Gatsibo: Yatawe muri yombi azira gutema inka eshatu z’umuturanyi we

Yanditswe na Hakizimana Jean Paul
Kuya 22 Mutarama 2021 saa 09:50
Yasuwe :
0 0

Umuturage wo mu Karere ka Gatsibo mu Murenge wa Murambi yatawe muri yombi nyuma yo gutema inka eshatu z’umuturanyi we, ubuyobozi buvuga ko icyabimuteye ari amakimbirane bari basanganwe.

Ibi byabaye ku wa Kane tariki ya 21 Mutarama 2021 mu Mudugudu w’Akayenzi mu Kagari ka Rwankuba mu Murenge wa Murambi mu Karere ka Gatsibo.

Umunyamabanga Nshingwabikorwa w’Umurenge wa Murambi, Kanamugire Innocent, yabwiye IGIHE ko icyatumye uyu musore atema izi nka kitaramenyekana ariko ko mu makuru bamenye harimo amakimbirane aranga abaturanyi.

Yagize ati “Urebye nta kintu gifatika bapfa kizwi ahubwo ni amakimbirane ashingiye ku guturana, nyiri izo nka twamubajije icyo bapfa atubwira ko ntacyo uretse ko ngo bakunda gushyamirana cyane nk’abaturanyi bapfuye ibintu bisanzwe, ejo rero ngo nibwo babyutse basanga inka zose uko ari eshatu yazitemye.”

Uyu muyobozi yavuze ko uburyo zatemwe zitakomeretse mu buryo bukabije ariko ko umusore wabikoze yahise atabwa muri yombi ashyikirizwa Sitasiyo ya RIB ya Kiramuruzi kugira ngo abiryozwe.

Gitifu Kanamugire yasabye abaturage kwirinda gushyamirana cyane babona hari ibyo batumvikanye bakitabaza ubuyobozi bukabafasha gukemura ibibazo baba bagiranye aho kwihanira.

Ati “Turabasaba kwegera ubuyobozi bukabafasha gukemura amakimbirane bagiranye, bakirinda kwihanira, aho kugira ngo ugirane ikibazo n’umuntu uteme inka ze wakwegera ubuyobozi.”

Abaturage basabye kwirinda amakimbirane kuko atubaka ahubwo asenya imibanire yabo, akanabasubiza inyuma.

Umuturage wo mu Karere ka Gatsibo yatawe muri yombi nyuma yo gutema inka eshatu z’umuturanyi we

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .