingirakamaro cyane ku bana bacu kuko nka hano mu cyaro ababyeyi ntabwo baragira umuco wo kuganiriza abana babo ku buzima bw’imyororokere; ubu rero kuba bahawe aya masomo natwe tuhibereye biratuma no mu ngo zacu bamwe bagiye kujya babikora bityo dufashe urubyiruko rwacu kumenya kurinda ubuzima bwabo no gutegura ejo habo heza.”

Umuyobozi w’Akarere ka Gicumbi wungirije ushinzwe imibereho myiza y’abaturage, Benihirwe Charlotte yibukije ababyeyi ko bafite inshingano zo gukurikirana uburere bw’abana babo babigisha indangagaciro n’uburyo bagomba kwitwara.

Yagize ati “ Igihugu cyacu kiratera imbere umunsi ku wundi, kandi ntitwagera aho twifuza mu gihe ubuzima bw’urubyiruko buri mu kaga. Ababyeyi bagomba kugira umuco wo kuganiriza abana ku bijyanye n’ubuzima bw’imyororokere. Ni inshingano zacu nk’ababyeyi ndetse n’abayobozi b’inzego z’ibanze gusigasira ubuzima bwabo bw’ahazaza.”

Urubyiruko, ababyeyi, ndetse n’abayobozi b’inzego z’ibanze bitabiriye iki gikorwa bapimwe Virusi itera Sida, ndetse bagirwa n’inama zitandukanye z’uko bagomba kwitwara.

Imbuto Foundation kandi yatanze udutabo 80 tw’’Agaciro Kanjye’ mu Rwunge rw’Amashuri rwa Gishambashayo tuzafasha abanyeshuri kwiyungura ubumenyi ku bijyanye n’ubuzima bw’imyororokere, barushaho kwirinda Sida ndetse no gutwara inda zitateganyijwe.

Umunyamabanga Mukuru muri Komisiyo y'Igihugu yo gusezerera no gusubiza mu buzima busanzwe ingabo zavuye ku rugerero, Umulisa Henriette yatanze impanuro ko ababyeyi bagomba guha abana babo
Umunyamabanga Mukuru muri Komisiyo y'Igihugu yo gusezerera no gusubiza mu buzima busanzwe ingabo zavuye ku rugerero, Umulisa Henriette amurika agatabo 'Agaciro Kanjye'
Abanyeshuri bo mu Rwunge rwa Gishambashayo bagaragaza ko bashyigiye gahunda bagejejweho
Ababyeyi basabwe kwigisha abana babo ubuzima bw'imyororokere

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza