00:00:00 IGIHE NETWORK KN KINYARWANDA EN ENGLISH FR FRANCAIS

George Rwigamba yahererekanyije ububasha na Marizamunda Juvénal wamusimbuye ku buyobozi bwa RCS

Yanditswe na IGIHE
Kuya 22 Mata 2021 saa 08:11
Yasuwe :
0 0

Marizamunda Juvénal uherutse kugirwa Komiseri Mukuru w’Urwego rw’Igihugu rw’Imfungwa n’Abagororwa, RCS, yahererekanyije ububasha na George Rwigamba yasimbuye.

Inama y’Abaminisitiri yateranye ku wa 14 Mata iyobowe na Perezida Kagame yashyize Marizamunda Juvénal wari Umuyobozi wungirije wa Polisi y’Igihugu ushinzwe abakozi n’imiyoborere ku buyobozi bwa RCS.

Nyuma y’iminsi irindwi hatangajwe iki cyemezo, ku wa 21 Mata habaye umuhango w’ihererekanyabubasha wanitabiriwe na Minisitiri w’Ubutabera, Johnston Busingye unafite mu nshingano RCS.

Komiseri Mukuru CGP Juvénal Marizamunda yashimiye Perezida Paul Kagame ku bw’izi nshingano yamuhaye zo kuyobora RCS n’abayobozi bacyuye igihe kubera umusingi ukomeye bubatse.

Ati ”Mbere na mbere ndashimira Nyakubahwa Perezida wa Repubulika y’u Rwanda wampaye inshingano zo kuyobora uru rwego, kandi ndashimira abatubanjirije kuyobora uru rwego kubera umusingi mwiza bubatse. Mfite ubushake, ishyaka n’ikivi cyo gukomeza kuzamura RCS, dufatanije n’abakozi ndetse n’abafatanyabikorwa bacu nkaba ntashidikanya ko inshingano uru rwego rwahawe tuzazisohoza neza nta shiti.”

Minisitiri w’Ubutabera akaba n’Intumwa nkuru ya Leta, Johnson Busingye, yashimiye ubuyobozi bucyuye igihe kubera umwete, umurava n’ubunyamwuga bwabaranze cyane no mu bihe bikomeye by’icyorezo cya Covid-19.

Yagize ati “Turashimira ubuyobozi bucyuye igihe umwete, umurava n’ubunyamwuga bagaragaje kandi ndasaba ko umusingi mwiza wubatswe wakomeza kubakirwaho mu bufatanye n’ubunyamwuga kugira ngo uru rwego rukomeze kugera ku ntego n’inshingano zarwo.”

Yakomeje asaba Umuyobozi mushya gukomeza umurava wamurangaga mu gihe yari amaze ari umuyobozi muri Polisi y’u Rwanda.

DCGP Marizamunda Juvénal wari umaze imyaka irindwi ari Umuyobozi Mukuru muri Polisi y’Igihugu, yanabaye mu Gisirikare cy’u Rwanda, aho yavuye mu 2014.

George Rwigamba wasimbuwe yari amaze imyaka itanu ari Komiseri Mukuru w’Urwego rw’Igihugu rw’Imfungwa n’Abagororwa kuko yagiye muri uyu mwanya muri Werurwe 2016.

Uyu muhango wihererekanya bubasha hagati ya Marizamunda Juvénal (ibumoso0 na George Rwigamba (iburyo) wanitabiriwe na Minisitiri w'Ubutabera, Johnston Busingye
Abayobozi bakuru muri RCS bari mu gikorwa cy'ihererekanya bubasha

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .