Gasabo: Polisi yifatanije n’abaturage mu muganda wo kurengera ibidukikije iburira ababyangiza

Yanditswe na Evariste Nsengimana
Kuya 17 Ukuboza 2017 saa 08:09
Yasuwe :
0 0

Polisi y’u Rwanda n’izindi nzego z’umutekano bifatanyije n’abaturage bo mu Murenge wa Kinyinya, Akarere ka Gasabo, mu muganda udasanzwe wo kurengera ibidukikije, inibutsa ababyangiza ko itazabihanganira.

Uyu muganda wabaye kuri uyu wa Gatandatu waranzwe no gusiba ibinogo byacukuwemo umucanga, abawucukuye bakabisiga birangaye mu Kagari ka Gasharu.

Umuyobozi ushinzwe guhuza ibikowa bya Polisi, CP. Emmanuel Butera, yavuze ko uyu muganda uje ukurikirana n’amahugurwa yatangirwaga muri Polisi, agamije gukumira kwangiza ibidukikije.

Yagize ati “Uyu muganda ufite impamvu yawo, uje ukurikirana n’amahugurwa amaze iminsi ibiri abera ku cyicaro cya Polisi yigaga uburyo twarushaho gukumira kwangiza ibidukikije.”

Yakomeje avuga ko ayo mahugurwa yateguwe na Polisi ifatanyije na Minisiteri n’ibigo bifite aho bihuriye no kurengera ibidukikije, hagamijwe gukumira ikintu cyose kibyangiza kuko bigira ingaruka ku buzima bw’abatuye Isi,.

Yongeyeho ko Polisi ari urwego rushinzwe kureba abarenga ku mategeko yashyizweho n’igihugu yose arimo n’ayo kurengera ibidukikije, abafashwe bagahanwa.

Umukozi ushinzwe uburezi mu Karere ka Gasabo, Kimenyi Burakari, wari uhagarariye Umuyobozi w’Akarere yavuze ko hashyizweho amabwiriza y’uko ucukuye umucanga agomba kuba abifitiye uburenganzira, aho asabwa gusubiranya aho yawucukuye no guteraho ibiti.

Bimwe mu bitera iyangizwa ry’ibidukikije byiganjemo ibikorwa bya muntu nk’ubucukuzi bw’amabuye y’agaciro, ayo kubakisha, imicanga ; ubwiyongere bw’abaturage bashaka aho gutura n’ibindi.

Mu gihe ibidukikije bitabungabunzwe neza, bigira ingaruka ku baturage zirimo kubura imvura, ibiza birimo imyuzure n’inkangu, kwangiza umwuha uhumekwa n’ibindi.

Basiba bimwe mu binogo byacukuwemo umucanga
Abapolisi mu muganda wo kurengera ibidukikije
Umuyobozi ushinzwe guhuza ibikowa bya Polisi, CP Emmanuel Butera
Nyuma y'umuganda abaturage bahawe ibiganiro ku kurengera ibidukikije

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza