Gasabo: Polisi yafashe abantu bane bategaga abaturage bakabambura

Yanditswe na IGIHE
Kuya 29 Ukwakira 2019 saa 08:15
Yasuwe :
0 0

Polisi y’u Rwanda ikorera mu Karere ka Gasabo yafashe abantu bane bategaga abaturage bakabambura ibyabo.

Bafatiwe mu mudugudu wa Cyeyeri mu kagari ka Akamatamu mu murenge wa Jabana mu karere ka Gasabo, bafashwe ku gicamunsi cyo ku Cyumweru tariki ya 27 Ukwakira nyuma y’aho umwe muri bo amaze gutega umuturage akamwambura igare n’inzoga yari avuye kurangura.

Umuvugizi wa Polisi mu mujyi wa Kigali, CIP Marie Gorette Umutesi avuga ko hari ku manywa saa munani umuturage witwa Hafashimana Felix anyura mu nzira ica mu gashyamba gaherereye mu mudugudu wa Cyeyeri ahasanga umwe mu bambuzi afite umuhoro amutegeka guhagarara akamuha ibyo afite byose.

Yagize ati “Yari avuye kurangura inzoga anyura mu kayira kari mu gashyamba kari mu mudugudu wa Cyeyeri ahasanga umwambuzi afite umuhoro amutegeka gushyira hasi igare ndetse n’inzoga yari avuye kurangura.”

CIP Umutesi akomeza avuga ko nyuma yo kwamburwa n’uwo mujura, Hafashimana yatabaje abaturage bahita bahamagaza ubuyobozi.

Ati: ”Hafashimana akimara gucika, yahise atabaza abaturage baraza basanga umwambuzi arimo kunywa za nzoga, bahita bamufata bamwambura umuhoro yari afite baraduhamagara duhita tujyayo tumuzana tumushyiriza urwego rw’ubugenzacyaha.”

Umuvugizi wa Polisi mu mujyi wa Kigali avuga ko hari hashize iminsi abaturage bavuga ko hari abantu babategera mu gashyamba kari mu mudugudu wa Cyeyeri ndetse no mu gishanga gihingwamo umuceri nacyo kiri muri uwo mudugudu. Hakaba hari haratangiye ibikorwa byo gufata abo bagizi ba nabi.

Uwa mbere akimara gufatwa yavuze ko atari ubwa mbere yari atageye abantu muri ako gashyamba akabambura, avuga ko akenshi yabaga ariku kumwe na bagenzi be.

Bose Polisi yamaze kubafata ihita ibashyikiriza urwego rw’igihugu rw’ubugenzacyaha(RIB) kugira ngo bakurikiranwe ku byaha bakoraga.

CIP Umutesi yashimiye uruhare rw’abaturage mu gutuma ibyo bisambo bifatwa abasaba gukomeza gukorana bya hafi n’inzego z’umutekano mu rwego rwo kurwanya no gukumira ibyaha.

Yakomeje abasaba gufata ingamba zo kurwanya abantu babahungabanyiriza umutekano, aho yabagiriye inama yo kujya bagira ikaye y’umudugudu bakamenya umuntu mushya waje muri uwo mudugudu n’icyo akora. Yavuze ko ibyo bizabafasha kumenya abantu babihishamo bakabahungabanyiriza umutekano kuko na bariya bose bafashwe bari basanzwe batuye muri uriya mudugudu wa Cyeyeri.

CIP Umutesi yakomeje agira inama n’abandi bose bafite umugambi wo kwambura abaturage cyangwa gukora ibindi byaha ko nta mwanya bazabona kuko ku bufatanye n’abaturage Polisi itazaborohera.

Ingingo ya 166 mu gitabo cy’amategeko ahana ibyaha ivuga ko umuntu wese uhamijwe n’urukiko icyaha cyo kwiba, ahanishwa igifungo kitari munsi y’umwaka umwe ariko kitarenze imyaka ibiri, ihazabu y’amafaranga y’u Rwanda atari munsi ya miliyoni imwe ariko atarenze miliyoni ebyiri, imirimo y’inyungu rusange mu gihe cy’amezi atandatu cyangwa kimwe gusa muri ibyo bihano.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza