Gatsibo: Abaturage biyubakiye ibiro by’Akagari bifite agaciro ka miliyoni 40

Yanditswe na Emma-Marie Umurerwa
Kuya 30 Gicurasi 2019 saa 07:59
Yasuwe :
0 0

Kwishakamo ibisubizo ni imwe mu ndangagaciro abanyarwanda muri rusange bazingatiye by’umwihariko abatuye mu Kagari ka Mamfu mu Murenge wa Muhura biyemeje gutanga amafaranga agera kuri miliyoni 40 bakiyubakira Ibiro by’Akagari.

Nyuma yo kumara imyaka 25 Ibiro by’Akagari ka Mamfu bikorera mu mfunganwa (icyumba kimwe cy’inzu), abaturage bafashe icyemezo cyo gukusanya amafaranga bubaka inzu y’icyitegererezo bazajya bahererwamo serivisi.

Akanyamuneza kari kose ku mugoroba wo kuwa 28 Gicurasi 2019, ubwo abaturage batahaga ibiro by’akagari bishya.

Abaganiriye na IGIHE bavuze ko bari barambiwe kujya gusabira serivisi mu cyumba cy’ubukode.

Bizimuremyi Thacien yagize ati “Akagari kacu kakoreraga mu cyumba twakodeshaga, iyo abaturage bajyaga gusaba serivisi ari benshi wasangaga bahagaze ku zuba, imvura yagwa ikabanyagira kuko kari akumba gato cyane. Hari n’igihe nigeze gutaha ntahawe serivisi kubera ko nasanzeyo abantu benshi bahagaze.”

Mukamusana Rose na we yagize ati “Inzu akagari kakoreragamo yanakorerwagamo na koperative y’abahinzi b’amasaka, ikanakoreramo ivuriro. Twahisemo rero kwishakamo ubushobozi twubaka ibiro by’Akagari bijyanye n’icyerekezo kugira ngo tujye dusabira serivisi ahantu hagezweho.”

Umunyamabanga Nshingwabikorwa w’Umurenge wa Muhura, Rugengamanzi Steven, yabwiye IGIHE ko hashize imyaka itanu abaturage bakusanya amafaranga.

Ati “Imirimo bayitangiye mu 2014. Ni igikorwa umuntu yavuga ko kitari cyoroshye ariko abaturage bishatsemo ibisubizo ntibategereza akimuhana. Abafite imodoka batundaga umucanga, amabuye n’amatafari, abazi kubaka barazaga bakubaka, abafite imbaraga nabo bakaza bagakora ibindi bikorwa.”

Mu tugari dutanu tugize Umurenge wa Muhura, aka Mamfu niko katagiraga aho gakorera hajyanye n’igihe.

Mu tugari dutanu tugize Umurenge wa Muhura, aka Mamfu niko katagiraga aho gakorera hajyanye n’igihe.
Abaturage bari babucyereye baje gutaha ibiro by'Akagari biyubakiye

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza