Kwamamaza

Gen.Kabarebe yasabye urubyiruko rwarokotse Jenoside kuba aba mbere mu gukunda igihugu

Yanditswe kuya 24-10-2016 saa 07:23' na Cyprien Niyomwungeri


Minisitiri w’Ingabo w’u Rwanda, Gen. James Kabarebe yabwiye urubyiruko rugera kuri 200 rubarizwa mu muryango w’abanyeshuri barokotse Jenoside yakorewe Abatutsi mu 1994, AERG, ko batarokokeye ubusa kuko bafite inshingano ikomeye yo gukunda igihugu no kugikorera kurusha abandi bose.

Yabitangaje kuri iki cyumweru tariki 23 Ukwakira 2016, mu kiganiro yahaye urubyiruko rwaturutse muri Kaminuza 41 zikoreramo AERG, bahurijwe hamwe na Imbuto Foundation ngo baganirizwe ku gukomeza kwiyubaka, binyuze mu kuganira ku bibazo bifitanye isano n’ingaruka za Jenoside yakorewe Abatutsi mu 1994 no kubishakira ibisubizo.

Minisitiri Kabarebe yavuze ko kurokoka Jenoside bisobanuye kubaka igihugu, kuyirwanya no guhangana n’ingaruka zayo zirimo no kuyipfobya kuko byagaragaye ko imbaraga zo kongera kuyikora zicyuzuye.

Yatanze urugero rw’Abafaransa bagiye gusubukura iperereza ku ihanurwa ry’indege y’uwahoze ari Perezida Habyarimana, avuga ko ari ugushaka guhindura ubutegetsi banyuze ku ‘bisambo’ nka Kayumba Nyamwasa bakamusezeranya amafaranga ngo bahindure umurongo w’aho igihugu kigeze, bagice intege bongere bakore Jenoside.

Minisitiri Kabarebe yavuze ko hari n’abarwanyi ba FDLR bagizwe n’abasize bakoze Jenoside bashishikajwe no kongera kuyikora, asaba urubyiruko kudadira bakarwanya abo banzi b’ibyo igihugu kigezeho.

Yagize ati “Kurokoka ntiwumve ko ibyo bintu bigihari ngo ugire imbaraga zo kubirwanya, ntacyo waba wararokokeye nta na kimwe. Warokoka se ngo ejo abana bawe bazongera bicwe , hari icyo byaba bikumariye, ntacyo byaba bimaze.”

Minisitiri Kabarebe yongeyeho ko abantu batatu bazi Jenoside ari abayikorerwaga bahigwaga, abayikoze n’umusirikare wa RPA warwanaga ayihagarika.

Ibi byatumye abwira urubyiruko rwari rumaze iminsi itatu mu Karere ka Rwamagana ko batarokokeye kubaho ngo barye baryame, ko ahubwo bakwiye kugira ishyaka rituma bakora neza.

Ati “Niba hari umuntu ufite imbaraga zo gukunda igihugu, ni umuntu warokotse Jenoside kuko uwayiteguye akayishyira no mu bikorwa ntabwo ari we uzubaka igihugu. Uwarokotse afite inshingano yo kubaka igihugu no kugiharanira kuko ntabwo umuntu yarokoka biriya bintu ngo arokokere ubusa.”

Umwe mu rubyiruko witwa Nsengimana Cyprien yashimye impanuro zatanzwe na Minisitiri Kabarebe, by’umwihariko amateka y’ubwitange n’umurava byaranze ingabo zahagaritse Jenoside kandi ari nke ugereranyije n’abo bari bahanganye.

Ati “Nkuko dushimira umwami Yesu wadukijije ibyaha namwe turabashimira ko mwadukijije umuhoro. Imbaraga n’ubwitange mwagize ntabwo bizapfa ubusa, turi abasore tuzagera ikirenge mu cyabo.”

Visi Perezida wa Ibuka France, Alain Ngirinshuti, ubwo yagezaga ijambo ku rubyiruko rw’abarokotse Jenoside yabasabye kurenga ihungabana bagendeye ku ntego imwe.

Yagize ati “Mu ihungabana hari igihe kigera umuntu akibaza ati, ndiga ngo bibonwe na nde, ndakora ubukwe ngo mbwereke nde,ntidukwiye guheranwa n’agahinda. Dufite igihugu cyiza kiduherekeza, ibibazo iyo bihari turabiganira bigakemuka. Nta kintu na kimwe ugeraho cyoroshye, kuko ubuzima bukugoye nonaha ntibikwiye gutuma ureka kugira umwete.”

Yakomeje agira ati “Twahisemo gushikama tukarwana uru rugamba rw’ubuzima, turwanya ipfobya rya Jenoside, dukora n’ubuvugizi ku babukeneye.”

Nyuma y’ibi biganiro itsinda ry’abasore bake rizajya rihuzwa n’umuntu umwe witwa Mentor, bakorane urugendo rugana ku ntego yo gukira ibikomere, gutera imbere mu myigire no mu yindi mibereho, kwiha icyerekezo no kukigeraho n’ibindi bikenewe mu buzima.

Insanganyamatsiko y’iri huriro yagiraga iti “Kudadira no kwiha agaciro.”

Minisitiri w’Ingabo, James Kabarebe; Visi Perezida wa Ibuka France, Alain Ngirinshuti; Ubuyobozi bwa Imbuto hamwe n’urubyiruko rwari rwitabiriye ibi biganiro
Minisitiri w’Ingabo, Gen. James Kabarebe ageza ijambo ku bitabiriye
Visi Perezida wa Ibuka France, Alain Ngirinshuti ageza ijambo ku bitabiriye

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Thursday 8 Ukuboza 2016
Copyright © 2009 -2014 - IGIHE Ltd - All Rights Reserved