Gen. Kabarebe yagarutse ku cyafashije Inkotanyi guhagarika Jenoside nta bushobozi buhambaye zifite

Yanditswe na Evariste Nsengimana
Kuya 10 Mata 2018 saa 11:11
Yasuwe :
0 0

Minisitiri w’Ingabo, Gen. James Kabarebe, yashimangiye ko FPR Inkotanyi n’ingabo zari izayo (RPA), babashije guhagarika Jenoside yakorewe Abatutsi mu 1994 kandi nta bushobozi buhambaye bari bafite buruta ubw’ingabo za Leta bari bahanganye.

Muri iki gihe u Rwanda ruri mu minsi 100 yo kwibuka Jenoside yakorewe Abatutsi, Minisitiri w’Ingabo yaganirije abakozi b’Ikigo gishinzwe ubwiteganyirize (RSSB) bakorera mu Mujyi wa Kigali, ku wa 9 Mata 2018, yibanda ku rugamba rukomeye ingabo za RPA zarwanye mu kuyihagarika, zibifashijwemo n’umugambi mwiza zari zifite wo kurwanya ingengabitekerezo mbi no kuzamura imibereho myiza n’ubukungu bw’abaturage .

Yagize ati “Intambara ya RPF yari iyo kubaka igihugu kigana ku iterambere, gikemura ibibazo by’iterambere ry’ubukungu, imibereho myiza y’abaturage n’impinduka zibereye buri munyarwanda wese. Ibyo rero kubirwanya, ni ukureba bugufi cyane kuko nta kuringaniza kundi bari bafite mu miyoborere yabo bitari amacakubiri, ingengabitekerezo ya Jenoside.”

Gen Kabarebe yasobanuye ko mu bijyanye n’ubushobozi bw’ingabo za RPA zageraga ku bihumbi 19 gusa mu gihe zari zihanganye n’iza Leta zarengaga ibihumbi 56, Abacengezi na Ex-FAR barengaga ibihumbi 36 zikiyongeraho n’ubufasha zahabwaga n’amahanga harimo u Bufaransa n’ibindi, ariko ko bari bafite ibitekerezo byuzuye ingengabitekerezo n’amacakubiri bitari kugira icyo byabagezaho.

Yanavuze ko FPR Inkotanyi yari ifite icyerecyezo cyiza, cyo gufata umwanzi w’igihugu nk’ubukene, ubutindi, ingengabitekerezo ya Jenoside n’ibindi bibangamira iterambere no gukora ibishoboka byose ikabirwanya kugera ibigezeho.

Yongeye ati “RPA ijya gutangira yari ifite intego za Politiki ariko itari kugeraho idafite imbaraga za gisirikare. Akazi kayo, kari ukumvisha abo twarwanaga ko bagomba kubyumva kuko niyo mahitamo bari bafite[…] Ikintu nari nababwiye, ntabwo RPA yarwanaga yonyine mu rwego rwa politiki, yari kumwe na PSD, PL n’andi mashyaka [..] ni ukuvuga ko umwanzi twari dufite wa politiki yari MRND.”

Minisitiri Kabarebe yavuze ukuntu nyuma y’urugamba rwo kubohora igihugu, yagiye muri kimwe mu bihugu byari inyuma ya Leta yatsinzwe, bakamubaza ibanga bakoresheje kugira ngo babohore igihugu kandi nta bushobozi buhambaye, mu magambo make akabasubiza ko impamvu uruhande bariho rwatsinzwe ari uko rwari rufite ingengabitekerezo ya Jenoside.

Umuyobozi Mukuru w’Ikigo cy’Ubwiteganyirize mu Rwanda (RSSB), Gatera Jonathan, yasabye abakozi kwirinda ingengabitekerezo ya Jenoside n’ikintu cyose cyayiganishaho, abasaba kugera ikirenge mu cy’ingabo za RPA.

Mu Ukwakira 1990 nibwo RPA yatangije urugamba rwo kubohora u Rwanda, rwashojwe muri Nyakanga 1994 ihagaritse Jenoside yakorewe Abatutsi.

Minisitiri w’Ingabo, Gen. James Kabarebe ubwo yaganirizaga abakozi ba RSSB ku rugamba rwo guhagarika Jenoide
Abakozi ba RSSB bafashe umunota wo kwibuka abazize Jenoside yakorewe Abatutsi
Umuyobozi Mukuru wa RSSB, Gatera Jonathan, yasabye abakozi kurwanya ingengabitekerezo ya Jenoside

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza