Gen Kabarebe yavuze uko Leta ya Habyarimana yatumizaga imbeba mu Bubiligi zikavurishwa abana bwaki (Video)

Yanditswe na Evariste Nsengimana
Kuya 20 Kamena 2019 saa 01:47
Yasuwe :
0 0

Umujyanama wa Perezida wa Repubulika mu by’Umutekano, Gen James Kabarebe, yavuze ko Abanyarwanda babayeho mu buzima bubi mbere ya Jenoside yakorewe Abatutsi mu 1994, kugera ubwo bumva uburyo babayemo kubuvamo bisa n’inzozi zigoranye kuba impamo.

Yabigarutseho mu kiganiro yahaye intore 696 ziri ku Rugerero ruciye Ingando mu Mujyi wa Kigali, cyabereye mu nyubako ya Mahatma Ghandi, ku wa 18 Kamena 2019.

Iki kiganiro cyitabiriwe n’abayobozi barimo uw’Umujyi wa Kigali, Rwakazina Marie Chantal; uw’Itorero ry’Igihugu, Bamporiki Edouard n’abandi, cyibanze ku kugaragaza urugendo rw’urugamba rwo kubohora igihugu n’uruhare rw’urubyiruko rwagize n’icyo rusabwa mu kucyitangira.

Gen Kabarebe ukunze gusangiza urubyiruko n’abakuru, amateka y’urugamba rwo kubohora igihugu bakumva neza icyo kucyitangira bisaba, yavuze ko rwari urugamba rutoroshye ingabo za RPA zatangiye zitatanye mu gisirikare cy’ibindi bihugu ariko zihuje umugambi.

Yavuze ko nubwo zari hirya no hino mu gisirikare cy’ibindi bihugu birimo Uganda n’ahandi rwari runyanyagiriye mu Karere, guhuza umugambi wo kubohora u Rwanda byabanje kugorana kubera ko zitagiraga aho zihurira ngo ziwunoze.

Imibereho zabayemo ishingiye ku gukandamizwa, amacakubiri n’ibindi byaziganishije mu buhunzi, byatumye zitangiza urugamba rwo kubohora u Rwanda nta numwe uhuje umugambi n’undi.

Uko kurambirwa akarengane n’ibindi byakorerwaga Abanyarwanda byatumye ubwo aba mbere bageraga ku mupaka w’u Rwanda na Uganda [i Kagitumba] n’abandi aho bari biyegeranya n’ubwo batari benshi banoza umugambi wo gutangiza urugamba.

Gen Kabarebe yavuze ko ko icyo gihe Abanyarwanda bari baramaze kumenyera ubuzima bwo gukandamizwa, kubaho mu bukene, ivangura, amacakubiri n’ibindi babibwemo na Leta ya Habyarimana n’izayibanjirije.

Urugamba rwaratangiye ndetse ingabo za RPA zitwara neza, zibasha gusubiza inyuma iza Habyarimana n’iz’ibindi bihugu bya Zaïre, u Bubiligi n’u Bufaransa zari zaje kumuha ubufasha.

Gen Kabarebe yavuze ko icyo gihe ikibazo ingabo za RPA zagize ari uko zifuzaga kubanza kumvisha abaturage icyo ziharanira byaba ngombwa bakazishyigikira ariko zigasanga barayobejwe.

Ati “Leta ya Habyarimana yari yamaze kubacengera mu bwonko, amacakubiri yarashinze imizi ari bibi cyane. Icya mbere Habyarimana yabanje kuvuga ko abateye igihugu atari Abanyarwanda, ari Abagande.”

Gusa icyo kinyoma cyo cyaje gukurwaho nyuma y’uko itangazamakuru ryabikurikiranye rikemeza ko ari Abanyarwanda. Icyo gihe Habyarimana ngo yahinduye umuvuno, avuga ko abateye ari ‘Inyenzi’, zifite amatwi maremare, imirizo n’ibindi.

Icyo cyo kugihinyuza cyari kigoranye kuko nta televiziyo zari mu Rwanda ngo zigaragaze niba koko izo ngabo zifite cyangwa zidafite iyo mirizo n’amatwi maremare, bituma abaturage batangira kubifata nk’ukuri, bumva ko ari ngomba kuzirwanya.

Icyo gihe urugamba rwarakomeje, Gen Kabarebe ahabwa umutwe w’ingabo ayobora, bajyana gutata [gushaka amakuru] ahitwa i Rukomo.

Mu rukerera rwa kare, we n’abasirikare yari yahawe bari bageze mu baturage batangira kubabwira ko bagenzwa no kubohora u Rwanda ariko ntibabumva.

Ati “Urumva kubwira umuturage wakandamijwe, watindahajwe mu mutwe we bashyizemo ingengabitekerezo, ukamubwira ku mubohora, icya mbere ntabwo yumva icyo urimo umubohorera.”

Yakomeje agira ati “Buriya iyo Leta yatindahaje abantu bayo, bagera ku rwego rw’aho bumva bahagijwe n’icyo bafite icyo aricyo cyose, bakumva ko badakeneye kubohorwa, wababwira kubabohora, bakumva ari nko kurota. Ntibashobora kubyumva.”

Gen Kabarebe yavuze ko kubwira umuntu icyo gihe utari ufite umwenda wo kwambara, udafite ibyo arya, utunzwe n’imfashanyo zituruka mu Bubiligi zirimo imbeba zo kuvura abana bwaki byari ingorabahizi.

Ati “Muri za 80 [1980] Sabena [Yari Ikompanyi y’Indege y’u Bubiligi, yasenyutse mu 2001, isimburwa na SN Brussels mu 2002] yazanaga Sous-Mbiligi, imbeba zo kuvura abana bwaki, imbeba zivuye mu Bubiligi, ba burugumesitiri bakajyana na Pick Up [imodoka] zabo ndabyibuka. Buri umwe akabona ikiboho cy’imbeba, bagera kuri komini Muvumba, abaturage bakajya gutonda umurongo, buri umwe bakamuterurira ibyana by’imbeba bijwigira [abyigana] akagenda.”

Gen Kabarebe yabwiye urwo rubyiruko ko iyo gahunda Leta y’icyo gihe yari yarashyizeho nubwo bitandukanye cyane, bashobora kuyigereranya na gahunda yo gutanga ifu Shisha Kibondo, yo gutanga ifu ifasha kurinda imirire mibi n’igwingira.

Ati “Iyo niyo yari gahunda ya Shisha Kibondo, yo kurwanya bwaki. Umuturage rero uri kuri urwo rwego, kumubwira ngo nje kukubohora, ntashobora kubyumva, uba uvuga ubusa.”

Gen Kabarebe yavuze ko icyo gihe ingabo za RPA zageragezaga kumvisha abaturage ko zishaka kubahohora ingoyi bashyizweho n’ubuyobozi bubi ituma bahora mu bukene, bakagera n’aho barwaza bwaki ariko bakabitegereza ntihagire icyo bababwira.

Nubwo abaturage banze kumva icyo ingabo za RPA zibabwira, bamiraga bunguri icyo Leta n’abanyamadini, cyane cyane ab’abazungu bababwira.
Ati “Ariko ntacyo badutwaye, turarebana ngiye kugira ntya, mbona akavumbi mu muhanda uturuka Ngarama, mbwira umusirikare nti genda hariya urebe umenya ari burende [imodoka ya gisikare.”

Uwo musirikare yagarutse amubwira ko abonye ari akamodoka kamwe k’umweru, baratuza kabageraho havamo umupadiri wateretse icyanwa afite n’ishapule ndende yambaye n’ikanzu ndende, ahageze we atangira kwigisha, abaturage bakamwumva n’abandi benshi barahaza.

Uwo mupadiri yamaze kuvugana n’abaturage yegera izo ngabo zari ziyobowe na Gen Kabarebe arazituka, azibwira ko ‘Umututsi amaze igihe adakandagira mu Rwanda ndetse nibahaguma abahururiza’.

Igitangaje ni uko nyuma y’igihe gito haje imodoka za gisirikare, abaturage bakanyarukira mu nzu, bagasohoka bafite amahiri, imipanga n’izindi ntwaro gakondo, bakirukankana ingabo za RPA.

Ati “Aho niho naboneye ko intambara yo kubohora u Rwanda ikomeye cyane, naravuze nti iyi izarwanwa n’umugabo.”

Yasobanuye ko we n’ingabo ze bakijijwe nuko yari azi agace ka Nyagatare, baca iz’ubusamo basubira ahari bagenzi babo.

Gen Kabarebe yavuze ko Ingabo za RPA zatsinze urugamba rwo kubohora igihugu kuko zari zizi icyo ziharanira nyamara umwanzi yari afite imbaraga z’umurengera ariko nta cyo aharanira gifatika.

Gen James Kabarebe yavuze uko Leta ya Habyarimana yatumizaga imbeba mu Bubiligi zikavurishwa abana bwaki

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza