Kwamamaza

Gasigwa asanga imbabazi Kiliziya Gatolika isaba zikwiye kuba zigizwe n’ingingo enye

Yanditswe kuya 24-11-2016 saa 08:36' na IGIHE


Umushakashatsi Gasigwa Léopold wakoze Filime mbarankuru igaragaza isano Kiliziya Gatolika ifitanye n’abayo bakoze Jenoside n’icyo isabwa mu kurenganura abayizize, asanga imbabazi isaba zikwiye kuba zigizwe n’ibintu bine by’ingenzi, bitaba ibyo zikaba ari ‘iza nyirarureshwa.’

Gasigwa avuga ko Kiliziya izwiho ibintu bitatu by’ingenzi, ari byo kuba ari abakirisitu, kuba ari abanyamafaranga, bakaba ari n’abahanga; ibyo iyo bihuriye hamwe bihita bibyara ikindi cya kane ari na cyo gikomeye, cyo “kuba ijwi ryayo ryumvwa rikagera kure”.

Mu butumwa busoza umwaka wa Yubile y’Impuhwe z’Imana, nibwo Kiliziya Gatolika yakomoje ku gusaba imbabazi ku bw’abayoboke bayo bagize uruhare muri Jenoside yakorewe Abatutsi mu 1994, mu rwandiko rwasinyweho n’abepisikopi icyenda bo mu Rwanda.

Muri urwo rwandiko hari aho bagira bati “Nubwo Kiliziya ntawe yatumye kugira nabi, twebwe abepisikopi gatolika, ku buryo bw’umwihariko, twongeye gusaba imbabazi kubera bamwe mu bana bayo, abasaseridoti, abihayimana n’abakirisitu bagize uruhare muri jenoside yakorewe Abatutsi.”

Uyu mugabo w’umushakashatsi asanga imbabazi Kiliziya Gatolika yasabye ari inzira nziza, ariko mu bukirisitu bw’abayoboke bayo, izo mbabazi ntizuzuye kuko mu itangazo batagaragaza abo yasabye imbabazi.

Ati “Narerewe muri Kiliziya Gatolika kugeza mfite imyaka 18, banyigishije ko iyo wakoshereje umuntu cyangwa wamucumuyeho, umusaba imbabazi, ukazisaba Imana mu ntebe ya Penetensiya, ibyo kandi bigakurikirwa no gutanga icyiru."

Kuri ibyo, Gasigwa asanga Kiliziya Gatolika na yo ikwiye kugaragaza abo isaba imbabazi, ubundi ikazisaba Imana kandi ikica icyiru nk’uko ibitoza abakirisitu bayo.

Nk’uko akomeza abigaragaza, Kiliziya Gatolika ikwiye gusaba imbabazi Leta y’u Rwanda, abacitse ku icumu rya Jenoside, kandi ikazisaba na roho z’abazize jenoside kuko mu kwemera yigisha, harimo ko roho zidapfa ahubwo hapfa umubiri.

Nyuma y’abo kandi ngo Kiliziya Gatolika ikwiye gusaba imbabazi abakoze jenoside, kuko mu myaka isaga 100 imaze igeze mu Rwanda, yigishije ibirimo n’amategeko y’Imana, kandi harimo rimwe rigira riti “Ntukice”. Kuba rero bamwe mu bayo barabirenzeho, ngo bigaragaza ko bamwe mu bayiyoboye bwa mbere babaye babi.

Ikindi Gasigwa avuga nk’uwafashe umwanya wo gusesengura isano Kiliziya Gatolika ifitanye n’abayo bakoze Jenoside, n’icyo isabwa mu kurenganura abayo bayizize n’abayirokotse, ni uko mu ibaruwa yayo isaba imbabazi yari ikwiye kugaragaza mu buryo butaziguye, uko izaha ubutabera bariya bazize jenoside kuko kubibuka mu buryo babikoramo, ubwabyo bidahagije.

Aha atanga urugero rw’uburyo ubuhanga bw’abayobozi ba Kiliziya butagaragara uko bwakabaye mu bihe byo kwibuka, aho kwibuka no kubika amateka ya Jenoside usanga bikorwa bitewe n’imyumvire y’umupadiri cyangwa Musenyeri muri Diyosezi runaka, bityo ugasanga budasa kandi ubusanzwe muri Kiliziya imyumvire ari imwe kuva i Roma kugera mu Muryango remezo.

Gasigwa avuga ko itangazo rya Kiliziya Gatorika ryagutse, ku buryo bisa n’aho basabye imbabazi ku bintu byinshi, umuntu akaba yakwibaza impamvu hagarukamo jenoside.

Ibi abona biterwa n’uko “Jenoside ari icyaha kidasanzwe kandi babikora nabi, mbese hari icyo babazwa, bakwiye gusubiza mu buryo bweruye.”

Uyu mushakashatsi akaba n’umuhanga mu bya Sinema ariko yibanze kuri filime mbarankuru, avuga ko ikindi kidakwiye gusigara inyuma ngo imbabazi Kiliziya Gatolika isaba zibe zuzuye, ari “guhana abayo bijanditse muri jenoside”.

Ati “Kiliziya Gatolika ubwayo ifite urukiko rwihariye, ibihano byarwo simbizi, ariko ntaho bihuriye n’iby’ubutabera busanzwe.”

Ibi ngo byafasha ko abapadiri n’abandi bihaye Imana bagize uruhare muri Jenoside bakidegembya hanze ko batakwemererwa kugira uruhare mu mirimo ya Kiliziya, kuko ari “Kiliziya imwe n’ukwemera kumwe”.

Ikindi kitari gikwiye kubura mu mbabazi Kiliziya Gatolika isaba, ni ugufasha abarokotse jenoside, bakabafasha nk’icyiru.

Gasigwa ati “Iyo umuntu akorerwa jenoside aba yifuza kurokoka, agasenga asaba Imana kumurokora, ariko kubana n’ingaruka zayo na byo biragatsindwa n’uhoraho. Abo bantu rero bakabaye babareba bakabafasha bitari nk’uko babikora mu kavuyo.”

Aha yatanze urugero rw’uburyo Leta yabashyiriyeho ikigega cyihariye gishinzwe gufasha abacitse ku icumu (FARG), na Kiliziya Gatolika rero ngo yari ikwiye kureberaho, aho kujya ibafasha mu kavuyo biciye mu miryango iyishamikiyeho.

Kuba ku itariki ya 17 Gicurasi 1994, Papa Yohani Pawulo wa II yaravuze ko uwabo uzijandika muri jenoside azabiryozwa, ibyo ngo byari kurengera Kiliziya yari abereye umushumba, kuruta uko byarengeraga abicwaga, cyane ko benshi bari barakusanyirijwe mu nsengero zayo.

Gasigwa ngo ni umwe mu bategereje ko urugendo Kiliziya irimo rwo gusaba imbabazi, ruzagera mu 2018 ibyo bintu bine by’ingenzi bikwiye kuba bizirimo byararangiye, yabyumva agashima ko yunze ubumwe ikaba kiliziya imwe, ariko bitaba ibyo, zikazaba ari ‘iza nyirarureshwa’.

Inkuru bifitanye isano: Guverinoma ntiyanyuzwe n’imbabazi zasabwe na Kiliziya kuri Jenoside

Agace gato ka filime mbarankuru yakozwe na Gasigwa

Gasigwa Léopold asanga imbabazi Kiliziya Gatolika yasabye zituzuye kuko itangazo ryayo ritagaragaza abo yazisabye

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Saturday 10 Ukuboza 2016
Copyright © 2009 -2014 - IGIHE Ltd - All Rights Reserved