00:00:00 IGIHE NETWORK KN KINYARWANDA EN ENGLISH FR FRANCAIS

Gen Kabarebe yagarutse ku byabaye Maj Gen Kagame abonye inkomere 200 za RPA n’imva z’abarenga 100

Yanditswe na Philbert Girinema
Kuya 2 Ugushyingo 2021 saa 04:21
Yasuwe :
0 0

Umujyanama w’Umukuru w’Igihugu mu by’Umutekano, Gen James Kabarebe, yatangaje ko mu 1990 ubwo Maj Gen Paul Kagame yageraga ku rugamba avuye muri Leta Zunze Ubumwe za Amerika, yakoze amahitamo akomeye agaragaza umuyobozi nyawe, ubwo yasangaga abasirikare benshi barakomeretse abandi barapfuye ariko akanga gusubira inyuma.

Gen. James Kabarebe yabigarutseho mu kiganiro yahaye abayobozi b’Urubyiruko rw’Abakorerabushake bari mu mahugurwa mu ishuri rikuru rya Polisi i Musanze.

Yabaganirije ku gukunda igihugu, indangagaciro n’amahame aranga umuyobozi mwiza n’imiyoborere myiza.

Mu kiganiro cye, yagiye yifashisha ingero z’ibintu byabaye ku rugamba rwo kubobora igihugu. Rumwe ni urugaragaza uko byari bimeze ubwo Perezida Kagame yemeraga gucikiriza amasomo ye kugira ngo afatanye n’abandi.

Ati “Mu 1990 mu cyumweru cya kabiri Perezida Kagame aje, asanze inkomere 250 zitari kuvurwa kuko nta miti yari ihari, agasanga irimbi ririmo ijana n’abandi, abasanga abayobozi bayoboraga izo ngabo bapfuye, agasanga n’abarwanyi barashonje nta muhate bafite wo kurwana, umwanzi abarasa uko ashatse, batakaje ahantu hose, batakaje na morali, ubusanzwe umuntu ku giti cye yakavuze ati ibi njemo ntacyo bimaze, ntaho mbikura, ntaho mbigeza reka nsame ayanjye. Yakabaye acika intege ariko nta muyobozi ucika intege.”

Gen Kabarebe yavuze ko kwemera gukomeza urugamba, akagarurira ingabo morali bigaragaza ubuyobozi bwiza kandi bureba kure bwa Perezida Kagame.

Ati “Umuyobozi ni ushaka igisubizo ku kibazo abona ko ubundi no kukibonera igisubizo bitagashobotse ariko ni uguha amahirwe igisubizo. Ni ugushyira imbere igisubizo aho gucika intege. Nta muyobozi ucika intege kuko ibibaca intege ntibizigera bibura.”

Gen Kabarebe yavuze ko mu mpera za 1991, ubuzima bw’Ingabo za RPA bwari bwarahindutse ku buryo zari zimeze nk’igisirikare cya leta, zifite ibikoresho, imyambaro, impungure ziboneka mu buryo buhoraho ndetse n’imyitozo itangwa.

Ibyo byose byaterwaga n’ubuyobozi bwari bufite mu ntekerezo uko buri munsi ubuzima bugomba kumera, buha amabwiriza aboneye ingabo nubwo hari aho rimwe na rimwe zayarengagaho.

Gen Kabarebe yavuze ko muri icyo gihe iyo habaga nta rugamba rwabaye, habaga inama z’abayobozi bakuru ku buryo n’iyo inama yarangiraga, Perezida Kagame yabazaga buri umwe niba ibyo yavuze byose yabyumvise.

Kugeza muri Nyakanga 1991, Ingabo za RPA zahinduye uburyo bw’imirwanire zitangira kugaba ibitero shuma ijoro n’amanywa. Bigeze nyuma ngo nanone uburyo bw’imirwanire bwarahinduwe, hanzurwa ko noneho ingabo ziguma ahantu hamwe.

Ati “Kugira ngo abyumvishe abasirikare, yarabanje we aragenda acukura umwobo we, indaki arayicukura. Amaze kuyicukura azana abasirikare bakuru bose arayibereka.”

Gen Kabarebe yavuze ko aho hantu hari i Nyagatare. Perezida Kagame yahise abwira abasirikare bakuru ko buri musirikare wese bugomba gucya afite indaki kandi mu gitondo ajya kugenzura ko babikoze.

Yavuze ko ibyo Perezida Kagame yakoze icyo gihe byari ugutanga urugero kandi ko n’abandi babibonye ku buryo nta muntu wari kubirengaho.

Muri izo ndake, yavuze ko hari aho byageze Perezida Kagame asaba ingabo ze kuzivamo ahubwo bakajya kurwanira i Byumba. Icyo gihe ngo abasirikare benshi barabyanze, bavuga ko batumva ukuntu bareka ahantu bari barafashe bakajya kurwanira ahandi batazi ko bazafata.

Ati “Umuyobozi afata imyanzuro akirengera ingaruka. Icyemezo cya nyuma cyo kuva Gikoba [i Nyagatare] tukajya gutera i Byumba ku itariki 5 Kamena 1992 , cyari igitekerezo cye ariko ari umwanzuro yafashe, mu nyungu z’urugamba muri rusange. Ntabwo urugamba rwari rugamije guhera hariya.”

Ingabo zavuye mu Mutara ziragenda zigera i Byumba. Icyo gihe abasirikare batumvaga ko bikwiriye, yababajije niba ubwo bajyaga ku rugamba rwo kubohora igihugu, intumbero yabo yari ukubohora Gikoba gusa.

Ati “Icya kabiri ati nituva hano tukajya mu Mujyi wa Byumba, Habyarimana araba ashaka iki muri izi ntoki za Gikoba? Araza hano asize Byumba aho mwateye?”

Uko ngo Perezida Kagame yabivugaga niko byagenze kuko ubwo Umujyi wa Byumba wari umaze guterwa, abasirikare bose ba Habyarimana bahise bajya i Byumba bavuye i Kigali, Ruhengeri n’ahandi.

Ati “Nijoro turi i Byumba twabonaga icyezezi cy’amatara y’i Kigali, ubwabyo Habyarimana ntiyashoboraga kubyihanganira. Uko izo ngabo zose azihuriza hamwe, niko azishyira mu byago byo kuba zaraswa. Perezida Kagame abonye ko Habyarimana dushobora kumaranira i Byumba, abwira abasirikare bakuru ati icyo Habyarimana ashaka ni Umujyi wa Byumba, nimuwumurekere.”

Icyo gihe Ingabo za RPA ngo zigiye inyuma gato ziva mu mujyi, kuko ngo zabonaga ko Habyarimana niyumva ko ari mu mujyi biri buze kumushimisha.

Aho niho havuye ko ku Mulindi hashyirwa ibirindiro by’Ingabo za RPA. Ibyo byaganishije ku mishyikirano ya Arusha kuko Habyarimana yahise abona ko nta kindi cyashoboka.

Gen Kabarebe yasabye uru rubyiruko kuba abayobozi bafata ibyemezo mu nyungu z’abo bayobora, kandi bakareba kure muri byose.

Gen James Kabarebe yavuze ko ubwo Perezida Kagame yari ageze ku rugamba, yasanze abasirikare benshi barapfuye, abandi barakomeretse ariko ntacike intege
Mu kiganiro Gen James Kabarebe yahaye uru rubyiruko yagarutse ku bintu by'ingenzi biranga umuyobozi mwiza

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .