Gatsibo: Imyaka ibiri irenda kwihirika, Ishimwe Daniel abeshejweho n’Impuhwe z’Imana

Yanditswe na Emma-Marie Umurerwa
Kuya 6 Nzeri 2018 saa 06:30
Yasuwe :
0 0

Ishimwe Daniel wavukiye mu bitaro bya Kiziguro mu Karere ka Gatsibo ubu amaze umwaka umwe n’amezi arindwi; nyina yapfuye amubyara, nyirakuruza wamusigaranye nawe nta bushobozi afite bwo kumutunga kuko abeshwaho no guca inshuro kandi ageze mu zabukuru.

Mu Ukuboza 2016, IGIHE yabagejejeho inkuru yagaragazaga agahinda ka Urayeneza Cécile w’imyaka 66 utuye mu Murenge wa Kiziguro mu Karere ka Gatsibo, avuga ko yapfushije umwuzukuru amaze kwibaruka, akamusigira agahinda gakomeye kuko atigeze amubwira uwo babyaranye.

Kuri ubu uretse n’ako gahinda, uyu mukecuru avuga Ishimwe Daniel yasigiwe n’umwuzukuru we kuri ubu umaze kuba igitambambuga, abeshejweho n’Impuhwe z’Imana.

Uko byagenze

Mama wa Ishimwe ubwo yamaraga kumwibaruka abazwe, yaje kugira ikibazo bimuviramo gupfa nyuma y’amasaha make amaze kwibaruka.

Icyo gihe abaganga ba Kiziguro bakoze ibishoboka byose ngo baramire ubuzima bwa mama Ishimwe ariko biranga, biba ngombwa ko bamwohereza ku Bitaro bya Kaminuza bya Kigali, CHUK. Gusa ntacyo byatanze kuko yaje gushiramo umwuka bakimurwanaho.

Uwo mubyeyi ubwo yitabaga Imana, umuntu wa hafi mu muryango we wari umuri iruhande ni nyirakuru, Urayeneza.

Urayeneza avuga ko ubwo umwuzukuru we yari amaze gupfa hakozwe ibikorwa byo kuramira umwana, igihe kigeze biba ngombwa ko hishyurwa eerivise zakorewe ku bitaro nk’uko bisanzwe.

Urayeneza yagiye kubaza abaganga ayo ari bwishyure abaganga bamwereka fagitire ya 400,000 Frw. Yabuze ubwishyu, asinyira ko ibitaro bya CHUK aribyo bizahamba umwuzukuru we, nuko ashaka abagiraneza bamuha itike yisubirira iwabo i Gatsibo.
Mu mpera za Kanama 2018, aganira n’Ikinyamakuru Taarifa, Urayeneza yagitangarije inzira y’umusaraba yanyuzemo, arera umwuzukuruza we, nta n’ubushobozi afite.

Ati “Ubwo nageraga mu rugo mvuye kwa muganga nabwiye abo mu rugo iby’inkuru y’umwana n’urupfu rw’umwuzukuru wanjye; babura icyo bakora bahitamo gutegereza ugushaka kw’Imana kuko nta n’itike yo kubageza ku bitaro bari kubona.”

“Uretse n’ibyo kandi nta n’ubwisungane mu kwivuza bari bafite […] Nyuma y’iminsi mike, naje kubona imbangukiragutabara ihagaze mu rugo hasohokamo itsinda ry’abaganga batatu bateruye Ishimwe. Bambwira ko umwuzukuru wanjye yashyinguwe n’ibitaro bya CHUK.”

Ati “Nari mfite ubwoba ko baje kumfunga. Narimfite ubwoba bw’amafaranga ntishyuye ku bitaro.”

Yongeraho ko nta n’umwe wo mu muryango we uzi aho mama wa Ishimwe yashyinguwe. Ati “Ni ibintu bikitubabaza kugeza n’ubu.”

Ubuzima bwa Ishimwe

Nyuma y’ukwezi kumwe Ishimwe avutse, IGIHE yanditse ku buzima bw’uwo mwana igaragaza ko yabuze kivurira yewe ko na leta yamutereranye.

Gusa icyo gihe Ibitaro bya Kiziguro byari byemeye kujya bishakira Ishimwe amata asimbura amashereka.

Urayeneza ati “Twabwiwe ko abagiraneza bakusanyijwe 20,000Frw agahabwa umuyobozi ushinzwe Imibereho myiza ariko mu by’ukuri twabonye ibihumbi 6,000 twifashishije tugura amata y’umwana mu gihe cy’ukwezi kumwe.”

Umwaka urenga, Urayeneza yakomeje kujya ku Kigo Nderabuzima cya Kiziguro kugira ngo arebe ko bamuha ubufasha bamwemereye, ariko ntacyo bamumariye.

Avuga ko yabwiye ubuyobozi ikibazo cya Ishimwe, asubizwa ko abantu batazajya babyara ngo bibwire ko leta ariyo izabarerera.

N’Agahinda mu maso, Urayeneza avuga ko uyu mwana nta n’ubwisungane mu kwivuza agira kandi mu by’ukuri arwara nka kabiri mu kwezi.

Ati “Ubu nta kintu dusigaranye uretse impuhwe z’Imana gusa.”

Uruhuri rw’ibibazo

Abayobozi b’Umudugudu wa Bidudu aho Urayeneza atuye baherutse gusaba abaturage bose b’uwo mudugudu kwishyura amafaranga 500 y’Umutekano, ariko uyu muryango uribaza aho uzakura ayo mafaranga.

Urayeneza abeshejweho no guca inshuro mu baturage, akaba akorera ikiro n’inusu cy’ibishyimbo ku munsi, umugabo we nawe ugeze mu zabukuru ngo ntacyo abashije gukora, kuko yavunitse ubwo yituraga mu musarani yari yagiye gucukura ngo babone amafaranga.

Inka uyu muryango wahawe muri Gahunda yagira Inka nayo yarapfuye barayitaba. Uyu muryango wishatsemo amafaranga ugura ikibwana cy’ingurube nacyo abajura baracyiba, usigara amara masa.

Avuga ko bashyizwe mu cyiciro cya kabiri cy’ubudehe ariko ntibarabona ubwishingi bemerewe mu mezi ashize. Hamwe n’aka gahinda n’uruhuri rw’ibibazo, uyu muryango urasaba ubufasha bw’abagiraneza.

Umunyamabanga Nshingwabikorwa w’Umurenge wa Kiziguro, Hategekimana Achille, yabwiye IGIHE ko Urayeneza yahawe ubufasha butandukanye ngo yite ku mwuzukuruza we.

Ati “Yahawe ubufasha butandukanye kuva umwana yavuka ahubwo umuhungu we arabimurya. Ubufasha avuga atahawe ni ubwo kujya kuzana umurambo w’umwuzukuru we kuko icyo gihe yasanze nta mafaranga ahari. “

Yakomeje ati “Ndibuka ko umukozi ushinzwe imibereho myiza yamuhaye amafaranga ibihumbi 6000 yo kujya akamishiriza umwana amata, yaje rimwe ntiyagaruka."

"Twamuhaye inka n’ihene byose umuhungu we arabigurisha, ntiyagarutse no kubitubwira ahubwo twabimenye ejo. Yahawe n’amafaranga ibihumbi 200 kubera umwana w’imfubyi wundi arera, mwene wabo wabaga mu kigo cy’imfubyi.”

Uyu muyobozi yakomeje avuga ko ikibazo cy’umwuzukuruza wa Urayeneza bagihagurukiye kuko ubu ngo bamushakiye ahantu azajya ajya gukamisha amata y’umwana, kandi bagiye no kumwishyurira ubwisungane mu kwivuza.

Inkuru wasoma: Agahinda ka Urayeneza wapfushije umwuzukuru amaze kubyara, atamubwiye uwamuteye inda

Uyu mukecuru avuga ko nta bushobozi afite ngo abashe gukomeza kwita kuri uyu mwuzukuru we

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza